लुका 24 - मध्य पुरविया थारूयेसु जिके उठलै ( मती २८:१-१० , मरकुस १६:१-११ , युहन्ना २०:१-१० ) 1 बिहान सबेरे जनिजाइतसब गमकौवा अतर ल्याके येसुके चिहानमे गेलै। तै दिन हप्ताके रैबदिन छेलै। 2 जब उसब ओइठाम पहुचलै तब चिहानके झाइपके राखलहा बरका पथल हट्याल देखल्कै। 3 महज उसब जब भितर ढुक्लै तब भितरमे परभु येसुके लहास नै देखल्कै। 4 यि बातसब देखके जनिजाइतसब अलमलमे परलै, अपरझट उजर चमकदार बस्तर पिन्हलहा दुइटा लोकसब कातमे ठडा भेल देखल्कै। 5 तब उ जनिजाइतसब डरसे आपन-आपन मुरी तरमाथे गोइतलेल्कै, महज उ दुनु लोक ओइसबके कहल्कै, “तोरौरके जिते लोकके कथिले मरल लोकसबके बिचमे ताकैचिही? 6 उ त अते नै छौ, महज उ जिके उठल छौ। जब उ गालिलमे रहौ, तखनु कथी कहने छेलौ से बात याद कर, 7 ‘मानबके बेटा पापी लोकसबके हाथमे परतौ, कुरूसमे लटक्याल जेतौ आ तेसर दिनमे जिबित भ्याके उठतौ’ कि तोरासबके याद नै छौ?” 8 तब ओइसबके येसुके कहलहा बात याद परलै। 9 जब उसब सरासे घुइमके गेलै आ देखलहा सब बात एगारहो चेलासब आ ओतेका सब लोकसबके सुनाइल्कै। 10 ओइ जनिजाइतसबमे मरियम मग्दलिनी, योअन्ना आ याकुबके माँ मरियम छेलै। ओकरेसबसङे रहल औरो जनिजाइतोसब यि बात परेरितसबके कहल्कै। 11 महज परेरितसब ओइसबके कहलहा बातमे बिस्बास नै करल्कै। 12 तब पतरुस उठलै आ दौरके चिहानमे निहैरके ताकल्कै, ओते उजरा कफन देखल्कै। से घटना देखके उ आस्चरज माइनके घर दिसन घुइमके चैलगेलै। इम्माउसके बाटमे येसु ( मरकुस १६:१२-१३ ) 13 तहै दिन येसुके चेलासबमेसे दुइ गोरा यरुसलेमसे करिब चार कोस दुर इम्माउस नामके गाम दिसन जाइ छेलै। 14 उसब आइ काइल घटल घटनाके बारेमे बातचित करतै जाइ छेलै। 15 ऐहनङ उसब आपनमे बातचित करैत जाइत खिना येसु ओकरौरके लग आइबके सङे जाइले लाग्लै, 16 महज ओइसबके एहेनसे अन्हर जाली लागल छेलै कि येसुके चिन्हे नै सकल्कै। 17 तब येसु ओइसबके पुछल्कै, “तुसब आपनमे कथी बात करैत ज्यारहल चिही?” यि बात सुनैतसाथ उसब उदास भ्याके ठडा भ्यागेलै। 18 ओइ दुइ गोरामेसे क्लेओपास नामके येसुके पुछल्कै, “अहि यरुसलेमसे घुमफिर कैरके आबैचियै तैयो आइ-काइल घैटरहल घटना अहाँके थाह नै भेल?” 19 तब येसु ओइसबके पुछल्कै, “कोन घटनासब?” उसब जबाब देल्कै, “येसु नासरतके बारेमे, उ एक गोरा अगमबक्ता रहै। उ परमेस्वर आ लोकसबके सामने काम आ बचनमे सक्तिसाली रहै। 20 महज मुल पुजारीसब आ हमरासबके सासकसब मिलके ओकरा मिरतुदन्ड द्याके कुरूसमे लटकेल्कै। 21 इजराएलके छुटकारा ओहे दैले सक्तै कैहके हमसब भरोसा करनेछेलियै। ओकरा कुरूसमे लटकेल्हा घटनाके आइ तेसर दिन चियै। 22 हमरासबके बिचमे कतहेक जनिजाइतसबके बातसब सुइनके त हमसब आस्चरजमे परल चियै। उसब आइके बिहान सबेरे सरामे गेलै, 23 महज येसुके लहास नै भेटलै। उसब आइबके हमरासबके सुनेल्कै, हमसब स्वरगदुतसबके देखलियै, स्वरगदुतसब उसबके कहल्कै, ‘येसु जिते छौ।’ 24 यि बातसब सुइनके हमरासबके बिचसे कोइ-कोइ चिहानमे ताकैले गेलै आ उ जनिजाइतसब जे बातसब कहने रहै, तैहनङे देखल्कै, महज येसुके नै देखल्कै।” 25 तब येसु ओइसबके कहल्कै, “तुसब केहन मुरुख लोकसब चिही, तोरासबके हिरदय अतहेक मोट भ्यागेल्छौ, कि अगमबक्तो सबके कहलहा बातके बिस्बास नै करैचिही? 26 कि खिरिस्टके यि सब दुख काइटके आपन महिमाके खातिर जाइसे पहिने जरुरी नै छेलै त?” 27 तब येसु ओइसबके मोसाके किताबसब आ सब अगमबक्तासबसे सुरु कैरके, धरमसास्तरमे आपन बारेमे लिखल सबबातसबके अरथ असलसे खोइलके बुझादेल्कै। 28 जब उसब इम्माउस गामके नजदिक पुग्लै तब येसु औरो दुर जेबै नहाइत करल्कै। 29 महज उसब येसुके कहल्कै, “हमरेसबसङे रहु, सुरुज डुइबगेलै आ रातो हैले लागल जाइछै” तब येसु ओहैसबसङे रहैले घर भितर ढुक्लै। 30 जब येसु ओइसबसङे खाइले बैठलै तब उ रोटी ल्याके आसिरबाद देल्कै आ तोइरके ओइसबके देल्कै। 31 तकरबाद ओइसबके आँख खुल्लै आ येसुके चिन्हल्कै। तहै बखत येसु ओइसबके अगासे बिलागेलै। 32 उसब आपनमे बात करैत कहल्कै, “उ अपनासबके सङे बाटमे बातचित करैतखिना आ धरमसास्तरके अरथ खोइलदैतखिना कि अपनासबके मन खुसीसे गद-गद भेल नै रहौ?” 33 तहै बखत उसब उठके यरुसलेम दिसन घुइमके गेलै। ओते एगारहो चेलासब आ ओइसबसङे जमा भेल्हा लोकसबके भेटलै। 34 आ उ लोकसब ओइ दुनुगोराके कहल्कै, “परभु साँचोके जिके उठलछै आ सिमोन लग परगट भेल छै!” 35 तब उ दुनुगोरा बाटमे भेल्हा बातसब आ उ रोटी तोरैतखिना कनङके उसब चिन्हल्कै सोहो बात सुन्यादेल्कै। येसु चेलासबके लग देखा परलै ( मती २८:१६-२० , मरकुस १६:१४-१८ , युहन्ना २०:१९-२३ , परेरित १:४-८ ) 36 ओकरौरके यि बातसबके चरचा कैर रहल बखत अचानक येसु उसबके बिचमे देखा परलै आ कहल्कै, “तोरासबके सान्ती हेबे।” 37 उसब डरसे औकत्या गेलै आ “हमसब भुत त नै देखरहलचियै?” से सोचल्कै। 38 महज येसु उसबके कहल्कै, “तुसब कथिले डेराइचिही? कथिले मनमे सङका करैचिही? 39 हमर हाथ-टाङसब देख, हम्ही चियौ, हमरा छुइबके देख! कथिलेत भुतके हड्डी-मौस नै रहैछै महज तुसब त देखैचिही, हमर त छै।” 40 एहेन कैहके उ आपन हाथ-टाङसब देखेल्कै। 41 अखन तक उसब बिस्बास करे नै सक्लै कथिलेत उसब खुसी आ आस्चरजमे छेलै। तब येसु ओइसबके कहल्कै, “कि तोरासबसङे कुछो खाइबला छौ?” 42 तब उसब ओकरा निन्हल माछके कुटिया देल्कै। 43 तब येसु माछ ल्याके ओकरेसबके अगामे खेल्कै। 44 आ कहल्कै, “तोरासबसङे रहैतकाल हमर बोलल्हा बचन एहा चियै, अरथात मोसाके बेबस्था, अगमबक्ताके किताबसब आ भजनसङगरहके किताबमे हमर बारेमे लिखलाहा सबबातसब पुरा हैए परतै।” 45 तब येसु ओकरासबके धरमसास्तरसब बुझैले समझसक्ती खोइल देल्कै, 46 आ उसबके कहल्कै, “पबितर धरमसास्तरमे एहेन लिखल छै, मुक्ती दैबला खिरिस्टके दुख भोग्नाइ आ तेसर दिनमे जिके उठनाइ जरुरी छै, 47 तब यरुसलेमसे सुरु कैरके सब जातीसबके ओकर नाममे पस्चाताव आ पाप छमाके परचार हैलेपरतै। 48 तुहिसब यि बातके साक्छी चिही। 49 हमर पिताके परतिग्या हम तोरौरके लग पठाइबौ। महज परमेस्वरके सक्ती नै पाबैतक अहै सहरमे असियाले रहिये।” येसुके सोरगारोहन ( मरकुस १६:१९-२० , परेरित १:९-११ ) 50 तकरबाद येसु आपन चेलासबके बेथानिया गाम दिसन ल्यागेलै आ आपन दुनु हाथ उठाके उसबके आसिरबाद देल्कै। 51 आसिरबाद दैतकाल, येसु उसबसे बिदा भेलै आ स्वरग दिसन उठ्यालगेलै। 52 तब उसब ओकर आराधना करल्कै आ खुसी हैत यरुसलेममे घुइमके गेलै। 53 तब उसब लगातार मन्दिरमे जमा भ्याके परमेस्वरके इस्तुति-परसन्सा करैत रहलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.