मतीके लिखल सुसमाचार 5 - मध्य पुरविया थारूआसिस आ सराप ( लुका ६:२०-२३ ) 1 लोकसबके बहौत बरका भिर देखके येसु पहार उपरमे गेलै आ ओते बैठलै, तकरबाद चेलासब ओकरलग एलै। 2 तब येसु ओइसबके सिक्छा देबे लाग्लै: 3 धैनके चियै आपनके आत्मिक रुपमे कमजोर बुझैबलासब, कथिलेत स्वरगके राज ओहिनेसबके चियै। 4 धैनके चियै सोक करैबलासब, कथिलेत ओइसबके सान्ती मिल्तै। 5 धैनके चियै नरम स्वभाब भेल्हालसब, कथिलेत उसब पिरथिबीमे अधिकार करतै। 6 धैनके चियै धारमिकताके खातिर भुखल-पियासलसब, कथिलेत उसब अघाइतै। 7 धैनके चियै दया करैबलासब, कथिलेत उसब दया पाबतै। 8 धैनके चियै सुध हिरदयबलासब, कथिलेत उसब परमेस्वरके देखतै। 9 धैनके चियै मेल-मिलाप कराइबलासब, कथिलेत उसब परमेस्वरके बेटा-बेटी कहाइतै। 10 धैनके चियै धारमिकताके खातिर सताबट भोगैबलासब, कथिलेत स्वरगके राज ओहिनेसबके चियै। 11 “धैनके चिही तुसब, जब लोकसब हमर खातिर तोरासबके अपमान करतौ, सताइतौ आ झुठ बाइज-बाइजके तोरासबके बिरोधमे सब तरहके अधलाह बात कहतौ। 12 तब खुसी आ आनन्द मना, कथिलेत तोरासबके खातिर स्वरगमे बरका इनाम राखल छौ। अहिनङे तोरासबसे पहिनेके अगमबक्तासबके उसब सताइने रहै। नोन आ इजोत ( मरकुस ९:५० , लुका १४:३४-३५ , ११:३३ ) 13 “तुसब पिरथिबीके नोन चिही, महज नोनके सबाद उइरजेतै त फेनो कोन चिजसे नोनगर हेतै? उ त काम नै लागैबला भ्याके फेकलजेतौ आ लोकसब ओकरा आपन टाङसे धाङै बाहेक औरो कोनो कामके नै हेतौ। 14 “तुसब सन्सारके इजोत चिही। पहारमे रहल सहर घोसरैले नै सकैछै। 15 लोकसब डिबिया नेसके ढकियासे नै झापैछै, महज डैठमे राखैछै आ उ डिबिया घरमे रहैबला सबके खातिर इजोत दैछै। 16 अहिनङ तोरोसबके इजोत लोकसबके बिचमे चम्के, जहिनङ लोकसब तोरासबके असल काम देखके, स्वरगमे रहैबला पिताके परसन्सा करे।” बेबस्था पालन करैके बारेमे सिक्छा ( लुका १६:१७ ) 17 “मोसाके देल्हा बेबस्था आ अगमबक्तासबके बात रद करैले हम एलचियौ से नै समझ। हम उ रद करैले नै महज पुरा करैले एलचियौ। 18 कथिलेत साँचे हम तोरासबके कहैचियौ, जबतक स्वरग आ पिरथिबी खतम नै हेतै तबतक बेबस्थामे लिखल बात बिना पुरा भेने छोटसे छोट बुन्का ओकर एकोटा आछर तक नै बुताइतौ। 19 अहै कारन आग्यासबमेसे सबसे छोट आग्याके नै मान्तै आ लोकसबके ओहिनङ करैले सिखाइतै, से स्वरगके राजमे सबसे छोट कहाइतै। महज जे उ आग्यासब पालन करतै आ सिखाइतै, स्वरगके राजमे उ बरका कहाइतै। 20 कथिलेत हम तोरासबके कहैचियौ, तोरासबके धारमिक्ता धरमगुरुसब आ फरिसीसबसे बेसी नै हेतौ त तुसब कोनो भि हालतमे स्वरगके राजमे नै ढुकबिही। करोध आ हतियाके बारेमे सिक्छा 21 “पहिन्का समयके लोकसबके एहेन कहैत तुसब सुन्ने चिही, ‘हतिया नै कर आ जे हतिया करैछै उ सजायके भागिदार हेतै।’ 22 महज हम तोरासबके कहैचियौ, जे कोइ आपन भाइसे करोध करैछै, उ सजायके भागिदार हेतै, जे कोइ आपन भाइके अपमान करैछै, ओकरा धारमिक महासभामे जबाब देबे परतै। महज जे कोइ आपन भाइके सराप दैछै, उ नरकके आइगमे खसै जोकरके हेतै। 23 “तै खातिर यदी बेदीमे तोहे आपन भेटी चरहाइत खिना भाइ-बहिनके बिरोधमे तोहर हिरदयमे कुछो छौ से याद भेलौ त, 24 तोहर भेटी पैहने बेदीके कातमे राख आ जो। आपन भाइ-बहिनसे मेल कर आ तकरबाद आइबके भेटी चरहा। 25 “तोहर बिरोधी अदालत लजाइछौ त रस्तेमे मेल कैरले, नै त बिरोधी तोरा नियायधिसके जिमा लगेतौ आ नियायधिस सिपाहीके आ सिपाही तोरा जहलमे ढोइकदेतौ। 26 साँचे हम तोरासबके कहैचियौ। जबतक तु एक-एक पैसा चुक्ता नै करबिही तबतक अतेसे जाइले नै पाबबिही। बेबिचारके बारेमे सिक्छा 27 “तुसब एहेन कहने सुन्ने चिही, ‘बेबिचार नै कर।’ 28 महज हम तोरासबके कहैचियौ, जे कोइ कोनो जनीके गलत नजरसे देखैछै, त उ पैहनैये आपन मनमे ओकरसे बेबिचार कैरलेने रहैछै। 29 यदी तोहर देहना आँख पाप करैले लगाइछौ त ओकरा निकाइलके फेक दहै, कथिलेत तोहर सौसे देह नरकमे जाइसे बरु तोहर देहसे एकटा हटेनाइ असल हेतौ। 30 यदी देहना हाथ तोरा पाप करैले लगाइछौ त ओकरा काइटके फेक दहै। कथिलेत तोहर सौसे देह नरकमे जाइसे बरु तोहर देहसे एकटा हटेनाइ असल हेतौ। छोरपतरके बारेमे सिक्छा ( १९:९ , मरकुस १०:११-१२ , लुका १६:१८ ) 31 “एहेन कहलगेल छै, ‘जे आपन घरबालीके छोरैछै त, उ ओकरा छोरपतर लिखके देबे।’ 32 महज हम तोरासबके कहैचियौ, जे आपन घरबालीके बेबिचारके अलाबा छोरैछै, उ ओकरा बेबिचारिनी बनाइछै आ जे कोइ छोरल जनिसे बियाह करैछै, उ बेबिचार करैछै। किरिया आ सत्यताके बारेमे सिक्छा 33 “तुसब एहो सुन्नेचिही कि, परा-पुरुबकालके लोकसब कहने छेलै, ‘तु झुठ किरिया नै खो, महज परमपरभुके खातिर ख्याल किरिया पुरा कर।’ 34 महज हम तोरासबके कहैचियौ, किरिया खेबे नै कर। स्वरगके नाममे किरिया नै खो, कथिलेत उ परमेस्वरके सिंहासन चियै, 35 नै त पिरथिबीके नाम ल्याके, कथिलेत उ ओकर टाङ राखैबला पिरहिया चियै, नै त यरुसलेमके नामे ल्याके, कथिलेत उ महान रजाके सहर चियै। 36 आपन मुरीके किरिया नै खो, कथिलेत तु आपन एकोटा केसके नै उजर नै कारी बनाबे सकबिही। 37 तोरासबके कहल बचन ‘हँ’ त ‘हँ’ ‘नै’ त ‘नै’ मातरे कह। अकरसे बेसी बाजैचिही त उ सैतानसे आबैछै। बदलाके बारेमे सिक्छा ( लुका ६:२९-३० ) 38 “तुसब सुन्ने चिही, एहेन कहलगेल छेलै, ‘आँखके बदला आँख आ दाँतके बदला दाँत।’ 39 महज हम तोरासबके कहैचियौ, दुस्ट लोकके कुछो नै कर। कोइ तोहर देहना गालमे थपराइतौ त, ओकर सामने दोसरो गाल थैप दहै। 40 यदी कोनो लोक मुदा-मुकदमा कैरके तोहर कुरता लैले दाबी करैछौ त, ओकरा तु आपन ओरहैयो बला द्यादहै। 41 यदी कोइ तोरा एक कोस जबरजस्ती जाइले कहैछौ त, ओकरसङे दुइ कोस चैलके जो। 42 कोइ तोहरसे कुछो माङेछौ त ओकरा दहै, तोहर सङे कोइ पैचा माङैछौ त ओकरा दैले इन्कार नै कर। दुस्मन सङे परेम ( लुका ६:२७-२८ , ३२-३६ ) 43 “तुसब सुन्ने चिही जे अनङ कहलगेल छेलै, ‘आपन परोसियाके परेम कर आ आपन दुस्मनके घिरना कर।’ 44 महज हम तोरासबके कहैचियौ, आपन दुस्मनोसबसे परेम कर आ तोरासबके सताबैबलासबके खातिर परथना कर, 45 तब तुसब स्वरगमे रहैबला पिताके धियापुता हेब्ही। उ दुस्ट आ सज्जन दुनुके सुरुजके इजोत दैछै, तैहनङे धरमी आ पापी दुनु उपर पानी बरसाइछै। 46 यदी तोरासबके परेम करैबलाके मातरे परेम करैचिही त तोरा परमेस्वरसे कोन इनाम भेटतौ? कि करो उठाइबलासब ओइहनङे नै करैछै से? 47 आ तुसब आपन भाइ-बहिनसबके मातरे गोरलगी करैचिही त औरोसबसे बेसी कथी करलिही? कि गैर-यहुदीके लोकसब अहिनङ नै करैछै? 48 जनङ स्वरगमे रहैबला तोरासबके पिता सिध छौ, तोरोसबके ओहिनङे सिध हेबे परतौ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.