लुका 15 - मध्य पुरविया थारूहरेल्हा भेंरा ( मती १८:१२-१४ ) 1 एक दिन बटी उठाइबलासब आ पापीसब जम्मे येसुके बचन सुनैले ओकर नजदिक आबैछेलै। 2 तब फरिसीसब आ धरमगुरुसब गुनगुनावे लाग्लै “यि लोक त पापी लोकसबके स्वागत करैछै आ ओइसबके सङे-सङे बैठके खान-पिन करैछै।” 3 तब येसु ओइसबके एकटा खिसा कहल्कै, 4 “मान कि तोरासबमेसे ककरो सय भेंरा छै, ओइमेसे एकटा हरेतै त निनानब्बेटाके बोनेमे छोइरके भेंरा नै भेटतै ताबेतक कि नै खोज्तै? 5 हरेल्हा भेंरा भेटलाके बाद खुसीसे ओकरा आपन कन्हामे राखइके लेजाइछै, 6 तब घरमे आइबके उ आपन सङिसब आ परोसियासबके बोलाइछै, तब ओइसबके कहैछै, ‘हमर हरेल्हा भेंरा भेटगेलै! सबकोइ आबैजो, हमरसङे खुसी मना।’ 7 हम तोरासबके कहैचियौ, अहिनङ पस्चाताव नै करैबला निनानब्बे धरमात्मासबमेसे आपन पाप माइनके पस्चाताव करैबला एक गोरे पापीके लेल स्वरगमे बेसी खुसी हैछै।” हरेल्हा टका 8 फेनो येसु ओइसबके एकटा खिसा सुनाइत कहल्कै, “कोन एहेन जनिसब हेतै जकर दस चानीके टकामेसे एकटा हराजेतै त इजोत बाइरके जाबेतक नै भेटतै ताबेतक बरहनीसे बरहाइरके निकसे नै ताक्तै? 9 हरेल्हा टका भेटलाके बाद उ आपन सङिसबके आ परोसियासबके बोलाके कहैछै, ‘हमरसङे खुसी मना, कथिलेत हमर हरेल्हा टका भेटलै।’ 10 हम तोरासबके कहैचियौ, अहिनङे पस्चाताव करैबला पापीके लेल स्वरगमे परमेस्वर स्वरगदुतसबके अगा खुसी मनाबैछै।” हरेल्हा बेटा 11 तब येसु फेनो एकटा खिसा कहल्कै, “कोनो लोकके दुइटा बेटा छेलै। 12 एक दिन छोटका बेटा आपन बाबुके कहल्कै, ‘बाबुजी, हमर हिस्सामे परैबला धन-सम्पतीके अंस हमरा अखनिय दिय।’ तब ओकर बाबु आपन सम्पैत दुनु भैयारीमे बाइट देल्कै। 13 “कुछ दिनके बाद छोटका बेटा सब धन-समपैत जमा कैरके दोसर देस चैलगेलै आ ओते उ आपन मौज-मस्तीमे खा-पिके सब समपैत उराइल्कै। 14 उ सब टका-पैसा खरच कैरलेने छेलै। तहै बखत ओइ देसमे बरका रौदी भेलै आ ओकरा सब चिजके दुख तकलिफ हेबे लाग्लै। 15 तब उ ओइ देसके एकटा लोकसे काम माङल्कै। उ लोक ओकरा आपन खेतमे सुगर चराइले पठाइल्कै। 16 उ सुगरके खाइबला आहारासे आपन पेट भरैले ताकैछेलै, महज ओकरा कोइ नै कुछो दैछेलै। 17 “जब ओकर मन फिरलै, तब उ मनेमन अपने आपके कहल्कै, ‘हमर बाबुके घरमे त बहौतरा नोकर-चाकरसब भोइर पेट ख्याके उबारबो करैछै, महज हम अते भुखसे मरैचियै। 18 आब हम बाबुलग जेबै आ कहबै, बाबु हम स्वरगके बिरुधमे आ अहाँके बिरुधमे पाप करनेचियौ। 19 आब त हम अहाँके बेटा कहाइके योग्यके नै चियै। हमरा दया कैरके एकटा नोकरे सरह अहाँके घरमे राखु।’ 20 तब उठके उ आपन बाबुलग घुइमके एलै। “महज बहुत दुरेसे ओकर बाबु आबैत देख लेल्कै, ओकर मन दयासे भरलै आ दौरले ज्याके ओकरा पजियाके गालमे चुम्मा लेल्कै। 21 बेटा बाबुके कहल्कै, ‘बाबु, हम स्वरगके परमेस्वरके बिरुधमे आ अहाँके बिरुधमे पाप करनेचियै। हम फेनो अहाँके बेटा कहाइके योग्यके नै चियै।’ 22 महज बाबु आपन नोकरसबके बोल्याके कहल्कै, ‘झट दबर सबसे असल बस्तर आइनके अकरा पिन्हादहै। ओकर हाथमे औंठी आ टाङमे जुता लगादहै, 23 आ सबसे बरका मोटगर खसी काट, अपनासब भोज खेबै आ खुसी मनाइबै। 24 कथिलेत यि हमर बेटा मरल छेलै, फेनो जियल छै, हराएल छेलै आ भेटलै।’ तब सबकोइ भोजमे खुसी मनाइले लाग्लै। 25 “तै बखत ओकर जेठका बेटा खेतमे छेलै, जब उ घुइमके घर नजदिक एलै तब आपन घरमे बजा-गजा बाजैत आ नाच-गान हैत सुनल्कै। 26 उ एकटा नोकरके आपनलग बोल्याके पुछल्कै, ‘यि कथी भ्यारहलछै?’ 27 नोकर ओकरा कहल्कै, ‘अहाँके भाइ आइबगेलै आ अहाँके बाबुजी बरका मोटगर खसी काटलक। कथिलेत मालिक ओकरा निके कुसले घुइमके एल भेटलै।’ 28 महज उ खिस्याइलै आ अङना भितर जाइयोले नै मानल्कै, तब ओकर बाबु बाहर ज्याके ओकरा फुस्याइले लाग्लै। 29 महज उ बाबुके कहल्कै, ‘देखु, अतहेक बरिससे हम अहाँके नोकर जखा सेबा कैररहलचियै, अहाँके बात कहियो नै काटने चियै, तैयो हमरा आपन सङि-साथीसब सङे भोज खाइले अहाँ कहियो नै हमरा एकटा पठरुवो तक देलियै। 30 महज अहाँके सम्पैत रन्डीवाजमे उराइबला बेटा एल त बरका मोटगरहा खसी काइटके भोज करलियै।’ 31 तब बाबुजी कहल्कै, ‘बेटा तु त हमरसङे सबदिन चिहीके, हमर सब समपैत तोरे त चियौ। 32 महज अपनासबके खुसी हेबैये परतै, कथिलेत तोहर यि भाइ मरल जखा छेलौ, जियल छौ, हर्याल छेलौ, भेटलौ।’” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.