मतीके लिखल सुसमाचार 27 - मध्य पुरविया थारूयेसु पिलातसके जिमामे ( मरकुस १५:१ , लुका २३:१-२ , युहन्ना १८:२८-३२ ) 1 बिहानके मुख पुजारीसब आ अगुवासब एकमत भ्याके येसुके मारैके योजना बनेल्कै। 2 तब उसब ओकरा बाइन्हके लगेलै आ बडा हाकिम पिलातसके जिमा लगादेल्कै। यहुदा अपने फासी लटैकगेलै ( परेरित १:१८-१९ ) 3 येसुके मिरतुदन्ड द्याल बात सुइनके धोखा दैबला यहुदा इस्कोरियोतके पछुताबा भेलै। उ मुख पुजारीसब आ अगुवासब लग चानीके तिस डलर ल्याके गेलै, 4 आ कहल्कै “हम केहन पापी चियै, जे निरदोस लोकके मिरतुदन्डके लेल पकरादेलियै।” महज उसब कहल्कै, “यि बात तु आपने जान, ओइसे हमरासबके कोनो लेनादेना नै छौ।” 5 अहै कारन उ चानीके सब डलर मन्दिरमे फेकके चैलगेलै आ आपनेसे फासी लटैकके मैर गेलै। 6 मुख पुजारीसब चानीके डलर उठाके कहल्कै, “अकरा मन्दिरके खजानामे राखैले उचित नै हेतै, कथिलेत यि लोक मारैके लेल द्याल टका चियै।” 7 उसब सल्लाह कैरके ओइ टकासे बिदेसीसबके लहास गारैले कुम्हारसे एकटा खेत किनल्कै। 8 अहैलेल आइके दिनतक “लहुके खेत” कैहके कहैछै। 9 अहै तरहसे परमेस्वरके अगमबक्ता यरमियाके कहल यि बचन पुरा भेलै, “उसब तिस चानीके डलर लेल्कै, जे मोल इजराएलके लोकसब ओकरा उपर तोकने छेलै। 10 परभु हमरा जनङ कहने छेलै, तनङ ओइ टकासे कुम्हारके खेत किनल गेलै।” बडा हाकिमके सबाल आ येसुके जबाफ ( मरकुस १५:२-१५ , लुका २३:३-५ , १३-२५ , युहन्ना १८:२९-१९:१६ ) 11 जब येसु बडा हाकिमके अगा ठार भेलै, तब बडा हाकिम ओकरा पुछल्कै, “कि तु यहुदीसबके रजा चिही?” येसु ओकरा जबाफ देल्कै, “अहाँ अपने कैहरहल चियै त।” 12 जब येसु मुख पुजारीसब आ अगुवासब दोस लगेल्कै, तब उ ओइके कोनो जबाफ नै देल्कै। 13 तकरबाद पिलातस ओकरा कहल्कै, “तोरा उसब बहौत परकारके दोस लग्या रहल छौ कि तु नै सुनैचिही?” 14 महज येसु एकोटा बातके जबाफ नै देल्कै। यि बातसे बडा हाकिमके आस्चरज लाग्लै। 15 हरेक साल निस्तार पाबैनके अबसरमे बडा हाकिम लोकसबके मन मुताबिक एकटा कैदी छोइरदैछेलै। 16 ओहै समयमे घोर अपराध करैबला एकटा बारब्बा नामके लोक जहलमे बन्द छेलै। 17 जब भिर जम्मा भेलै तब बडा हाकिम पिलातस ओइसबके पुछल्कै, “तुसब कथी चाहैचिही? तोरासबके लेल हम ककरा छोइरदेबौ? बारब्बा के कि खिरिस्ट कहाइबला येसु के?” 18 पिलातस के यि बात मालुम भेलै कि धरमगुरुसब ओकरसे डाह करैके कारन पकराइने छै। 19 पिलातस नियाय आसनमे बैठल छेलै, तखनिए ओकर घरबाली ओकरा एहेन कैहके खबर पठेल्कै, “ओइ निरदोस लोकके कुछो नै करियौ! कथिलेकी आइ रात हम सपनामे ओकरे कारन बहुत दुख काटलियै।” 20 महज अते मुख पुजारीसब आ अगुवासब बारब्बाके छोइर दैले आ येसुके मारैले माङ करिहे कैहके लोकसबके सिखाइने छेलै। 21 बडा हाकिम पिलातस फेनो भिरके लोकसबके पुछल्कै, “यि दुनुगोरा मेसे ककरा हम तोरासबके लेल छोइरदेबौ से तुसब चाहैचिही?” उसब कहल्कै, “बारब्बा के!” 22 पिलातस ओइसबके कहल्कै, “तब अइ खिरिस्ट कहाइबला येसु के हम कथी करबौ त?” सबगोरा कहेलाग्लै, “अकरा कुरूसमे लटका।” 23 पिलातस पुछल्कै, “कथिले? यि कोन अपराध करने छै से?” महज अहैले लोकसब जोरजोरसे चिच्याइत कहेलाग्लै, “ओकरा कुरूसमे लटका!” 24 जखन पिलातस येसुके बचाइबला यि उपाय असफल हैत मातरे नै बल्की अइसे उपदरब मैच जेतै देखल्कै, तै डरसे पानी ल्याके भिरके अगा आपन हाथ धोवाइत कहल्कै, “अइ लोकके लहुके दोसी हम नै चियै। तुहिसब अइ बातके जिम्मेबार हेब्ही!” 25 भिरके सबलोक जबाफ देल्कै, “अकर लहुके दोस हमरासबमे आ हमरासबके बेटा-बेटीसबमे परे!” 26 तकरबाद उ बारब्बाके ओकरासबके लेल छोइरदेल्कै महज येसुके कोरासे पिटके कुरूसमे लटकाइले सिपाहीसबके जिमा लगेल्कै। सिपाहीसब येसुके गिल्ला करल्कै ( मरकुस १५:१६-२० , युहन्ना १९:२-३ ) 27 तकरबाद बडा हाकिमके सिपाहीसब येसुके राज महलमे ल्यागेलै आ पुरे पलटन ओकरा चारु कातसे घेरल्कै। 28 उसब येसुके पिन्हल बस्तर निकाइलके रजासब पिन्हैबला बैजनी रङके बस्तर पिन्हादेल्कै। 29 काँटसबके मुकुट बनाके ओकर मुरीमे पिन्हादेल्कै आ ओकर दहिना हाथमे लाठी पकरादेल्कै। तब ओकर अगा ठेङहुनिया द्याके मजाक उराइत कहेलाग्लै, “यहुदीसबके रजाके जय!” 30 उसब ओकरा थुकल्कै आ ओकर हाथसे देल लाठी ल्याके बहौत बेर मुरीमे मारल्कै। 31 उसब अनङके गिल्ला करलाके बाद ओकर देहसे बैजनी रङके बस्तर निकाइलदेल्कै। तकरबाद ओकर आपने बस्तर पिन्हाके ओकरा कुरूसमे लटकाइले ल्यागेलै। येसु कुरूसमे ( मरकुस १५:२१-३२ , लुका २३:२६-४३ , युहन्ना १९:१७-२७ ) 32 जाइते जाइते सिपाहीसबके कुरेनी निबासी सिमोन नाम भेल्हा लोक भेटलै आ उसब येसुके कुरूस ओकरा जबरजस्ती बोकैले लगाइल्कै। 33 तकरबाद उसब गलगथा कहैबला ठाममे एलै। (जकर अरथ खप्परबला जहग हैछै।) 34 ओते पुग्लाके बाद उसब येसुके तित दबाइ मिझराएल अङगुरके मध पियैले देल्कै, महज उ चिखलाके बाद पियैले नै चाहल्कै। 35 तब उसब येसुके हाथ-टाङमे काँटी ठोइकके कुरूसमे लटकेल्कै। ओकर बस्तर चिठा लग्याके बाइटलेल्कै। 36 तकरबाद उसब ओते बैठके ओकरा पहरा देबे लाग्लै। 37 ओकर मुरीके उपरमे दोसपतर लिखके टाइङदेल्कै जैमे एहेन लिखल छेलै, “यि येसु यहुदीसबके रजा चियै।” 38 ओते ओकरसङे दुइटा डाकुसबके सेहो एकटाके देहना कता आ दोसरके बमा कता कुरूसमे लटकादेल्कै, 39 ओइ रस्ताहैत जाइबला आपन मुरी हिला-हिलाके ओकर अपमान करल्कै 40 आ कहल्कै, “आरौ बा! तु मन्दिरके तोरैबला आ तिने दिनमे ओइके बनाइबला, आब कुरूससे निचा उतैरके या त आ आपने आपके बचा त।” 41 ओनाहिते मुख पुजारीसब, धरमगुरुसब आ अगुवासब सेहो गिल्ला करैत कहल्कै, 42 “यि त लोकसबके बचेल्कै महज आपनेके बचाइले नै सकैछै। इजराएलके रजा, आब कुरूससे निचा उतैरके आबौक तब न हमसब देखके बिस्बास करबै। 43 यि परमेस्वरमे भरोसा राखैत राखैछै। परमेस्वर अकरासे खुसी छै त अखुन बचाबे कथिलेत यि अपनेके परमेस्वरके बेटा कहैत रहै।” 44 तब ओकरजरे कुरूसमे दहिना आ बमाकात टाङल अपराधीसब सेहो ओहिनङे अपमान करल्कै। येसुके मिरतु ( मरकुस १५:३३-४१ , लुका २३:४४-४९ , युहन्ना १९:२८-३० ) 45 दिनके बारह बजेसे तिन बजे तक पुरे देस अन्हारे रहलै। 46 तिन बजे दिसन येसु जोरसे चिच्याके बाज्लै, “इलोइ, इलोइ, लामा सबखथनी।” जकर अरथ यि चियै कि, “हे हमर परमेस्वर, हे हमर परमेस्वर, अहाँ हमरा कथिले त्यागलियै?” 47 यि सुइनके ओते ठार भेलमेसे कुछ लोक कहल्कै, “यि लोक त एलियाके बोल्यारहल छै।” 48 ओकरासबमेसे एक गोरा झटसे दौरके गेलै आ पानी सोकैबला रुइया अङगुरके गन्हौवा मधमे चोइपके लाठीमे बाइन्हके येसुके पियैले देल्कै। 49 महज औरोसब ओकरा कहल्कै, “रुक, कहि एलिया अकरा बचाबे एतै कि कथि।” 50 येसु फेनो जोरसे चिच्याके आपन परान छोरल्कै। 51 ओइ समयमे मन्दिरके परदा उपरसे निचा दुइ चिरा भ्याके फाटलै। धरती डोले लाग्लै आ चटान फुटलै। 52 चिहानके मुहसब उघरलै आ परमेस्वरके बहुतो सेबकसब मुरदासे जिबित भ्याके उठलै। 53 उसब चिहानसे बाहर आइबके जब येसु मुरदासे जिबित भेलै तब उसब पबितर सहरमे गेलै आ बहुतो लोकसबके देखाइ देल्कै। 54 रोमी कप्तान आ ओकरजरे येसुके ओगरैबला सिपाहीसब भुमकौन आ यि घटनासब देखके बहौत डेरेलै आ कैह उठलै कि, “साँचोके यि त परमेस्वरके बेटा रहै।” 55 बहौत जनिसब सेहो ओतै छेलै, उसब दुरेमे ठार भ्याके यि घटनासब देखैछेलै। उसब येसुके सेबा टहल करैत गालिल परदेससे पछुवाइत एलछेलै। 56 ओइसबमेसे मरियम मग्दलिनी, याकुब आ योसेफके माँ मरियम आ जब्दियाके बेटासबके माँ छेलै। येसुके लहास चिहानमे राखल्कै ( मरकुस १५:४२-४७ , लुका २३:५०-५६ , युहन्ना १९:३८-४२ ) 57 साँझ परलाके बाद अरिमाथिया सहरके योसेफ नामके एक गोरे धनिक लोक एलै। ओहो येसुके चेला छेलै। 58 उ पिलातसलग ज्याके येसुके लहास माङल्कै। पिलातस ओकरा येसुके लहास लजाइले अनुमति देल्कै। 59 योसेफ लहास ल्याके सफा मलमलके कपरासे लपेट देल्कै, 60 आ उ चटानमे खुइनके बनल आपने लबका चिहानमे राइखके चिहानके मुहमे बरका पथल गुरकाके बन्द कैरदेल्कै आ ओतेसे चैलगेलै। 61 मरियम मग्दलिनी आ दोसरो मरियम सेहो चिहानके सामने बैठल छेलै। चिहानमे पहरेदारके पहरा 62 दोसर बिहान, अरथात बिसरामके दिन, मुख पुजारीसब आ फरिसीसब सङे पिलातस ओते ज्याके ओकरा कहल्कै, 63 “हौ सरकार! हमरासबके याद छै जे उ ठक आदमी जिबित भ्याल बखत ‘हम तिन दिनके बाद फेनो जिबित भ्याके उठबै’ कहने छेलै। 64 तै खातिर अहाँ आग्या दियौ कि तिन दिनतक ओइ चिहानमे पहरा देल जाय। कहि एहेन नै हेबे कि ओकर चेलासब आइबके ओकर लहास चोराके लजाए आ लोकसबके कहे लागे कि उ मुरदामेसे जिबित भ्याके उठलै। तब अइबेरके धोखाके बात पहिल्काके धोखासे औरो खराब हेतै।” 65 पिलातस ओइसबके कहल्कै, “ले ठिक छै, तुसब सिपाहीसबके लजो आ जेहन सुरक्छा तुसब करैले चाहैचिही तनङ कर।” 66 तब उसब ज्याके चिहानके मुहमे बन्द करल पथलमे छाप लगेल्कै। सिपाहीसबके सुरक्छा करैले पहारा लगादेल्कै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.