युहन्ना 7 - मध्य पुरविया थारूयेसु आ ओकर भाइसब 1 तकरबाद येसु गालिल परदेसमे घुमफिर करल्कै। उ यहुदिया इलाका दिसन जाइले नै चाहल्कै, कथिलेत यहुदीसब ओकरा जानसे मारैले मौका ताकैछेलै। 2 ओइ बखत यहुदीसबके पालके पाबैन लगचियाल छेलै। 3 तैखातिर ओकर भाइसब ओकरा कहल्कै, “यि ठाम छोइरके यहुदिया चैलजाउ, कि अहाँ जे कामसब कैररहल चियै से ओतेका चेलासब सेहो देखे। 4 जे लोक नाम कमाबैले चाहैछै, उ घोसैरके कोनो काम नै करैछै। यदि अहाँ यि काम करैचियै त अहाँ आपनेके सन्सारमे परगट करु।” 5 कथिलेत ओकर आपने भाइसब ओकरा बिस्बास नै करैछेलै। 6 तब येसु उसबके कहल्कै, “हमर लेल अखुनोतक ओते जाइले उचित समय नै एलछै। महज तोरासबके लेल कोनोभी समय उचितछौ। 7 सन्सारके लोकसब तोरासबके घिरना नै करे सक्तौ, महज हमरा त घिरना करैछै, कथिलेत उसबके काम दुस्ट छै कैहके हम गबाही दैचियै। 8 तुसब पाबैन मनाइले जो, अखुन अइ पाबैनमे हम नै जेबौ, कथिलेत हमर समय अखुन नै एलछै।” 9 यि बात कैहके येसु गालिलेमे रहलै। 10 येसुके भाइसब पाबैनमे चैलगेलाके बाद येसु सेहो गेलै। उ खुलमखुला नै महज घोसैरके गेलै। 11 यहुदीसब पाबैनमे येसुके ताकैत रहै आ लोकसबसे पुछैछेलै कि “उ कते छै?” 12 भिरके बिचमे लोकसब ओकर बारेमे गुदुरफुसुर बतियाइले लाग्लै। कोइ “उ निक छै” कहैछेलै त कोइ “उ त लोकसबके बहकाबै छै” कहैछेलै। 13 तैयो यहुदीसबके डरसे कोइ ओकर बारेमे खोइलके नै बोलैछेलै। पाबैनमे येसुके सिक्छा 14 जब पाबैनके अधा दिन बित्लै तब येसु मन्दिरमे ज्याके सिक्छा देबे लाग्लै। 15 तब यहुदी अगुवासब एकदम छक परैत एहेन कहेलाग्लै, “यि लोक बिना सिक्छा पाइबके कनङके सिखाबे सकैछै?” 16 तब येसु उसबके जबाफ देल्कै, “हमर देल सिक्छा हमर नै चियै, महज ओकर चियै, जे हमरा पठाइल्कै। 17 यदि कोइ ओकर इक्छा अनुसार काम करैले चाहैछै त से उ जाइन जेतै, कि हमर सिक्छा परमेस्वरसे एलछै, कि हम आपने मनसे बोलैचियै। 18 जे कोइ आपन मनसे बोलैछै, उ आपने महिमा ताकैछै, महज जे अपना पठाइबलाके आदर खोजैछै, उ सत लोक चियै आ ओइमे कोनो कपट नै रहैछै। 19 मोसा तोरासबके बेबस्था देल्कौ, महज तुसब कोइ नै पालन करैचिही। तोरासब कथिले हमरा मारैले मौका ताकैचिही?” 20 तब भिरके लोकसब कहल्कै, “तोरा त भुत लागल छौ। तोरा के मारैले मौका ताकैछौ?” 21 येसु उसबके जबाफदैत कहल्कै, “हम एकटा अजगुतके काम करलियौ आ सबकोइ छक परलिही। 22 महज मोसा तोरासबके खतना करैके आग्या देने छेलौ। (बास्तममे उ मोसा से नै, महज पिते-पुरखासबसे सुरु भेल छेलै।) महज तोरासब बिसरामोके दिनमे आपन बेटासबके खतना करैचिही। 23 यदि मोसाके देल बेबस्था भङ नै हेबे कैहके बिसरामके दिनमे खतना करैचिही त हम बिसरामके दिनमे एकटा लोकके निक करलियौ त कथिले तुसब हमरसे खिस्याइचिही? 24 मुह देखके नियाइ नै कर, महज ठिकसे नियाइ कर।” खिरिस्टके बारेमे लोकके बिचार 25 तब यरुसलेमके कुछ लोकसब यि कहैछेलै, “कि उ ओह्या लोक नै चियै, जकरा उसब मारैले ताकैछै? 26 देख, उ त खुलमखुला बोलैछै, महज उसब ओकरा कुछो नै कहैछै! यि त मुक्ती दैबला खिरिस्ट चियै कैहके सासकसब साँचोके थाह पाबल्कै कि कथी? 27 महज उ लोक कतेसे एलछै से हमसब जानैचियै। जब खिरिस्ट एतै, तब उ कतेसे एलछै से कोइ नै जान्तै।” 28 येसु मन्दिरमे सिखाइबखत, जोरसे कहल्कै, “तुसब हमरा चिन्हैचिही आ हम कतेसे एलचियौ सेहो तुसब जानैचिही। महज हम आपने मनसे नै एलचियौ। जे हमरा पठाइनेछै, उ सत छै आ ओकरा तोरासब नै चिन्हैचिही। 29 महज हम ओकरा चिन्हैचियै, कथिलेत हम ओकर लगसे एलचियै आ ओह्या हमरा पठाइने छै।” 30 तैखातिर उसब येसुके पकरैले ताकैछेलै, महज कोइ नै ओकर उपरमे हाथ लगाइल्कै। कथिलेत ओकर समय अखुन तलिक नै एलछेलै। 31 तैयो भिरके बहुतो लोकसब ओकर उपर बिस्बास करल्कै। तब उसब कहल्कै, “जब खिरिस्ट एतै, तब कि उ यि लोकके करलहासे बेसी अजगुतके कामसब करतै?” येसुके पकरैले चाहल्कै 32 जब फरिसीसब भिरमे येसुके बारेमे गुदुरफुसुर करैत सुनल्कै, तब मुल पुजारीसब आ फरिसीसब ओकरा पकरैले मन्दिरके पहरेदारसबके पठेल्कै। 33 तब येसु कहल्कै, “हम कुछदेर तक मातरे औरो तोरासबसङे रहबौ, तकरबाद हमरा पठाइबला लग जेबौ। 34 तुसब हमरा ताकबिही, महज नै भेटाइबिही आ हम जते रहबौ, तते तुसब आबैले नै सकबिही।” 35 ओकर एहेन बात सुइनके यहुदीसब आपसमे कहल्कै, “यि लोक कते जाइले लागलछै जे हमसब ओकरा नै भेटाइबै? कि उ गिरिक देसमे तितर-बितर भेल यहुदीसब लग जेतै आ गिरिकियोसबके सिक्छा देतै? 36 ‘तुसब हमरा ताकबिही महज नै भेटाइबिही आ हम जते रहबौ, तते तुसब आबैले नै सकबिही’?” एकर कहैके मतलब कथी चियै? जिबन दैबला पानी 37 पाबैनके अन्तिम दिन अरथात मुल दिनमे येसु ठार भ्याके जोरसे कहल्कै, “तोरासबमेसे यदि कोइ पियासल चिही त उ हमरलग आबे आ पिबे। 38 जे कोइ हमर उपर बिस्बास करैछै, पबितर धरमसास्तरमे कहल अनुसार उ लोकके हिरदयसे जिबित पानीके लदीसब बहतै।” 39 येसु यि बात पबितर आत्माके बारेमे कहने छेलै, जे पबितर आत्मा ओकरमे बिस्बास करैबलासब पाबैले लागलछेलै। ओइ बखत तक परमेस्वर पबितर आत्माके नै पठेने छेलै, कथिलेत येसु आपन स्वरगके महिमामे घुइमके नै गेलछेलै। लोकसबमे बेमेल 40 जब भिरके लोकसब येसुके यि बात सुनल्कै तब कुछ लोकसब कहल्कै, “साँचोके यि लोक त आबैबला अगमबक्ता चियै।” 41 कुछ लोकसब कहै, “यि त मुक्ती दैबला खिरिस्ट चियै।” महज कोइ-कोइ कहै जे, “कि खिरिस्ट गालिलसे एतै? 42 पबितर धरमसास्तरमे खिरिस्ट रजा दाउदके बंससे आ दाउदेके गाम बेथलेहेमसे एतै कैहके लिखल नै छै से?” 43 तैखातिर लोकसबके बिचमे येसुके कारन बेमेल भेलै। 44 ओइसबमेसे कतहेक गोरे ओकरा पकरैले चाहैछेलै, महज कोइ नै ओकर उपरमे हाथ लगाइल्कै। यहुदी धरमगुरुसबके अबिस्बास 45 तब मन्दिरके पहरेदारसब मुल पुजारीसब आ फरिसीसब लग घुइमके एलै। उसब पहरेदारसबके कहल्कै, “तुसब कथिले येसुके पकैरके नै आनलिही?” 46 पहरेदारसब जबाफ देल्कै, “उ लोक जखा त अखुनतक कोनो लोक नै बोल्नेछै!” 47 तब फरिसीसब उसबके कहल्कै, “तुहुसब धोखामे परलिही कि कनङ? 48 कि कोनो सासकसब या फरिसीसब ओकर उपर बिस्बास करने छै से? 49 महज भिरमे भेल ओकर पछा चलैबला लोकसब बेबस्थाके बारेमे कुछो नै जानैछै, से सब सरापित छै।” 50 ओते भेलमेसे एक गोरे निकोदेमस, जे पहिन्का बेर येसु लग एलछेलै आ उ कहल्कै, 51 “अपनासबके बेबस्था अनुसार दोस लग्याल लोकके बात नै सुइनके आ उ कथी करैछै से नै जाइनके ओकर नियाइ करैले मिलैछै से?” 52 तब उसब ओकरा जबाफ देल्कै, “कि तुहु गालिली चिही? पबितर धरमसास्तरमे खोज आ तोरा थाह हेतौ कि, गालिलसे कोनो अगमबक्ता नै एतै।” 53 [तकरबाद सबलोक आपन-आपन घर दिसन गेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.