मतीके लिखल सुसमाचार 19 - मध्य पुरविया थारूछोरपतरके बारेमे येसुके सिक्छा ( मरकुस १०:१-१२ ) 1 यि सब बात कैहलेलाकेबाद येसु गालिलसे पैदले यरदन लदीके ओइपार यहुदा इलाका दिसन गेलै। 2 लोकसबके बरका भिर ओकर पछा लाग्लै आ येसु ओते लोकसबके ओकर बिमारी सबसे निक करल्कै। 3 तब कुछ फरिसीसब आइबके येसुके ओकरे बातमे फसाइले पुछल्कै, “कि कोनो लोक बिना कारन आपन घरबालीके छोरपतर देनाइ उचित छै?” 4 येसु जबाफ देल्कै, “सिरिस्टी करता परमेस्वर सुरुमे लोकके मरद आ जनी कैरके बनेल्कै, कि तुसब पबितर धरमसास्तर नै पढनेचिही? 5 आ परमेस्वर फेनो कहल्कै, ‘तैखातिर लोक आपन माँ-बाबुके छोरैछै आ आपन घरबालीसङे मिलल रहैछै आ उ दुनु एके देह हैछै।’ 6 आबसे उसब दुइ नै, महज एके देह हैछै। तैखातिर जकरा परमेस्वर एकसाथ जोरने छै, तकरा कोनो लोक नै छुटाबे।” 7 तखैन फरिसीसब ओकरा पुछल्कै, “तब मोसा कथिले छोरपतरके नालिस लिखके आपन घरबालीके छोरैले हुकुम देल्कै त?” 8 येसु ओइसबके कहल्कै, “यि त तोरासबके कठोर मनके कारनसे मोसा आपन घरबालीके छोरपतर दैके अनुमति देनेछेलौ। महज सुरुमे त एहेन नै छेलै। 9 हम तोरासबके कहैचियौ, जे आपन घरबालीके बेबिचारके बाहेक औरो कोनो कारनसे छोइरके दोसरसे बियाह करैछै त, उ लोक बेबिचार करैछै।” 10 तब चेलासब कहल्कै, “अदी घरबला-घरबालीके समबन्ध ऐहेन हैछै त, बरु बियाहे नै करनाइ उचित हेतै।” 11 तब येसु कहल्कै, “सबलोक यि बचन गरहन करे नै सक्तै, महज परमेस्वर कुछ लोकके मातरे यि बचन सुइकार करेसकै बला बनाइनेछै। 12 बियाह नै करैबला बहुतो कारनसब छै, कथिलेत कोइ जलमेसे नपुन्सक हैछै, ककरो औरो लोक नपुन्सक बन्या दैछै आ कोइ आपने-आप स्वरगके राजके लेल नपुन्सक भ्याजाइछै। जेसब यि सबबातके सुइकार करे सकैछै, से कोइ सुइकार करे।” येसु छोट धियापुताके आसिरबाद देल्कै ( मरकुस १०:१३-१६ , लुका १८:१५-१७ ) 13 तब लोकसब आपन धियापुतासबके उपर हाथ राइखके परथना कैरदेबे से बिचार कैरके येसु लग आनल्कै। महज यि देखके चेलासब ओइसबके खिस्याइल्कै। 14 महज येसु कहल्कै, “छोट धियापुतासबके हमरलग आबैले दहै, ओइसबके नै रोकै, कथिलेत स्वरगके राज अहिने लोकसबके लेल चियै।” 15 तब येसु धियापुतासबके उपर आपन हाथ राइखके आसिरबाद देल्कै आ ओतेसे चैलगेलै। धनिक लोक ( मरकुस १०:१७-३१ , लुका १८:१८-३० ) 16 तब एकटा लोक येसु लग एलै आ कहल्कै, “हे गुरु जी, अनन्त जिबन पाबैले हमरा कोन असल काम करे परतै?” 17 येसु ओकरा जबाफ देल्कै, “असल कथी चियै, से तु हमरा कथिले पुछैचिही? असल त एकटा मातरे छै। यदी तु अनन्त जिबन पाबैले चाहैचिही त, परमेस्वरके आग्यासब पालन कर।” 18 उ लोक कहल्कै, “कोन आग्यासब?” तब येसु कहल्कै, “हतिया नै कर, बेबिचार नै कर, चोरी नै कर, झुठा गबाही नै दहै, 19 आपन माँ-बाबुके आदर कर आ आपन परोसियाके आपने जखा परेम कर।” 20 तब उ जबान लोक येसुके कहल्कै, “यि सब आग्यासब त हम पालन कैरते आबैचियै। आब हमरा कथी करेपरतै?” 21 येसु ओकरा कहल्कै, “यदि तु साँचेके असल हैले चाहैचिही त, तोहरसङे भेल सब धन-सम्पती बेचके गरिबसबके बाइट दहै तब तोरा स्वरगमे धन मिल्तौ। तब आइबके हमर पछा लाग।” 22 यि बात सुइनके उ लोक एकदम निरास भेलै आ ओतेसे चैलगेलै, कथिलेत ओकरा बहुत धन-सम्पती रहै। 23 तब येसु आपन चेलासबके कहल्कै, “साँचेके हम तोरासबके कहैचियौ, धनिक लोकके स्वरगके राजमे आबैले एकदमे कठिन हैछै। 24 हम फेनो तोरासबके कहैचियौ, धनिक लोकके परमेस्वरके राजमे आबैसे त बरु, उंटके टिपनीके नाथिमे ढुकैले असान हैछै।” 25 तब चेलासब आस्चरजमे पैरके येसुके कहल्कै, “तब के उदार पाबतै त?” 26 येसु चेलासबके दिसन ताकैत कहल्कै, “यि काम लोकसबके लेल असम्भब छै, महज परमेस्वरके लेल सबकुछ सम्भब छै।” 27 तब पतरुस कहल्कै, “देखु, हमसब त आपन सबकुछ छोइरके अहाँके पछा लागलेचियै। हमरासबके कथी मिल्तै?” 28 येसु उसबके कहल्कै, “साँचेके हम तोरासबके कहैचियौ, नया सिरिस्टीमे जहिया मानबके पुतर आपन महिमाके सिंहासनमे बैठतै, तहिया तुहुसब बारह सिंहासनमे बैठबही आ इजराएलके बारह कुलके नियाइ करबिही। 29 जे कोइ हमर खातिर आपन घरदुवार, भाइ-बहिन, माँ-बाबु, बेटा-बेटी आ जगहा-जमिन छोरैछै, उ सय गुना पाबतै आ अनन्त जिबनके हकदार हेतै। 30 महज जेसब अखुन अगा छै, उ पछा हेतै आ जेसब अखुन पछा छै उसब अगा हेतै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.