मरकुस 1 - मध्य पुरविया थारूबप्तिस्मा दैबला युहन्नाके परचार ( मती २:१-१२ , लुका ३:१-१८ , युहन्ना १:१९-२८ ) 1 परमेस्वरके बेटा येसु खिरिस्टके सुसमाचार अनङके सुरु हैछै। 2 यसैया अगमबक्ताके किताबमे एहेन लिखल छै, “देख, हम आपन दुतके तोहर अगा-अगा पठाइबौ, जे तोहर लेल रस्ता तयार करतौ।” 3 उजार जगहमे एकटा लोक जोरसे कहैछै, “परभु आबैबला रस्ता दुरुस कर, उ चलैबला रस्तासब सोझ कर!” 4 तहिनङे बप्तिस्मा दैबला युहन्ना लोकसबके बप्तिस्मा दैत उजार जगहमे देखा परलै। उ एहेन कैहके परचार करल्कै, “तुसब पस्चाताप कर आ बप्तिस्मा ले आ परमेस्वर तोरासबके पाप छमा कैरदेतौ।” 5 यहुदियाके पुरे इलाका आ यरुसलेम सहरके सबलोक निकैलके युहन्ना लग एलै आ आपन-आपन पाप माइनके उसब यरदन लदीमे बप्तिस्मा लेल्कै। 6 युहन्ना उंटके रुइयाँसे बन्याल बस्तर पिन्हैछेलै आ डारमे छलाके डरकसना बान्हैछेलै। तब उ फैनगा आ बोनके मौध खाइछेलै। 7 युहन्ना लोकसबके एहेन कैहके परचार करैछेलै, “जे हमरसे पछा एतौ उ हमरसे बरका छै आ हम निहुकके ओकर जुताके फितो तक खोलैके जोकर के नै चियै। 8 हम तोरासबके पानीसे बप्तिस्मा दैचियौ, महज उ तोरासबके पबितर आत्मासे बप्तिस्मा देतौ।” येसुके बप्तिस्मा आ परिक्छा ( मती ३:१३-४:११ , लुका ३:२१-२२ , ४:१-१३ ) 9 जब युहन्ना परचार कैर रहल छेलै तहै बखत येसु गालिलके नासरतसे एलै आ युहन्नासे उ यरदन लदीमे बप्तिस्मा लेल्कै। 10 येसु पानीसे बाहर निकलते मातर स्वरग उघरलै आ पबितर आत्मा पौरकीके रुपमे आपन उपर आबैत देखल्कै। 11 तब स्वरगसे एकटा एहेन अबाज एलै, “तु हमर दुलरुवा बेटा चिही, तोहरसे हम बहौत खुसी चियौ।” 12 पबितर आत्मा तखुन्ते येसुके उजार जगहमे ल्यागेलै। 13 येसु चालिस दिनतक उजार जगहमे रहलै तहै बखत सैतानसे उ परिक्छामे परलै। ओते जङली जानबरसब रहै आ स्वरगदुतसब आइबके ओकर सेबा-सुसार करल्कै। येसुके पहिन्का चेलासब ( मती ४:१८-२२ , लुका ५:१-११ , युहन्ना १:३५-४२ ) 14 जब युहन्ना जहलमे परलै तब येसु गालिल इलाकामे गेलै आ परमेस्वरके सुसमाचार परचार करल्कै। 15 उ एहेन कैहके परचार करल्कै, “आब समय आइबगेल छौ आ परमेस्वरके राज नजदिक एल छौ। तै खातिर आपन-आपन पाप माइनके पस्चाताप कर आ सुसमाचारमे बिस्बास कर।” 16 येसु गालिल तालके कातमे चलै बखत सिमोन आ ओकर भैया अन्दरियासके तालमे जाल फेकैत देखल्कै। कथिलेत उसब मलाह छेलै। 17 येसु उसबके कहल्कै, “हमर पछा लाग, आबसे हम तोरासबके माछ नै महज लोकसबके मलाह बनेबौ।” 18 तब उसब तखुन्ते आपन जालसब छोइरके येसुके पछा लाग्लै। 19 येसु कन्हिक दुर गेलाके बाद जब्दियाके बेटा याकुब आ ओकर भाइ युहन्नाके देखल्कै। उसब नाहमे बैठके जालसब तुनैत रहै। 20 येसु ओहोसबके तखुन्ते बोलाइल्कै आ उ सब आपन बाबु जब्दियाके आ ओकर कामदारकेसङे नाहेमे छोइरके ओकर पछा लाग्लै। भुत लागल लोक ( लुका ४:३१-३७ ) 21 तब उसब कफरनहुम सहरमे गेलै। पबितर बिसराम दिनमे येसु यहुदी सभाघरमे ज्याके सिक्छा दैले लाग्लै। 22 ओकर सिक्छा सुइनके ओतेका लोकसब छक्क परलै, कथिलेत उ धरमगुरुसब जखा नै महज अधिकारसे भरल लोक जखा सिखाइछेलै। 23 ओहै बखत सभाघरमे एकटा भुत लागल लोक छेलै। उ जोरसे चिच्याके कहल्कै, 24 “हौ, नासरतके येसु, अहाँके हमरासबसे कोन काम? अहाँ हमरासबके बरबाद करैले एलचियै? अहाँ के चियै से हमरा थाहछै, अहाँ परमेस्वरके पठेल्हा एकटा पबितर जन चियै।” 25 तब येसु ओकरा खिस्याके कहल्कै, “चुप हो! ओइ लोकसे बाहर निकैलजो!” 26 तखुन्ते ओइ लोकके भुत उठासुठाके पटैकके आ जोरसे हल्ला करैत बाहर निकैलके गेलै। 27 देखैबला सबलोक छक परलै आ आपनेमे बात करे लाग्लै, “यि केहन बचन चियै? यि केहन सक्ती आ अधिकार चियै, भुतोसबके आग्या करैछै त निकैल जाइछै।” 28 तब येसुके चरचा चारुदिसन गालिलके इलाकामे फैलगेलै। येसु बिमारसबके निक करल्कै ( मती ८:१४-१७ , लुका ४:३८-४१ ) 29 तुरन्ते उसब यहुदी सभाघरसे निकैलके सिमोन आ अन्दरियासके घरमे गेलै। उसबसङे याकुब आ युहन्नो गेलै। 30 तै बखत सिमोनके सौसके जर बोखार लागल छेलै आ येसु पुगते मातर यि बात उसब ओकरा सुन्यादेल्कै। 31 तब येसु ओकरलग गेलै आ ओकर हाथ पकैरके उठेल्कै। तखुन्ते जर बोखार ओकरा छोरल्कै आ उ ओकरासबके स्वागत-सत्कार करल्कै। 32 रौद डुब्लाके बाद साँझमे बहुत किसिमके रोगी-बिमारीसब आ भुत लागल लोकसबके येसु लग आनल्कै। 33 पुरे सहरके लोकसब घरके अङनामे भिर लागल छेलै। 34 येसु बहौत किसिमके रोगी-बिमारीसबके निक करल्कै आ भुतोसबके निकालल्कै महज उ खिस्याके भुतसबके बोले नै देल्कै कथिलेत उसब ओकरा चिन्हैछेलै। सुनसान जगहमे येसुके परथना ( लुका ४:४२-४४ ) 35 भिन्सरे येसु उइठके सुनसान जगहमे ज्याके परथना करल्कै। 36 तब सिमोन आ ओकर सङिसब मिलके येसुके खोजैले गेलै। 37 येसु भेटलाकेबाद उसब कहल्कै, “परभु अहाँके सबकोइ खोइजरहल छै!” 38 यि बात सुइनके येसु उसबके कहल्कै, “या, अपनासब मिलके आसपासके गामसबमे चल। ओहो ठामसबमे हमरा सुसमाचार सुनाइले परतै, कथिलेत अहै कामके लेल हम एलचियै।” 39 तब येसु पुरे गालिल इलाकामे घुम्लै आ सभाघरसबमे सिक्छा दैत आ लोकसबसे भुतसब निकालैत गेलै। कोढि-कुस्टी लागल लोक ( मती ८:१-४ , लुका ५:१२-१६ ) 40 एकटा कोढि-कुस्टी लागल लोक येसु लग एलै आ ठेङहुनिया दैत कहल्कै, “अहाँ चाहबै त हमरा कोढि-कुस्टीसे निक कैरसकैचियै।” 41 यि सुइनके येसुके दया लाग्लै आ ओकर उपर आपन हाथ राइखके कहल्कै, “हम चाहैचियौ, तु निक भ्याजो।” 42 तखुन्ते कोढि-कुस्टी लागल लोक निक भ्यागेलै। 43 तब येसु ओइ लोकके करा आग्या द्याके पठेल्कै आ कहल्कै, 44 “देख, यि बात तु ककरो नै कहिहे, महज ज्याके पुजारीके देखा तब मोसाके नियम अनुसार लोकसबके निक भेल परमान देखाइके लेल भेटी चरहा।” 45 महज उ लोक बाहर निकैलके गेलै आ अपना निक भेल बात चारुदिसन परचार करे लाग्लै। तैल्याके येसु फेनो उ सहरमे लोकसबके अगा खुलस्त रुपमे आबैले नै सक्लै महज उ सुनसान जगहमे रहेलाग्लै। तैयो लोकसबके भिर चारुदिसनसे ओकरलग एलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.