मरकुस 12 - मध्य पुरविया थारूमालिक आ बटिदारसबके खिसा ( मती २१:३३-४६ , लुका २०:९-१२ ) 1 तब येसु उसबके एकटा खिसा कहल्कै, “एकटा लोक अङगुरके खेती करल्कै आ चारुकातसे ओकरा घेरल्कै। अङगुरके रस जम्मा करैके लेल एकटा खाइध खुइनके कोल्हु बनाइल्कै। ओहैमे एकटा मचानो बनाके अङगुरके बारी बटिदारसबके जिम्मा द्याके अपने बिदेस चैलगेलै। 2 “जब अङगुर पाकैके समय एलै तब अङगुर लैले मालिक आपन एकटा नोकरके पठाइल्कै। 3 महज बटिदारसब ओकरा पकैरके मारपिट कैरके छुच्छे हाथ पठादेल्कै। 4 मालिक फेनो दोसर नोकरके पठाइल्कै, महज बटिदारसब ओकरो कपार फोरके बेजत करल्कै। 5 तब मालिक तेसर नोकरके पठाइल्कै महज उसब ओकरा जानसे मारदेल्कै। तहिनङे बहुत नोकरसबके पठाइल्कै, उसब ककरो मारपिट करल्कै त ककरो जानसे मारदेल्कै। 6 अन्तमे ओकर आपन एकलौता बेटा मातरे रैहगेलै। ‘उसब त हमर बेटाके पक्के आदर करतै’ कैहके सबसे पछा बटिदारसबलग पठाइल्कै। 7 महज बटिदारसब ओकरा देखैत मातर आपसमे बात करे लाग्लै, ‘यि त हकबला चियौ। चल, अपनासब अकरा मारदहै तब अकर सब सम्पती आपनौरके भ्याजेतौ।’ 8 तब बटिदारसब ओकरा पकैरके माइर देल्कै तब ओकर लहासके अङगुर खेतसे बाहर निकालके फेकदेल्कै।” 9 तब येसु पुछल्कै, “आब अङगुर खेतके मालिक ओइसबके कथी करतै? उ आइबके बटिदारसबके माइरदेतै आ अङगुर खेत दोसर लोकसबके ददेतै। 10 तुसब पबितर धरमसास्तरमे नै पढनेचिही? ‘जै पथलके घर बनाइबला मिसतिरीसब छाइट देल्कै, सेह्या जगके मुल खम्हा बन्लै, 11 यि काम परमेस्वर करने छै आ अपनासबके नजरमे आस्चरजके छै।’” 12 तैल्याके मुख पुजारीसब, सास्तरीसब आ अगुवासब येसुके पकरैले ताकैछेलै, कथिलेत यि खिसा हमरेसबके बिरोधमे कैहरहल छै से बुझल्कै। महज भिरके लोकसबसे डराबैके कारन ओकरा छोइरके चैलगेलै। बटीके बारेमे परस्न ( मती २२:१५-२२ , लुका २०:२०-२६ ) 13 तब कुछ फरिसीसब आ हेरोद रजाके दलके लोकसब येसुके फसाइले एलै। 14 उसब येसु लग आइबके कहल्कै, “गुरु जी, हमसब जानैचियै कि, अहाँ सहि बात बोलैचियै आ ककरो पक्छपात नै करैचियै। अहाँ त परमेस्वरके सत-सत बात सिखाइचियै। आब हमरासबके कहु, हमसब कैसरके कर तिरबै से उचित छै कि नै?” 15 तब येसु उसबके कपटी बिचार बुइझके कहल्कै, “तुसब कथिले हमरा फसाइले चाहैचिही? हमरा एकटा डलर देखा।” 16 उसब एकटा डलर आनल्कै। तब येसु उसबके कहल्कै, “अइमे ककर चेहरा आ नाम लिखल छै?” उसब कहल्कै, “कैसरके।” 17 तब येसु उसबके कहल्कै, “तै खातिर जे कैसरके चियै से कैसरके दहै आ जे परमेस्वरके चियै से परमेस्वरके दहै।” यि बात सुइनके उसब आस्चरजमे परलै। जि उठैके परस्न ( मती २२:२३-३३ , लुका २०:२७-४० ) 18 मैरके जि उठैबला उपर बिस्बास नै करैबला कुछ सदुकीसब येसु लग एलै आ येसुके पुछल्कै, 19 “गुरु जी, मोसा हमरासबके लेल बेबस्थामे लिखदेने छै, कि कोनो लोकके भैया निपुतरे आपन घरबालीके छोइरके जेतै त, ओकर भाइ आपन भौजीसे बियाह कैरके भैयाके बंस खरा करे परैछै। 20 आब एकटा परिबारमे सात भाइके भैयारी छेलै। जेठकाके बियाह करल्कै आ उ निपुतरे मरगेलै। 21 तब मैझला आपन भौजीसे बियाह करल्कै आ ओहो बिना धियेपुतेके मरगेलै। सैझलो ओकरसे बियाह करल्कै महज ओहो धियापुता नै जलमाके मरलै। 22 तहिनङे सातो गोरे ओकरसे बियाह करल्कै आ धियापुता नै जलैमके सबकोइ एक-एक कैरके मरगेलै। अन्तमे ओहो जनी मरगेलै। 23 आब कहु, ओइ समयमे जहिया मरलहासब जिके उठतै त, ओकरासबमेसे उ जनी ककर घरबाली हेतै? कथिलेत उ सातो गोरासे बियाह करने छेलै।” 24 तब येसु उसबके कहल्कै, “तुसब भरममे परलचिही, कथिलेत तुसब नै त पबितर धरमसास्तर जानैचिही, नै त परमेस्वरके सक्तीके? 25 कथिलेत, जब उसब जिके उठतै, नै उसब बियाह करेतै, नै उसबके बियाह हेतै, महज उसब त स्वरगके स्वरगदुतसब जखा हेतै। 26 कि तुसब जि उठैके बारेमे मोसाके किताबमे नै पढनेचिही? से बात जरैत पोथराके घटनामे परमेस्वर मोसाके कहल्कै, ‘हम अबराहमके परमेस्वर, इसहाकके परमेस्वर आ याकुबके परमेस्वर चियौ।’ 27 तै खातिर उ मरल लोकसबके परमेस्वर नै महज जिबितसबके परमेस्वर चियै! साच्चे तुसब बहुत बरका भरममे परलचिही।” महान आग्या ( मती २२:३४-४० , लुका १०:२५-२८ ) 28 एक गोरे धरमगुरु ओते एलै आ एक-दोसरमे बताबती कैररहल सुनल्कै। येसु लोकसबके ठिक जबाफ देल सुइनके ओकरा कहल्कै, “हे गुरु जी, सब आग्यासबमेसे महान आग्या कोन चियै?” 29 तब येसु ओकरा जबाफ देल्कै, “सबसे महान आग्या एह्या चियै, ‘हे इजराएलके बासिसब सुन, परमपरभु अपनासबके परमेस्वर एकेटा परमेस्वर चियै। 30 तु परमपरभु आपन परमेस्वरके सरा हिरदयसे, सरा परानसे, सरा समझसे आ सरा सक्तिसे परेम कर।’ 31 आ दोसर बरका आग्या यि चियै ‘आपन परोसियाके आपने जखा परेम कर।’ अइसे कोनो बरका आग्या नै छै।” 32 तब उ सास्तरी येसुके कहल्कै, “गुरु जी, अहाँ ठिके कहैचियै, परमेस्वर एकेटा छै आ ओकर बाहेक औरो कोइ नै छै। 33 ओकरा आपन सरा हिरदयसे, सरा समझसे आ सरा सक्तिसे परेम करनाइ तब आपन परोसियाके आपने जखा परेम करनाइ सब होमबली आ बलिदानसबमे सबसे महान छै।” 34 ओकर बुधिमानी जबाफ सुइनके येसु कहल्कै, “तोहे परमेस्वरके राजसे दुर नै चिही।” ओकरबाद औरो परस्न पुछेके ककरो हिम्मत नै भेलै। खिरिस्ट ककर बेटा ( मती २२:४१-४६ , २३:१-३६ , लुका २०:४१-४७ ) 35 तब येसु मन्दिरमे सिखाइत खिना कहल्कै, “खिरिस्ट दाउदके बेटा चियै से धरमगुरुसब कनङके कहैछै? 36 जबकि दाउद आपने पबितर आत्मासे कहनेछै, ‘परमपरभु हमर परभुके कहल्कै, तु हमर दहिना हाथ कता बैठ, जाबेतक हम तोहर दुस्मनसबके तोहर टाङके खराम नै बनाइबौ।’ 37 जब दाउद आपने खिरिस्टके परभु कहैछै त, उ कनङके ओकर बेटा भेलै?” तब ओतेका सब लोकसब ओकर बचन खुसीसे सुनैछेलै। 38 येसु फेनो कहल्कै, “धरमगुरुसबसे होसियार रह! कथिलेत उसब लाम-लाम बस्तर पिन्हके घुमैले आ बजारसबमे सलामी खोजैबला, 39 या सभाघरसबमे आ भोज-भतेरमे आदरके ठामसबमे बैठैले ताकैछै। 40 उसब बिधुवासबके घर हरैप लैछै आ देखाबटी बरका-बरका परथना करैछै। साच्चे एहेन लोकसब बेसीसे कठोर सजाय पाबतै।” बिधुवाके भेटी ( लुका २१:१-४ ) 41 तब येसु मन्दिरके दान बाकस लग बैठ्लै आ लोकसबके आपन-आपन दान बाकसमे राखैत देखल्कै। बहुत धनिक लोकसब बहुत पैसाकौरी चरहेल्कै। 42 महज ओते एकटा गरिब बिधुवा तामके दुइगो डलर दान करल्कै, जकर मोल एको पैसासे कम छेलै। 43 तब येसु चेलासबके आपनलग बोलाके कहल्कै, “साच्चे हम तोरासबके कहैचियौ, यि गरिब बिधुवा औरो लोकसबसे बेसी दान करने छै। 44 कथिलेत औरो लोकसब बेसी भेल उबरल-पुगरलमेसे दान करने छै महज यि बिधुवा त आपन जिबन चलाइबला सरा कमाइ चरहाइने छै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.