मतीके लिखल सुसमाचार 10 - मध्य पुरविया थारूबारह परेरितसबके करल कामसब ( मरकुस ३:१३-१९ , ६:७-१३ , लुका ६:१२-१६ , ९:२-६ ) 1 तब येसु आपन बारहो चेलासबके बोलाइल्कै आ ओइसबके भुत आत्मासब निकालैके आ सब किसिमके रोगी-बिमारीसबके निक करैके अधिकार देल्कै। 2 उ बारहो परेरितसब एह्या चियै- पहिन्का सिमोन, जकर नाम पतरुसो चियै आ ओकर भाइ अन्दरियास, जब्दियाके बेटा याकुब आ ओकर भाइ युहन्ना, 3 फिलिप आ बारथोलोमाइ, थोमा आ बटी उठाइबला मती, अल्फयासके बेटा याकुब आ थेदियस, 4 “देस भक्त” सिमोन कनानी आ यहुदा इस्करियोती, जे येसुके धोखा देने रहै। 5 तब येसु आपन बारहो चेलासबके एहेन कैहके पठाइल्कै, “तुसब गैर-यहुदीसबके बिचमे आ सामरीसबके सहरमे नै जो। 6 बरु इजराएलके लोकसब लग जो, जे हेरयाल भेंरासब जखाछै। 7 ‘स्वरगके राज नजदिक आइबगेल छै’ से परचार करैत जो। 8 रोगी-बिमारीसबके निक कर, मरलहासबके जिबित कर, कोढि-कुस्टीसबके सुध कर, भुत आत्मासबके निकाल। जहिनङे तुसब मङनिएमे पाबलिही तहिनङे मङनिएमे दहै। 9 तुसब आपन बटुवामे सोना, चानी या तामके पैसो-कौरी नै बोक। 10 रस्ताके लेल नै झोरा, नै फेरैबला जमा-जोरा, नै जुता आ नै लाठी ले, कथिलेत जन आपन भोजन पाबैके योग्य हैछै। 11 “जे गाम आ सहरमे तुसब जेब्ही, उ गाम-सहरमे मान-दान करैबला लोकके खोज आ ओइ सहरसे नै निकलैतक ओकरे घरमे रहिहे। 12 जब ओइ घरमे ढुकबिही, तब ‘ओइ घरमे सान्ती हेबे’ कहिहे। 13 यदी उ घरके लोकसब सान्ती पाबैके योग्यके छै त, तोरासबके सान्ती ओइ घरमे रहे महज यदी योग्यके नै छै त तोरासबके देल सान्ती तोरेसबसङे घुइमके एतौ। 14 यदी कोइ तोरासबके मान-दान नै करतौ या तोरासबके बचन सुनैले इन्कार करतौ त, ओइ गाम आ सहरसे निक्लै बखत आपन टाङके गरदा झाइर दैहे। 15 साँचोके, हम तोरासबके कहैचियौ, नियाइके दिनमे ओइ सहरके दसासे बरु सदोम आ गमोराके दुख सहे जोकरके हेतै। आबैबला सताबट ( मरकुस १३:९-१३ , लुका २१:१२-१७ ) 16 “देख, हम तोरासबके भेंरा जखा नरहियासबके बिचमे पठाइचियौ, तै खातिर तुसब साँप जखा चलाक आ पौरकी जखा सिधा-साधा रह। 17 महज लोकसबसे होसियार रह, कथिलेत उसब तोरासबके अदालतसबमे सोइप देतौ आ सभाघरसबमे लज्याके तोरासबके कोरासे पिटतौ। 18 हमर खातिर रजा आ सासकसबके अगामे तोरासबके ठार करतौ। तुसब ओकरासबके आ गैर-यहुदीसबके अगा हमर बारेमे गबाही देबही। 19 महज जब तोरासबके पकरतौ, तब कनङके आ कथी बोल्बै तैके चिन्ता नै कर। कथिलेत तोरासबके कथी बोले परतौ से ओहै बखत तोरासबके देल जेतौ, 20 आ ओइ बखत बोलैबला तुसब नै महज परमेस्वर पिताके आत्मा तोरासबके दुवारा बोल्तौ। 21 “एक भाइ दोसर भाइके, बाबु आपन धियापुताके आ धियापुता आपन माँ-बाबुके बिरोधमे उठतौ आ एक-दोसरके मारे लगाइतौ। 22 हमर खातिर तुसब लोकसबसे घिरनित हेब्ही। महज जे अन्तिम दिनतक स्थिर रहतै, उ उदार पाबतै। 23 जब लोकसब तोरासबके एक गाममे सताइतौ तब दोसर गाममे भाइगके जो। साँचोके हम तोरासबके कहैचियौ, मानबके बेटा आबैसे पहिने तुसब इजराएलके सब गाम कोनोभी हालतमे आपन काज पुरा नै करने रहबिही। 24 “चेला आपन गुरुसे बरका नै हैछै आ नै त नोकर आपन मालिकसे। 25 तै खातिर चेला आपन गुरु जखा आ नोकर आपन मालिक जखा भेनाइ बहुत चियै। यदी उसब घरेके मालिकके बालजिबुल कहैछै त ओकर खानदानके औरो कि-कि नै कहतै! ककरसे डराबे परतौ ( लुका १२:२-७ ) 26 “तै खातिर उसबसे नै डरा, कथिलेत झापल एहेन कोनो बात नै छै जे उघारल नै जेतै आ घोसरल कोनो बात नै छै जे थाह नै हेतै। 27 जे बात हम तोरासबके अन्हारमे कहैचियौ, से बात तुसब इजोतमे सबके कैहदहै आ जे बात हम तोरासबके कानमे कहनेचियौ से बात घरके छतसे परचार कर। 28 ओइसबसे नै डेरा जे देहके मातरे मारैछै, महज आत्माके नै मारे सकैछै। बरु ओकरेसङे डेरा जे आत्मा आ देह दुनुके नास कैरके नरकमे फेकैके सक्ती छै। 29 कि एक टकामे दुइटा बगरा नै बिकाइछै? तैयो एकोटा बगरा परमेस्वर पिताके इक्छा बेगर भुइयामे नै खसैछै। 30 तहिनङे तोरासबके मुरके सबकेसो तक गनल गेलछौ। 31 तै खातिर नै डरा, कथिलेत तुसब बहुत बगरासबसे औरो बेसी मुल्यबान चिही। 32 “जे हमरा लोकसबके सामने परभु कैहके सुइकार करतै, तकरा हम्हु स्वरगमे रहैबला आपन पिताके सामने सुइकार करबै। 33 महज जे हमरा लोकसबके सामने इन्कार करतै, हम्हु ओकरा स्वरगमे रहैबला आपन पिताके सामने इन्कार करबै। जे आपन जिबन गुमाइतै, उ बचाइतै ( लुका १२:५१-५३ , १४:२६-२७ ) 34 “हम पिरथिबीमे सान्ती दैले एलचियौ से कैहके तुसब नै सोच। हम सान्ती दैले नै महज तलबार चलाइले एलचियौ। 35 कथिलेत हम बाप बेटाके बिरोध, महताइर बेटीके बिरोध आ सौसके पुतौहसे बिरोध कराइले एलचियौ, 36 आ लोकके दुस्मन ओकर आपन घरेके लोकसब हेतै। 37 जे कोइ हमरा परेम करैसे बेसी आपन माँ-बाबुके परेम करतै, उ हमर चेला बने नै सक्तै। तहिनङे जे कोइ हमरा परेम करैसे बेसी आपन धियापुताके परेम करतै सेहो हमर चेला बनैले नै सक्तै। 38 आ जे कोइ आपन कुरूस बोइकके हमर पछा नै लाग्तै सेहो हमर योग्य नै हेतै। 39 जे आपन जिबन बचाइले चाहैछै, उ गुमाइतै महज जे हमर खातिर आपन जिबन गुमाइतै, उ बचाइतै। चेलासबके पाबैबला इनाम ( मरकुस ९:४१ , लुका १०:१६ ) 40 “जे तोरासबके सुइकार करतौ उ हमरा सुइकार करतै आ जे हमरा सुइकार करतै उ हमरा पठाइबलाके सुइकार करतै। 41 जे अगमबक्ताके अगमबक्ते कैहके सुइकार करतै, से अगमबक्तेके इनाम पाबतै। तहिनङे जे धरमी लोकके धरमीए कैहके स्वागत करतै, उ धरमीएके इनाम पाबतै। 42 जे हमर छोटसे छोट चेलासबमेसे ककरो हमर चेला कैहके एक लोटा जुर पानी पियैले देतै त, हम साँचेके कहैचियै उ आपन इनाम नै गुमाइतै।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.