यहुदा 1 - मध्य पुरविया थारू1 हम यहुदा, येसु खिरिस्टके सेबक आ याकुबके भाइ, परमेस्वर पितासे बोल्याल आ येसु खिरिस्टसे रक्छा पाबलहासबके यि चिठी लिखैचियै। 2 तोरासबके परसस्त किरपा, सान्ती आ परेम मिले। झुठा गुरुसबके नियाय 3 हे पिरिय भाइ-भैयासब, तोरासबके आ अपनासबके भेटल मुक्तीके बारेमे हमरा लिखैले बहौत बरका इक्छा छेलै, महज आब पबितर जनसबके सबदिनके लेल सोपल बिस्बासके रक्छा कर कैहके निबेदन करैले तोरासबके लिखैले हम आबसेक बुझलियै। 4 कथिलेकी परमेस्वरके आदर नै करैबला कोइ-कोइ पैहनिए दोसी ठहरल लोकसब तोरासबके बिचमे ककरो थाह नै द्याके ढुकल छौ। उसब परमेस्वरके नै मानैछै। परमेस्वरके देल अनुगरहके अधलाह कामसब करैले हथियार बनाइनेछै तब येसु खिरिस्टके एक मातरे परभु आ मालिक चियै सेहो कहैले इन्कार करैछै। 5 तोरासबके यि सब बात थाहे छौ तैयो किछ बात याद कराइले चाहैचियौ कि परमपरभु आपन लोकसबके मिसर देससे छुटकरा कैरके आनल्कै। महज ओइसबमेसे बिस्बास नै करैबला सबके पाछे बिनास कैरदेल्कै। 6 तोरासबके याद करैबला बात यि चियौ कि, आपन अधिकारमे नै रहैबला आ आपन रहैयोबला ठाम छोरैबला स्वरगदुतसबके समेत परमेस्वर सबदिनके लेल बाइन्हके राखनेछै। उ नियायके बरका दिनमे सजाय दैकेलेल ओइसबके पतालके अन्हारमे बाइन्हके राखनेछै। 7 तहिनङे सदोम, गमोरा आ ओकर कातकरौतके सहरके लोकसब एक एक कैरके दोसर घिनौना बेबिचारके काम करे लाग्लै। उसब आइगमे नास भ्याके कहियो नै बुताइबला आइगके दन्ड पाबैबलासबके लेल उदाहरन बन्लै। 8 ओहिनङे तोरासबके बिचमे सामेल भेल्हासब ओहिनाइतेछै। उसब आपन सपनाके पछा लाइगके आपन देहके असुध बनाइछै, परमेस्वरके अधिकारके इन्कार करैछै, स्वरगके परानिसबके अपमान करैछै। 9 महज परधान स्वरगदुत मिखाएल सेहो मोसाके लहासके बारेमे सैतानसे तरक बितरक करैतखिना ओकरा अपमान कैरके दोख नै लगाइल्कै। खाली, “परभु तोरा फटकारतौ” कहल्कै। 10 महज यि लोकसब त आपनेसे नै बुझहल बातके मजाक करैछै। ओइसबके बुइध त जानबर जखाछै आ उसब ओहै कारन नास हेतै। 11 ओइसबके खातिर यि कतहेक डर हैबला बात चियै। उसब कयिनके देख्याल रस्ता चल्लै। पैसाके खातिर बलामके करलहा अधलाह कामके रस्ता गेलै तब उसब कोरह जखा बिरोध करल्कै आ उसब ओकरे जखा नास हेतै। 12 तोरासबके परेम भोजमे यि लोकसब कलंक चियौ। उसब दोसर गोराके वास्ता नै कैरके आपन पेट भरैके धियानमे रहैछै। उसब पानी बिनाके बादल जखाछै, जकरा हबा उराके ल्याजाइछै। उसब आपन समयमे फल नै फरैबला आ जैरसे उखैरके मरल गाछसब जखा चियै। 13 उसब समुन्दरके बरका झोह जखा चियै आ आपन घिन्याल बात समुन्दरके गेजुवा जखा देखाइछै। उसब अने-ओने घुमैबला तरासब जखाछै, जकरासबके लेल सबदिनके खातिर पतालके अन्धकार राखलछै। 14 आदमसे सातम पुस्ताके हनोक यि लोकसबके बारेमे एहेन अगमबानी कहनेरहै, “देख, हजारो-हजार पबितर स्वरगदुतसब सङे परभु आबैछै। 15 उ सब लोकसबके नियाय करतै। तब ओइसबके अधरमसे करल सब दुस्ट काम आ ओकर बिरोधमे हरेक घिनलागैबला बात बोलैबला दुस्ट लोकके दन्ड देतै।” 16 एहेन लोकसब सन्तोखिया नै हैछै, हरदम दोसरके गल्ती निकालैछै आ अपना सेहो नै निक इक्छासबमे चलैछै, अपनेके बरका सम्झैछै आ आपन काम बनाइले दोसरके चापलुसी करैछै। चेताबनी आ सिक्छा 17 महज, हे पिरिय भाइ-भैयासब, अपनासबके परभु येसु खिरिस्टके परेरितसबके पहिने कहलहा बातसब याद कर। 18 उसब कहने रहै, “अन्तिम बखतमे मजाक करैबलासब एतौ। उसब परमेस्वरके बात नै माइनके आपने इक्छासबमे लागल रहतौ।” 19 तोरासबके बिचमे फुट आनैबला यह्यासब चियै। जेसब सन्सारके ढाचामे चलैछै आ ओइसबमे पबितर आत्मा नै रहैछै। 20 महज, पिरिय भाइसब, तुसब एकदम पबितर बिस्बासमे बौकार हैत जो। पबितर आत्माके सक्तीमे रैहके परथना कर। 21 आपनके परमेस्वरके परेममे राख आ अनन्त जिबनके लेल अपनासबके परभु येसु खिरिस्टके किरपाके परतिक्छा कर। 22 जेसब सङका करैछै, तैसबके दया देखा। 23 दोसरके, नियायके आइगमे परलहासबके झटसे तान। दोसरके दया करैतखिना होसियार रह, पापके दाग लागलहा सबके बस्तरो सहितके घिरना कर। 24 तोरासबके पापमे परैसे बचाइले सकैबला आ आनन्दसाथ आपन महिमाके अगा तोरासबके निरदोस ठहराइले सकैबला परमेस्वरके परसन्सा हेबे। 25 अपनासबके परभु येसु खिरिस्ट दुवारा, अपनासबके मुक्ती दैबला एक मातरे परमेस्वरके सब आदर, महिमा, सक्ती आ अधिकार जुगो-जुग तलिक हैतरहे। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.