मतीके लिखल सुसमाचार 20 - मध्य पुरविया थारूकाम करैबला जनसबके खिसा 1 येसु कहैत गेलै, “स्वरगके राज जमिनके एकटा एहेन मालिक जखा चियै जे, बिहान सबेरे-सबेरे अङगुर बारीमे काम करैबला जनसबके ताकैले निकललै। 2 तब ओइ जनसबके एक दिनके बैन चानीके एक टका तोइकके आपन अङगुरके बारीमे काम करैले पठेल्कै। 3 जब उ न बजे दिसन बजारमे निकललै त लोकसबके काम नै कैरके ठारभेल देखल्कै। 4 तब उ ओइसबके कहल्कै, ‘तुसब हमर अङगुर बारीमे काम करैले जो, जे उचित हेतै से हम तोरासबके देबौ।’ 5 तब उसब काम करैले ओकर अङगुर बारीमे गेलै। तकरबाद उ लोक फेनो बारह बजे आ तिन बजे दिसन बाहर ज्याके औरो लोकसबके ओहिनङे कैरके काममे लगाइल्कै। 6 फेनो पाँच बजे दिसन गेलै तखुन्तो उ कुछ लोकसबके ओइहनङे बजारमे काम नै भ्याके ठारभेल देखल्कै। तब उ ओइसबके पुछल्कै, ‘तुसब अते कथिले दिनभैर बेगारी भ्याके ठार रहैचिही?’ 7 उसब जबाब देल्कै, ‘हमरासबके अखुनतक कोइ नै बारीमे काम करैके लेल अरहाइल्कै।’ उ गिरहत ओइसबके कहल्कै, ‘तुहुसब हमर अङगुर बारीमे ज्याके काम कर।’ 8 “जब साँझ परलै, तब उ मालिक आपन मुख नोकरके बोल्याके कहल्कै, ‘जनसबके बोला आ सबसे पछा आबैबलासे सुरु कैरके सबसे पहिन्का आबैबला तक सबके बैन द्यादहै।’ 9 तब पाँच बजे काम सुरु करैबलासबके पैहने बोल्याके सबके एक दिन बराबरके बैन देल्कै। 10 तै बखत सबसे पहिनेसे काम करैबलासब बेसी बैन मिलत कैहके बिचार करल्कै, महज ओहोसबके एके दिन बराबरके बैन पाबल्कै। 11 उसब बैन पाबलाके बाद जमिनके मालिकके बिरोधमे किच-किच करे लाग्लै। 12 उसब कहेलाग्लै, ‘यि पाछे एल्हासब एक घन्टा मातरे काम करल्कै, हमसब त घामे-पसिने मैर-मैरके दिनभैर खटलचियै! महज अहाँ ओहोसबके बराबरे बैन देलियै।’ 13 महज मालिक ओइसबमेसे एक गोराके जबाब दैत कहल्कै, ‘देख, हम तोरा अन्याय नै करनेचियौ। तु त दिनभैरके बैनमे काम करैले राजी नै भेल छेल्ही? 14 तु आपन बैन ल्याके जो। हम यि पाछे काममे एल्होसबके तोरासबके जतहेक देनेचियौ ततहेक दैले चाहैचियै। 15 कि आपन इक्छा लागल लोकके आपने पैसा-कौरी दैले हमरा अधिकार नै छै? हम ओकरा दया करलियै त तोरा कथिले डाह हैछौ’?” 16 तब येसु बातके ओराइत कहल्कै, “अहिनङे जे पछा छै, से अगा हेतै आ जे अगा छै से पछा हेतै।” तेसर बेर येसु आपन मिरतुके चरचा करल्कै ( मरकुस १०:३२-३४ , लुका १८:३१-३४ ) 17 येसु अगा यरुसलेम दिसन जाइत खिना आपन बारहो चेलासबके रस्ताके कातमे लज्याके कहल्कै, 18 “देख, अपनासब यरुसलेम दिसन ज्यारहल चियै। ओते मानब पुतर मुख पुजारीसब आ धरमगुरुसबके हाथमे सौपल जेतै आ उसब ओकरा मिरतुदन्डके जोकर ठहराइतै। 19 तब ओकरा गैर-यहुदीसबके हाथमे सौपतै। ओकरा गिल्ला करतै, कोरासे पिटतै आ कुरूसमे टाङइके माइरदेतै। महज फेनो उ तेसर दिनमे जिबित भ्याके उठतै।” माँ के बिन्ती ( मरकुस १०:३५-४५ , लुका २२:२४-२७ ) 20 तकरबाद जब्दियाके बेटासब आपन माँ सङे येसु लग एलै आ ओकर अगा ठेङहुनिया द्याके बिन्ती करल्कै, “हमर उपर दया करु।” 21 तब येसु ओइ जनीके पुछल्कै, “तु कथी चाहैचिही?” उ जनी कहल्कै, “अहाँ रजा हेबै त अहाँके राजमे यि हमर दुनु बेटासबमेसे एकटा देहना कात आ दोसर बमा कात बैठे पाबे।” 22 येसु ओकरा जबाब देल्कै, “तुसब कथी माइङरहलचिही से नै जानैचिही। जे दुखके बाटी हम पिये लागलचियै, कि उ तुसब पिये सकबिही?” उसब कहल्कै, “जी, सक्बै।” 23 तब येसु फेनो कहल्कै, “हँ, हमर पियैबला दुखके बाटीसे तुसब पिब्ही, महज हमर देहना आ बमा कातमे बैठे दैके अधिकार हमर हाथमे नै छै। उ ठाम ओइसबके चियै, जकर खातिर हमर पिता तैयार करने छै।” 24 यि बात सुइनके औरो दस गोरा चेलासब उ दुइ गोराके देखके खिस्याइलै। 25 तब येसु ओइसब गोराके बोल्याके कहल्कै, “तोरासबके थाहे छौ कि, अहै सन्सारके रजासब जनतासब उपर हुकुम चलाइत रहैछै आ जनतामे जे पैध लोकसब रहैछै उ ओइसब उपर अधिकार जमाइछै। 26 महज तोरासबके बिचमे एहेन नै हेबे। बल्की, तोरासबमेसे जे पैध हैके इक्छा करैछौ, उ तोरासबके सेबक बने। 27 जे तोरासबमेसे बरका हैके इक्छा करैछै, उ तोरासबके नोकर बने। 28 तैहनङे मानबोके बेटा दोसरसे सेबा लैले नै, महज सेबा करैले आ बहौत लोकसबके पापसे छुटकारा दैके खातिर आपन परान दैले एलछै।” येसु दुइटा अन्हराके देखैबला बनाइल्कै ( मरकुस १०:४६-५२ , लुका १८:३५-४३ ) 29 येसु आ ओकर चेलासब यरिहो सहरसे बाहर निकललै तब लोकसबके बरका भिर ओकर पछा लाग्लै। 30 ओहै रस्ताके कातमे बैठल दुइटा अन्हरासब येसु अहै रस्ता हैत आबैछै से बात सुइनके जोर-जोरसे किलोल करैत एहेन कहेलाग्लै, “हे परभु, दाउद रजाके बेटा, हमरासबके उपर दया करु।” 31 भिरके लोकसब ओइ दुनुगोरेके फटकारैत कहल्कै, “चुप है जो” महज उसब औरो जोर-जोरसे हल्ला तोइरके कहेलाग्लै, “हे परभु, दाउद रजाके बेटा, हमरासबके उपर दया करु।” 32 तब येसु ठार भेलै आ ओइसबके बोल्याके पुछल्कै, “हम तोरासबके खातिर कथी कैरदेबै से चाहैचिही?” 33 उसब येसुके कहल्कै, “हे परभु, हमसब आपन आँखसे देखैले चाहैचियै।” 34 यि बात सुनैत मातर येसुके दया लाग्लै। तब ओइसबके आँखमे छुबल्कै, छुबते मातर उसब देखेलाग्लै आ ओहोसब ओकर पछा लाग्लै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.