मतीके लिखल सुसमाचार 17 - मध्य पुरविया थारूयेसुके रुप बदललै ( मरकुस ९:२-१३ , लुका ९:२८-३६ ) 1 छ दिनके बाद येसु आपनसङे पतरुस, याकुब आ ओकर भाइ युहन्नाके ल्याके उच्का पहारमे गेलै। 2 चेलासबके अगारीमे येसुके रुप बदैलगेलै। ओकर चेहरा सुरुज जखा चमके लाग्लै आ ओकर बस्तर उजर चमकदार भ्यागेलै। 3 तब अचानक चेलासब येसुके अगमबक्ता मोसा आ एलियासङे बातचित करैत देखल्कै। 4 यि देखके पतरुस येसुके कहल्कै, “परभु, यि कतहेक असल बात चियै जे कि अपनासब अते चियै। यदी अहाँके इक्छा हेबे त हम अते तिनटा रहैबला पाल बनेबै, एकटा अहाँके लेल, एकटा मोसाके लेल आ एकटा एलियाके लेल!” 5 पतरुस यि बात बाजतेछेलै कि तखुन्ते एकटा चम्कौवा बादल एलै आ छाहसे ओइसबके झाइपदेल्कै। तकरबाद ओइ बादलसे एकटा एहेन अबाज एलै, “यि हमर दुलरुवा बेटा चियै, अकरसे हम बहौत खुसी चियै, अकर बात धियानसे सुन।” 6 जब चेलासब यि बात सुनल्कै तब डरके मारे मुरी गोइत लेल्कै। 7 तब येसु लगमे आइबके ओइसबके छुइबके कहल्कै, “उठ, नै डेरा!” 8 जब उसब आपन नजैर उपर उठेल्कै, तब ओते येसुके मातरे देखल्कै। 9 पहाड़से निचा उतरैत बखत येसु ओइसबके आग्या दैत कहल्कै, “जाबेतक मानबके बेटा मैरके जिके नै उठतै ताबे तक जे बात तुसब देखलिही से बात तुसब ककरो नै कहिहे।” 10 तब चेलासब येसुके एहेन कैहके पुछल्कै, “तब धरमगुरुसब कथिले पैहने एलिया आबे परतै कहैछै?” 11 येसु ओइसबके जबाब देल्कै, “साँचोके एलिया एतै आ सब बातसबके सुधार करतै। 12 देख, हम तोरासबके कहैचियौ, एलिया त आइबगेल छै, महज लोकसब ओकरा नै चिन्हल्कै, ओइसबके जे मन लाग्लै ओहे करल्कै। अहिनङे मानबो-पुतरके ओइसबके हाथे दुख भोगे परतै।” 13 तब येसु बप्तिस्मा दैबला युहन्नाके बारेमे कैहरहल छै से चेलासब बुझल्कै। येसु भुत लागल छौराके निक करल्कै ( मरकुस ९:१४-२९ , लुका ९:३७-४३ ) 14 येसु आपन चेलासबसङे भिर भेल ठाममे पुग्लाकेबाद एकटा लोक येसुके लग आइबके ओकर अगामे ठेङहुनिया दैत कहल्कै, 15 “परभु, हमर बेटा उपर दया करु, कथिलेत मिरगी रोगके कारन उ एकदमे दुख काइट रहल छै। उ कहियो आइग आ कहियो पानीमे खैसपरैछै। 16 हम ओकरा अहाँके चेलासब लग आन्ने छेलियै, महज उसब निक करैले नै सकलक।” 17 तब येसु जबाफ देल्कै, “ऐ बिस्बास नै करैबला आ दुस्ट पुस्ता, हम कहियातक तोरासबके सङे रहबौ? कहियातक तोरासबके कमजोर बिस्बासके सहैत रहबौ? ओकरा अते हमरलग आन।” 18 तब येसु भुत आत्माके डाटल्कै आ भुत आत्मा ओकरसे निकैलेके गेलै। तब तखुन्ते उ छौरा निक भेलै। 19 तकरबाद चेलासब येसुके असगरेमे पुछल्कै, “हमसब कथिले ओइ भुत आत्माके निकालैले नै सकलियै?” 20 येसु उसबके जबाफ देल्कै, “तोरासबके बिस्बासमे कमि भेलाके कारन अनङ भेलै। साँचोके हम तोरासबके कहैचियौ, यदी तोरासबमे रायके बिया बराबर बिस्बास रहतौ त यि पहारके ‘अतसे हैट जो’ कहबिही त हैटजेतौ आ तोरासबके लेल कोनो चिज असम्भब नै हेतौ। 21 [महज एहेन किसिमके भुत आत्मा परथना आ उपाससे मातरे निकाले सकैछै।]” आपन मिरतुके बारेमे येसुके दोसर भबिसबानी ( मरकुस ९:३०-३२ , लुका ९:४३-४५ ) 22 जब येसु आ ओकर चेलासब गालिलमे जम्मा भेलै तब येसु ओइसबके कहल्कै, “आब मानबके बेटा लोकसबके हाथमे सौपल जेतै। 23 उसब ओकरा जानसे माइरदेतै, महज तेसर दिनमे उ फेनो जिके उठतै।” यि बात सुइनके चेलासब एकदम दुखीत भेलै। येसु मन्दिरमे बटी तिरल्कै 24 जब येसु आ ओकर चेलासब कफरनहुम सहरमे पहुचलै तब बटी उठाइबलासब एलै आ पतरुसके पुछल्कै, “कि तोरासबके गुरु जी मन्दिरके बटी नै तिरैछौ?” 25 उ कहल्कै, “हँ, तिरैछै।” तकरबाद पतरुस घर भितर गेलै आ येसु ओकरा पुछल्कै, “हे सिमोन, तु कथी बिचार करैचिही? अइ सन्सारके रजासब ककरसे बटी उठाबैछै? आपने बेटासबसे कि औरो लोकसबसे?” 26 तब पतरुस कहल्कै, “औरो लोकसबसे।” येसु ओकरा कहल्कै, “अकर मतलब ओकर आपन बेटासब छुट पाबल्कै। 27 महज उसब अपनासबसे नै खिस्याबे कैहके, तालमे जो आ बन्सी फेक। तब पहिन्का परल माछके मुहमे एकटा चानीके डलर पेब्ही। उ डलर ल्याके अपना दुनु गोरेके बटी ओइसबके तिरदहै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.