मरकुस 10 - मध्य पुरविया थारूछोरपतरके बारेमे येसुके सिक्छा ( मती १९:१-१२ ) 1 तब येसु उ ठाम छोइरके यरदन लदीके ओइपार यहुदियाके इलाकामे गेलै। बहुत लोकसबके भिर ओकरलग एलै आ उ आपन आदत अनुसार ओइसबके फेनो सिक्छा दैले लाग्लै। 2 तब कुछ फरिसीसब येसुके ओकरे बातमे फसाइले ताकैछेलै आ ओकरा पुछल्कै, “कोनो बियाह भेल लोक आपन घरबालीसे छोरपतर करनाइ उचित छै कि नै?” 3 येसु उसबके जबाफदैत कहल्कै, “तोरासबके मोसा कथी आग्या देनेछेलौ।” 4 उसब कहल्कै, “यि समबन्धमे मोसा त एकटा छोरपतरके नालिस लिखके आपन घरबालीके छोरपतर करैले अनुमति देनेरहै।” 5 महज येसु उसबके कहल्कै “तोरासबके कठोर मन भेलाके खातिर यि आग्या देनेछेलौ। 6 महज परमेस्वर सुरुवेसे लोकके मरद आ जनी कैरके उसबके सिरिस्टी करने रहै। 7 अहैकारनसे लोक आपन बाप-महताइरके छोरैछै आ आपन घरबालीसङे मिलल रहैछै, 8 आ उ दुनुगोरा एके देह हैछै। आबसे उसब दुइ नै महज एके देह हैछै। 9 तैल्याके जकरा परमेस्वर एकसाथ जोरने छै, तकरा लोकसब नै छुटाबे।” 10 जब उसब घर घुइमके एलै तब चेलासब फेनो ओहैके बारेमे येसुके पुछल्कै। 11 येसु उसबके कहल्कै, “जे आपन घरबालीके छोइरके दोसरसे बियाह करैछै, उ लोक आपन घरबालीके बिरोधमे बेबिचार करैछै। 12 तहिनङे जे कोनो जनी आपन घरबलाके छोइरके दोसरसे बियाह करैछै, ओहो बेबिचार करैछै।” येसु छोट बच्चासबके आसिरबाद देल्कै ( मती १९:१३-१५ , लुका १८:१५-१७ ) 13 तब लोकसब आपन धियापुतासबके उपर हाथ राइखके आसिरबाद देबे से बिचार कैरके येसु लग आनल्कै। महज यि देखके चेलासब ओइसबके खिस्याइल्कै। 14 तब यि देखके येसु खिस्याके आपन चेलासबके हपारल्कै आ कहल्कै, “छोट बच्चासबके हमरलग आबैले नै रोकै, कथिलेत परमेस्वरके राज ओहनेसबके चियै। 15 साच्चे हम तोरासबके कहैचियौ, जे एकटा बच्चा जखा परमेस्वरके राजके गरहन नै करतै त उ कहियो नै परमेस्वरके राज भितर ढुकैले सक्तै।” 16 तब येसु बच्चासबके कोरामे ल्याके ओइसबके उपर आपन हाथ राइखके आसिरबाद देल्कै। धनिक लोक ( मती १९:१६-३० , लुका १८:१८-३० ) 17 जब येसु रस्तामे जाइछेलै तब एकटा लोक दौरके ओकर अगा एलै आ ठेङहुनिया दैत कहल्कै, “हे असल गुरु जी, अनन्त जिबन पाबैले हमरा कथी करेपरतै?” 18 येसु ओकरा कहल्कै, “हमरा कथिले असल गुरु कहैचिही? परमेस्वर बाहेक कोइ नै असल छै। 19 तु त आग्यासब जान्बे करैचिही- हतिया नै कर, बेबिचार नै कर, चोरी नै कर, झुठा साक्छी नै दहै आ आपन माँ-बाबुके आदर कर।” 20 उ जबाफ देल्कै, “गुरु जी, यि आग्यासब त हम छोटेसे पालन कैरते आबैचियै।” 21 तब येसु ओकर दिसन ताइकके परेमसे कहल्कै, “तोहरमे एकटा औरो चिजके कमि छौ। तोहरसङे भेल्हा सब धन-सम्पती बेचके गरिबसबके बाइट दहै, तब स्वरगमे तोरा बहुत धन भेटतौ आ हमर पछा लाग।” 22 यि बात सुइनके उ लोक उदास भेलै आ दुखी भ्याके चैलगेलै, कथिलेत उ बहुत बरका धनिक छेलै। 23 तब येसु चारुदिसन ताइकके आपन चेलासबके कहल्कै, “धनिक लोकसबके परमेस्वरके राजमे आबैले बहुत कठिन हैछै।” 24 यि बात सुइनके चेलासब आस्चरजमे परलै महज उसबके येसु फेनो कहल्कै, “हे बालकसब! परमेस्वरके राजमे आबैले कतेक कठिनछै! 25 धनिक लोक परमेस्वरके राजमे आबैसे त बरु उंट टिपनीके नाथिमे ढुकैले असान हैछै!” 26 उसब औरो आस्चरजमे परके येसुके कहल्कै, “तब के उदार पाबतै त?” 27 तब येसु उसबके ताकैत कहल्कै, “जे काम लोकके लेल असम्भब छै महज परमेस्वरके लेल नै, कथिलेत परमेस्वरके लेल सबकुछ सम्भब छै।” 28 पतरुस ओकरा कहल्कै, “देखु, हमसब त आपन घर-दुवार सब चिज छोइरके अहाँके पछा लग्लेचियै।” 29 येसु कहल्कै, “साँचोके हम तोरासबके कहैचियौ, जे हमरा आ सुसमाचारके खातिर आपन घरदुवार, माँ-बाबु, बेटा-बेटी, भाइ-बहिन आ जगहा-जमिन छोरतै, 30 तकरा सताबटके साथ-साथे अहै युगमे सय गुना बेसी घरदुवार, माँ-बाबु, बेटाबेटी, भाइ-बहिन आ जगहा-जमिन भेटतै। तब आबैबला युगमे अनन्त जिबन मिल्तै। 31 जेसब अखन अगा छै, उ पछा हेतै आ जेसब अखन पछा छै उसब अगा हेतै।” तेसर बेर आपन मिरतु बारेमे येसुके चरचा ( मती २०:१७-१९ , लुका १८:३१-३४ ) 32 येसु आ ओकर चेलासब यरुसलेम दिसन ज्यारहल छेलै आ अगा-अगा येसु बरहैत ज्यारहल छेलै। चेलासब आस्चरजचकित रहै आ पछा-पछा आबैबलासब डराएल रहै। बारहो चेलासबके येसु फेनो अलग लज्याके ओकरासबके बुझादेल्कै जे आपन उपर हैबला घटनाके बिसयमे ओइसबके सुनाइल्कै। 33 येसु कहल्कै, “सुन, अपनासब यरुसलेम दिसन जाइचियै। ओते मानबके बेटाके मुल पुजारी आ धरमगुरुसबके जिम्मा लगेतौ। उसब ओकरा मिरतुदन्डके लेल दोसी ठहरेतै आ आनजातसबके हाथमे सोप देतै। 34 तब उसब ओकरा हसी उराइत, ओकरा थुक्तौ आ ओकरा कोरासे पिटतौ आ माइर देतौ। महज तिन दिनके बाद उ फेनो जिबित भ्याके उठतौ।” याकुब आ युहन्नाके बिन्ती ( मती २०:२०-२८ ) 35 जब्दियाके दुनु बेटा याकुब आ युहन्ना येसु लग आइबके कहल्कै, “गुरु जी, हमरासबके इक्छाछै, हमसब अहाँसङे जे माङैचियै से हमरासबके खातिर कैरदिय।” 36 येसु ओइसबके पुछल्कै, “तोरासबके इक्छा कथी छौ, जे हमरसे कराबैले चाहैचिही?” 37 उसब जबाब देल्कै, “अहाँके महिमीत राजमे हमरासबमेसे एक गोराके देहना कातमे आ दोसरके आपन बमा कातमे बैठेके मन्जुरी दिय।” 38 महज येसु ओइसबके कहल्कै, “तुसब कथी माङैचिही से तुसब नै जानैचिही। जे दुखके बाटी हम पियैचियै, से तुसब पिए सकबिही? या जे बप्तिस्मा हम लेनेचियै, उ बप्तिस्मा तुसब लेबे सकबिही?” 39 उसब जबाब देल्कै, “हँ हमरौरके सक्बै।” ओइसबके येसु कहल्कै, “जे दुखके बाटी हम पियैचियौ उ तुसब पिब्ही आ जे बप्तिस्मा हम लेनेचियौ उ बप्तिस्मा तुहेसब लेब्ही। 40 महज आपन देहना कात आ बमा कात बैठाबैके अधिकार हमरा नै छै। परमेस्वर यि ठाम जैसबके खातिर तैयार कैररहलछै, उ ओइसबके खातिर चियै।” 41 जब यि बात बाकी दसो चेलासब सुनल्कै तब उसब याकुब आ युहन्नाके खिस्येलै। 42 तब येसु ओइसबके आपनलग बोल्याके कहल्कै, “तोरौरके जानैचिही कि आनजातमे सासन करैबलासब मनमानी करैछै आ पैध लोकसब ओकरासबके उपर अधिकार जमाबैछै। 43 महज तोरासबमे एहेन नै हेतौ, जे तोरासबमेसे पैध हैके इक्छा करतौ, ओकरा तोरेसबके सेबक हेबेपरतै। 44 तब तोरासबमेसे जे बरका हैके इक्छा करतौ, ओकरासबके दास हेबेपरतै। 45 कथिलेत मानबके बेटा सेबा लैले नै, महज सेबा करैले आ बहौत लोकके छुटकाराके दामके खातिर आपन परान दैले एलछै।” अन्हरा बारतिमै ( मती २०:२९-३४ , लुका १८:३५-४३ ) 46 तब येसु चेलासबसङे यरिहो सहरमे पुग्लै। येसु आपन चेलासब आ एकटा बरका भिरके साथ यरिहोसे निक्लै बखत रस्ताके कातमे तिमैके बेटा बारतिमै नामके अन्हरा भिखमङा बैठल छेलै। 47 जब उ भिखमङा नासरतके येसु आइबरहल छै सुनल्कै तब उ जोरसे हल्ला करैत कहल्कै, “हे येसु, दाउदके पुतर, हमर उपर दया करु!” 48 बहुत लोकसब ओकरा चुप हो कैहके फटकारल्कै। महज उ औरो जोरसे कहेलाग्लै, “हे दाउदके पुतर, हमर उपर दया करु!” 49 तब येसु ठार भेलै आ कहल्कै, “ओकरा बोलाके अते आन!” उसब ओइ भिखमङा लोकके बोल्याके कहल्कै, “साहस कर, उठ येसु तोरा बोल्यारहलछौ।” 50 उ आपन ओढना फेकैत खुरखुराके उठलै आ येसु लग गेलै। 51 येसु ओकरा पुछल्कै, “तु कथी चाहैचिही? हम तोहर लेल कथी कैरदेबौ?” उ कहल्कै, “परभु, हम देखैले चाहैचियै।” 52 येसु ओकरा कहल्कै, “जो, तोहर बिस्बाससे तु निक भेल्ही।” तब उ तखुन्ते देखे लाग्लै आ परमेस्वरके परसन्सा करैत ओकर पछा लाग्लै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.