मतीके लिखल सुसमाचार 6 - मध्‍य पुरविया थारू

दान-धरमके बारेमे सिक्‍छा

¹ येसु चेलासबके कहैतगेलै, “होसियार रह, लोकसबके देखाबैलै धरम-करम तुसब नै कर। नै त स्‍वरगमे रहैबला पितासे तोरासबके कोनो इनाम नै भेटतौ।

² “जब तुसब दान दैचिही त, आपनेसे ढोल नै पिट, जनङ कपटीसब सभाघरसब आ रस्‍तामे लोकसबसे आपन परसन्‍सा पाबैले करैछै। साँचे हम तोरासबके कहैचियौ, ओइसबके आपन इनाम भेटगेलछै।

³ महज जब तु दान दैचिही, तोहर देहना हाथ कथी कैर-रहलछै से बमा हाथके थाह नै हेबे।

⁴ तोहर दान गुप्‍तमे हेबे आ सब चिज देखैबला परमेस्‍वर तोरा इनाम देतौ।

परथनाके बिसयमे सिक्‍छा

⁵ “जब तुसब परथना करैचिही त, तखुन कपटी जखा नै बन, कथिलेत उसब सभाघरसबमे आ रस्‍ताके कात-करौतके लोकसब देखे कैहके ठरा भ्‍याके परथना करैछै। साँचोके, हम तोरासबके कहैचियौ, उसबके आपन इनाम मिलगेलछै।

⁶ महज जब तुसब परथना करैचिही त, आपन भितरी कोठलीमे जो आ केबार लग्‍याके आपन पिता जकरा कोइ नै देखेसकैछै तकरसे परथना कर। जे गुप्‍तमे करल काम देखैछै ओह्‍या पिता तोरा इनाम देतौ।

⁷ “परथना करैतखिना तुसब गैर-यहुदीसब जखा बेकारमे बर-बराइत नै रह। कथिलेत बहौत बात बजलासे ओकर परथनाके सुनबाइ हैछै से बातके उसब बिचार करैछै।

⁸ अहैलेल तुसब ओकरासबके जखा नै हो। कथिलेत तोरासबके पिता तोरासबके माङैसे पैहनैये बुझ्‍हैत रहैछै, कि तोरासबके कोन-कोन चिज चाही।

⁹ तुसब अनङके परथना कर- ‘हे स्‍वरगमे रहैबला हमरासबके परमेस्‍वर पिता, अहाँके नामके आदर हेबे।

¹⁰ अहाँके राज आबे, अहाँके इक्‍छा जनङ स्‍वरगमे छै, तैहनङे पिरथिबीयोमे पुरा हेबे।

¹¹ हमरासबके आइके भोजन दिय।

¹² हमरासबके अपराध छमा करु, जनङ हम्‍हुसब आपन अपराधीसबके छमा करनेचियै।

¹³ हमरासबके पापमे फसाइबला बातसबसे दुर राखु आ दुस्‍टसे बचाबु। [कथिलेत राज, पराकरम आ महिमा जुगो-जुग तक अहैके चियै, आमेन।’]

¹⁴ “यदि तुसब लोकसबके अपराध छमा करबिही त स्‍वरगमे रहैबला पिता ओहो तोरोसबके अपराध छमा करतौ।

¹⁵ महज तुसब लोकसबके अपराध छमा नै करबिही त ओहो तोरासबके अपराध छमा नै करतौ।

उपासके बारेमे सिक्‍छा

¹⁶ “जब तुसब उपास बैठैचिही तब कपटी जखा उदास चेहरा नै देखा। कथिलेत लोकसबके उपास बैठल देखाइले उसब आपन मुह मलिन करने रहैछै। साँचे हम तोरासबके कहैचियौ, ओकरासबके मिलैबला पुरे इनाम मिलगेलछै।

¹⁷ महज तु उपास बैठैत खिना मुरीमे तेल लगा आ आपन हाथ-मुह धुवा।

¹⁸ तोहर उपास लोकसबके खातिर नै, महज गुप्‍तमे रहैबला तोहर पिता देखे आ सब चिज देखैबला परमेस्‍वर तोरा इनाम देतौ।

स्‍वरगके धन-सम्‍पतीके बारेमे सिक्‍छा

¹⁹ “आपन खातिर पिरथिबीमे धन-सम्‍पती नै ढेरिया, जते ओकरा किरा आ बिज लाइगके नास कैरदैछै। जते चोरसब सिन कोइरके ओकरा चोरालैछै।

²⁰ बरु आपन खातिर स्‍वरगमे धन-सम्‍पैत ढेरिया, जते नै किरा, नै घुन लाइगके नास हेतौ, नै त चोरे सिन काइटके चोराइले सक्‍तौ।

²¹ कथिलेत जते तोहर धन रहतौ, ओतै तोहर मन रहतौ।

²² “आँख देहके लेल डिबिया चियै। यदी तोहर आँख असल छौ त तोहर पुरे देह इजोत हेतौ।

²³ महज तोहर आँख खराब छौ त, तोहर पुरे देह अन्‍हार भ्‍याजेतौ। अहिनङे तोहर भितरके इजोत अन्‍हार हेतौ त, उ केहन अन्‍हार खोट-खोट हेतौ।

²⁴ “दुइटा मालिकके सेबा कोइ नै करे सकैछै। कथिलेत उ एकटाके घिरना करतै आ दोसरसे परेम करतै। उ एकटाके मान-दान करतै आ दोसरके खराब समझतै। तुसब परमेस्‍वर आ धन दुनुके सेबा करे नै सकबिही।

चिन्‍ता नै कर

²⁵ “अहै खातिर हम तोरासबके कहैचियौ, ‘आपन परानके लेल कथी खेबै आ कथी पिबै’ आपन देहके खातिर ‘कथी पिन्‍हबै’ कैहके फिकिर नै कर।” कि खाइ-पियैसे परान आ बस्‍तरसे देह बेसी मोलके नै हैछै?

²⁶ अकासमे उरैबला चिरै-चुरगुनसबके देख। नै त उसब छिटैछै, नै कटनी करैछै, नै बखारीमे अन राखैछै, महज तैयो स्‍वरगके पिता ओइसबके खियाबैछै। कि तुसब ओइसबसे बेसी मोलके नै चिही?

²⁷ तोरासबमेसे के एहेन छै जे चिन्‍ता कैरके आपन औरदामे एकोरति थपे सकैछै?

²⁸ “बस्‍तरके खातिर तुसब कथिले फिकिर करैचिही? चौरीमे फुल्‍याल फुलासबके देख, उसब कनङके फुलाइछै। नै त उसब खटैछै, नै पिन्‍हैले बस्‍तर बुनैछै।

²⁹ महज हम तोरासबके कहैचियौ, रजा सोलोमनके बहुतो धन-सम्‍पती रहितो पर आपनके फुलासब जखा सिङारैले नै सकल छेलै।

³⁰ जब परमेस्‍वर चौरीके घास, जे आइ छै काइलके आइगमे जराएल जेतै, तकरा अहिनङ सिङारैछै त, ए कमजोर बिस्‍बास करैबलासब कि तोरासबके औरो बेसीसे नै सिङगारतौ?

³¹ “अहै खातिर तुसब फिकिर नै कर, ‘जे हमसब कथी खेबै? कथी पिबै? आ कथी पिन्‍हबै?’

³² कथिलेत गैर-यहुदीसब यि सबचिज ताकैछै, महज तोरासबके पिता जे स्‍वरगमे रहैछै, उ तोरासबके यि सब चिज चाही से जानैछै।

³³ महज सबसे पैहने ओकर राज आ धारमिकताके खोजि कर तब उ सबचिज तोरासबके खातिर औरो बेसीसे देतौ।

³⁴ काइलके खातिर चिन्‍ता नै कर, कथिलेत काइलके दिन आपन फिकिर आपने करतै। आइके दुख आइके लेल बहौत छै।”