लुका 14 - मध्य पुरविया थारूफरिसीके घरमे येसु 1 एक पबितर बिसरामके दिन येसु फरिसीसबके एक गोरे सासकके घरमे भोज खाइले गेलै। फरिसीसब ओकरा ध्यानसे देखैछेलै। 2 कथिलेत येसुके अगामे एक गोरे हाथ-टाङ फुलल बिमार छेलै। 3 तब येसु धरमगुरु आ फरिसीसबके पुछल्कै, “पबितर बिसरामके दिनमे निक करैले उचित छै कि नै?” 4 महज उसब जबाफ नै देल्कै आ येसु ओइ बिमारके देहमे आपन हाथ राइखके निक करल्कै आ ओकरा पठाइल्कै। 5 तब येसु ओकरासबके कहल्कै, “तोरासबमेसे ककरो धियापुता या गाइमाल पबितर बिसरामके दिनमे इनारमे खस्तौ त तखुन्ते नै निकालबिही?” 6 महज उसब फेनो जबाफ दैले नै सकल्कै। 7 ओते एल्हा मेजवानसब आदरके ठाम छान्ने देखके येसु उसबके एकटा खिसा कहल्कै, 8 “जब तुसब ककरो बियाहके भोजमे नौता पाइबके जेबिही त आदरके ठाममे नै बैठ। कथिलेत तोरोसे बिसेस लोकके नौता द्यालहेतै। 9 जब उ नाम चलल लोक एतौ त दुनुगोरेके नौता दैबला नौतहार आइबके तोरा कहतौ, ‘एकरा बैठैले दही’ तब तु लज्जित भ्याके सबसे निचा जगहमे बैठैले परतौ। 10 तैल्याके तुसब बियाह भोज जेबिही त सबसे निचा जगहमे बैठ आ नौता दैबला लोक आइबके तोरा कहतौ, ‘ए साथी, उपरमे आइबके बैठ।’ ओइ बखत तोहर सङे खाइले बैठल लोकसबके अगा तोहर इजत हेतौ। 11 कथिलेत जे अपनाके बरका सोचैछै उसबसे निच हेतै आ जे अपनाके निच सोचैछै उसबसे बरका हेतै।” 12 तब येसु नौता दैबला घरबैयाके कहल्कै, “जब तुसब एहेन भोजसब करैचिही त आपन साथीसबके, आपन भैया-भाइके, या आपन कर-कुटुमके या धनिक्हा परोसियासबके नै बोलाबिहे। कथिलेत उसब बदलामे तोरासबके नौता द्याके तोहर लग्याल गुन फिरता कैरदेतौ। 13 महज तुसब भोज करबिही त गरिब, लुल्हा-नेङरा आ अन्हरासबके बोला। 14 तब तुसब आसिस पाबबिही, कथिलेत उसब तोहर गुन घुमाइले नै सक्तौ। ताब परमेस्वर आपन धरमी जनसब पुनरूथान हैतकाल तोरा इनाम देतौ।” बरका भोजके खिसा ( मती २२:१-१० ) 15 येसुसङे खाइले बैठलहा लोकसबमे से एक गोरे यि बात सुइनके ओकरा कहल्कै, “उ लोक धैनके है, जे परमेस्वरके राजमे भोजन पाबतै।” 16 महज येसु ओकरा कहल्कै, “कोनो एकटा लोक साँझके बरका भोजके तैयारी करल्कै आ बहुत लोकसबके नौता देल्कै। 17 उ आपन नौतहारीसबके भोज खाइबला समयमे नोकरके, ‘आउ, आब सबकुछ तैयार छै कैहके’ पठाइल्कै। 18 महज सबकोइ भोजमे नै आबैके बहाना बनाइले लाग्लै। पहिन्का लोक कहल्कै, ‘हम जमिन किन्नेचियै, हमरा ओते नै ज्याके नै बनेबलाछै तै खातिर हमरा छोइरदियौ।’ 19 दोसर लोक कहल्कै, ‘हम पाँच जोर बरद किन्नेचियै आ ओइसबके जोतके देखैले परतै। हमरा माफ कैरदिय।’ 20 आ तेसर लोक कहल्कै, ‘हम भरखरे बियाह करनेचियै। तैल्याके हम जाय नै सक्बै।’ 21 जब नोकर घुइमके एलै तब सब बातसब मालिकके सुनेल्कै। मालिक खिस्याके आपन नोकरके कहल्कै, ‘सहरके रस्ता-पेरा आ गल्लीसबमे जो आ गरिबसब, अन्हरासब आ लुल्हा-नेङरसबके बोल्याके आन।’ 22 “तब नोकर कहल्कै, ‘मालिक अहाँके अरहयाल बमोजिम करलियै, तैयो औरो ठामसब खालिये छै।’ 23 मालिक फेनो कहल्कै, ‘सहरके मुल रस्ता आ चौरी चाचर ज्याके लोकसबके भितर बोलाके आन, तब हमर घर भरे! 24 कथिलेत कोनो नौतहारीसब हमर भोजके सबाद चाखे नै पाबतै।’” चेलाके त्याग ( मती १०:३७-३८ ) 25 एक दिन बहुत लोकसब येसुके सङे-सङे जाइ छेलै, तब येसु ओइसबके घुइमके कहल्कै, 26 “हमर पछा आबैबला आपन माँ-बाबु, घरबाली, बेटा-बेटी, भैया-भाइ, दिदी-बहिनसबके आ आपन परानके हमरसे बेसी परेम करैछै त, उ हमर चेला नै बने सक्तै। 27 जे लोक आपन कुरूस बोइकके हमर पछा नै लाग्तै त, उ हमर चेला हेबे नै सक्तै। 28 “तोरासबमेसे कोइ एकटा बरका घर बनाबैके इक्छा करैछै त, बनाबैसे पहिने आपनसङे खरच-बरच छै कि नै तकर हिसाब किताब नै करैछै? 29 अगर, जग खुइनके बनाइले नै सक्तै त, यि देखैबलासब ओकर मजाक उरेतै, 30 ‘यि लोक बनाइले त सुरु करल्कै महज पुरा करैले नै सक्लै’ कहतै। 31 तहिनङे, कोन एहेन रजा हेतै जे दोसर बिरोधी रजासे लराइ करैले जेतै त आपनसङे रहल दस हजार लठैतसे ओकर बिरोधमे जुध करैले आबैबला बिस हजार लठैत सङे जुध भिरे सक्बै कि नै से पहिने बिचार नै करतै? 32 अगर जुध करे नै सक्तै त, उ रजासे दुरे रहतै तहै बखत कनङके मिलापतर हेतै से परस्ताब द्याके आपन दुतके पठेतै। 33 तै खातिर तोरासबमेसे जे हमर लेल आपनसङे भेल्हा सबचिज नै छोरतै त, हमर चेला बने नै सक्तै।” नोनके सबाद ( मती ५:१३ , मरकुस ९:५० ) 34 “नोन असल चिज चियै, महज ओकर सबाद उइरजेतै त, उ फेनो कथिसे नोनगर हेतै? 35 तब उ नै त खेतके लेल, नै त मानोमे फेकैके लेल काम लाग्तै। लोकसब ओकरा फेक देतै। जकरा कान छौ, उ धियानसे सुइनके बुझ।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.