मरकुस 16 - मध्य पुरविया थारूयेसु मरके जि उठलै ( मती २८:१-८ , लुका २४:१-१२ , युहन्ना २०:१-१० ) 1 पबितर बिसरामके दिन बितलाके बाद मरियम मग्दलिनी, याकुबके माँ मरियम आ सलोमी येसुके लहासमे लगाबैले गमकौवा तेल आ अतर किनल्कै। 2 हप्ताके पहिन्का दिन बिहान सबेरे उसब सुरुज उगैत मातर येसुके राखलहा चिहानमे गेलै। 3 तब उसब रस्तामे जाइबखत आपसमे कहैछेलै, “चिहानके मुहमे राखलहा पथलके के हटादेतौ?” 4 जब उसब ओइठाम पहुचलै तब चिहानके मुहमे राखलहा बरका पथल हट्याल देखल्कै। 5 उसब जब चिहान भितर ढुक्लै तब ओते एकटा उजर बस्तर पिन्हलहा लोकके देहना कातमे बैठल देखल्कै आ उसब एकदमसे डेरागेलै। 6 महज उ लोक ओकरासबके कहल्कै, “नै डेरा! तुसब कुरूस पर लटक्याल नासरतके येसुके खोजैचिही नै? उ त जिके उठल छौ आ अते नै छौ। ओकरा राखल ठाममे देख! 7 आब जो, ओकर चेलासबके आ पतरुसके कैहदहै कि उ तोरासबसे अगारी गालिलमे ज्यारहल छौ आ ओतै तोरासबके भेटतौ।” 8 तब उसब चिहानसे दौरले बाहर निकललै, कथिलेत उसब एकदम घबराल छेलै आ थर-थर कापैत छेलै आ डरसे ककरो कुछो नै कहल्कै। येसु चेलासब लग परगट भेलै ( मती २८:९-२० , लुका २४:१३-५३ , युहन्ना २०:११-२३ , परेरित १:४-११ ) 9 [हप्ताके पहिन्का दिन येसु बिहान सबेरे जिके उठलै आ सबसे पहिने मरियम मग्दलिनी लग परगट भेलै। जकरसे येसु सात भुत आत्मासब निकाल्ने रहै। 10 तब मरियम ओकर चेलासबके जेसब सोक करैत कानै-खिजै छेलै सेसबके यि बात सुनाइल्कै। 11 महज जब येसु जिके उठलै आ मरियम लग देखा परलै से बात सुनल्कै तब उसब बिस्बास नै करल्कै। 12 तकरबाद ओकर चेलासबमेसे दुइगोरे यरुसलेमसे गाम दिसन ज्यारहल छेलै। तै बखत येसु उसबके बिचमे दोसर रुपमे परगट भेलै। 13 तब ओहोसब आइबके यि बात चेलासबके सुनाइल्कै महज तैयो नै उसबके बिस्बास भेलै। 14 अन्तमे जब एगारहो चेलासब बैठके खान-पिन करैतरहै तहै बखत येसु ओइसबके बिचमे परगट भेलै। उसबके अबिस्बास आ कठोर हिरदयके कारन येसु उसबके खिस्याइल्कै। कथिलेत उ मरके जिबित भ्याल ओकरा देखैबला सबके बातमे उसब बिस्बास नै करने रहै। 15 तब येसु उसबके कहल्कै, “जो आ सरा सन्सारमे ज्याके सरा सिरिस्टीके सब लोकसबके सुसमाचार परचार कर! 16 बिस्बास करैबला आ बप्तिस्मा लैबलासब उदार पाबतै। महज बिस्बास नै करैबलासब दोसी ठहरतै। 17 तब बिस्बास करैबलासब यि काम करतै- उसब हमर नाममे भुतसब भगाइतै, आन भसासब बोल्तै, 18 उसब आपन हाथसे साँपसब पकरतौ आ कोनो परकारके बिखो पिलेतै त तैयो कोनो नोक्सान नै हेतै। तब रोगी-बिमारीसब उपर आपन हाथ राख्तौ आ उसब निक हेतौ।” 19 तकरबाद परभु येसु ओइसबसङे बोइल लेलाकेबाद स्वरग दिसन उठ्यालगेलै आ परमेस्वरके देहनाकात बैठलै। 20 तब चेलासब सब ठामसबमे ज्याके परचार करल्कै। परभु उसबके मदत करल्कै आ अचममे कामसबसे ओकरासबके बचनमे सत छै कैहके ठहरेल्कै।] |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.