मतीके लिखल सुसमाचार 11 - मध्य पुरविया थारूबप्तिस्मा दैबला युहन्नाके सबाल ( लुका ७:१८-३५ ) 1 येसु आपन बारहो चेलासबके यि बातके आदेस देलाके बाद ओतेसे चैलगेलै। तब उ गालिल परदेसके सहरसबमे सिक्छा देबे लाग्लै आ सुसमाचार परचार करे लाग्लै। 2 जब बप्तिस्मा दैबला युहन्ना जहलेमे खिरिस्टके कामके चरचा सुनल्कै, तब उ आपन चेलासबके यि बात पुछैले ओकरलग पठाइल्कै, 3 “उ जे आबैबला छै, से अहै चियै, कि हमसब दोसरके पेरा ताकु?” 4 येसु ओइसबके जबाब देल्कै, “जे कुछ तुसब सुनैचिही आ देखैचिही, से सब बात ज्याके युहन्नाके सुन्यादहै- 5 अन्हरासब देखैछै, नेङरासब चलैछै, कोढि-कुस्टी लागलसब सुध हैछै, बैहरासब सुनैछै, मरलसब जिजाइछै आ दुखी गरिबसबके सुसमाचार सुनाइछै। 6 उ धैनके चियै, जे हमर उपर सङका नै करैछै।” 7 तब बप्तिस्मा दैबला युहन्नाके चेलासब गेलाकेबाद येसु भिरके लोकसबके युहन्नाके बारेमे कहल्कै, “तुसब उजार जगहमे कथी देखे गेल छेल्ही? कि हबामे हिलैत नरकट के? 8 तब कथी देखैले गेल छेल्ही? कि असल-असल बस्तर पिन्हल लोकके? असल-असल बस्तर पिन्हैबलासब त राजदरबारमे रहैछै। 9 तुसब कथी देखे गेल छेल्ही? कि कोनो अगमबक्ताके देखैले? हँ हम तोरासबके कहैचियौ, अगमबक्तोसे बरका लोकके देखलिही। 10 यि ओह्या चियै जकर बारेमे पबितर धरमसास्तरमे लिखल छै, ‘देख, हम आपन दुतके तोहर अगा-अगा पठाइबौ जे तोहर खातिर रस्ता तयार करतौ।’ 11 “हम तोरासबके साँचोके कहैचियौ, बप्तिस्मा दैबला युहन्नासे बरका कोइ नै कहियो जलम लेनेछै, तैयो स्वरगके राजमे जे सबसे छोट छै, से कोइ युहन्नासे बरका छै। 12 बप्तिस्मा दैबला युहन्नेके बखतसे अखुनतक स्वरगके राज जोर-तोरसे अगा बैढ़ रहल छै, तब जबरदस्ती करैबला लोकसब स्वरगके राजके बिरोध कैररहलछै। 13 कथिलेत बप्तिस्मा दैबला युहन्नाके बखत तक मोसाके बेबस्था आ सब अगमबक्तासब परमेस्वरके राजके बारेमे भबिसबानी करने रहै। 14 यदी तुबस यि बात सुइकार करैले तैयार चिही त सुन, युहन्ने एलिया चियौ, जे फेनो आबैबला छै। 15 जकरा सुनैबला कान छै, उ धियानसे सुइनके बुझ। 16 “आब हम आइ काइलके लोकसबके कथिसे नाप्बै? यि सब त चौक-चौराहामे खेलैबला बच्चासब जखाछै, जे एक-दोसरके कहैछै, 17 ‘हमसब तोरासबके खातिर बौसली बजेलियौ, तैयो तुसब नै नाचलिही। तोरासबके खातिर बिलापके गित गाबलियौ महज तुसब सोक नै करलिही।’ 18 “कथिलेत युहन्ना लोकसब जखा खाइत पियैत नै एलै, तैयो तुसब ओकरा भुत लागल छै कैहके कहैचिही। 19 मानबके बेटा खाइत-पियैत एलौ, तब तुसब कहैचिही, ‘देख, एकटा खाधुस, पियक्कर, बटी उठाइबलासब आ पापीसबके सङी!’ महज परमेस्वरके बुइध असल छै, से बात ओकर कामेसे परमानित हैछै।” पस्चाताव नै करैबला नगरसबके धिक्कार ( लुका १०:१३-१५ ) 20 तकरबाद येसु जै-जै नगरसबमे सबसे बेसी अजगुतके कामसब करने रहै, तैसबके उ धिक्कारे लाग्लै, कथिलेत ओतेका लोकसब आपन पापके खातिर पस्चाताव नै करने रहै। 21 “धिक्कार तोरा खोराजिनके बासिसब! आ धिक्कार तोरा बेथसेदाके बासीसब! कथिलेत तोरासबके बिचमे करलाहा अजगुतके कामसब टुरोस आ सिदोन सहरमे करनेरहतीयै त ओतेका लोकसब आपन-आपन पाप माइनके बोराके बस्तर लग्याके छौरमे बैठके पस्चाताप करतियै। 22 महज हम तोरासबके कहैचियौ, नियाइके दिनमे टुरोस आ सिदोनके लोकसबके दुखसे बेसी तोरासबके दुख बेसी हेतौ। 23 “हे कफरनहुमके लोकसब, कि तुसब स्वरग तक ज्याके आदर पैब्ही कैहके सोचैचिही? तुसब त पतालमे खसाएल जेब्ही। कथिलेत जे अजगुतके कामसब तोरासबके बिचमे करल गेल्छौ से कामसब सदोममे करने रहतियै त आइतक रहतियै। 24 महज हम तोरासबके कहैचियौ, नियायके दिनमे सदोमसे बेसी दसा तोरासबके हेतौ।” थाकलसबके बिसराम ( लुका १०:२१-२२ ) 25 ओहै बखत येसु कहल्कै, “हे पिता स्वरग आ पिरथिबीके मालिक, हम अहाँके धन्यबाद चरहाइचियै, कथिलेत यि बातसब अहाँ बातसब बुधिमान आ बिदवान सबसे घोसाइरके राखलियै, महज बच्चासबमे परगट करलियै। 26 हँ पिता, कथिलेत अहाँके अहिनङ करैले असल लागल। 27 “हमर पिता हमरा सबचिज सोइप देने छै। बेटा के चियै से पिता बाहेक कोइ नै चिन्हैछै, पिताके चियै से बेटा बाहेक कोइ नै चिन्हैछै महज बेटा जेकरासबके चिन्हादैछै उसब मातरे पिताके चिन्हैछै। 28 “हे सब थाकल आ बोझसे दाबल लोकसब, हमरलग या, हम तोरासबके बिसराम देबौ। 29 हमर जुवा आपन उपर उठा आ हमरसे सिख, कथिलेत हम दयालु आ नरम हिरदयके चियौ, तब तोरासबके आत्माके बिसराम मिल्तौ। 30 कथिलेत हमर जुवा असान छै आ जे भारी हम बोकाइबौ उ हलुक छै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.