युहन्ना 3 - मध्य पुरविया थारूलबका जलमके बारेमे सिक्छा 1 निकोदेमस नामके एकटा फरिसी लोक यहुदी महासभाके सदस रहै। 2 राइतमे उ येसु लग आइबके कहल्कै, “गुरु जी, अहाँ परमेस्वरके पठाल गुरु चियै से हमसब जानैचियै, कथिलेत अहाँके करल अजगुतके कामसब जखा कोनो लोक परमेस्वरके सहायता बेगर करैले नै सक्तै।” 3 येसु निकोदेमसके कहल्कै, “साँचोके हम तोरासबके कहैचियौ, जाबेतक फेनोसे लोक नया कैरके जलम नै लेतै ताबे तक उ परमेस्वरके राज देखे नै सक्तै।” 4 निकोदेमस ओकरा पुछल्कै, “बुढ भ्यागेल लोक फेनो कनङके जलमतै? उ फेनो आपन माँ के कोइखमे ढुइकके कनङके जलम ल्या सकैछै?” 5 तब येसु ओकरा जबाब देल्कै, “हम तोरा साँचोके कहैचियौ, जाबेतक कोइ पानी आ आत्मासे जलम नै लेतै ताबेतक परमेस्वरके राजमे परबेस करैले नै सक्तै। 6 लोक त खाली देहमे जलम दैछै महज पबितर आत्मा आत्मिक जलम दैछै। 7 हम तोरासबके कहैचियौ नया कैरके जल्मे परतौ से बात सुइनके अजगुत नै मान। 8 हबाके जने बहैले मन लागैछै तने बहैछै। हबाके अबाज त तुसब सुनैचिही, महज कतेसे आबैछै आ कते जाइछै से नै जानैचिही। ओहिनङ लोकसब आत्मासे कनङ जलम लैछै से बात तु नै जानैचिही।” 9 तब निकोदेमस ओकरा कहल्कै, “यि सब कनङ भ्यासकैछै?” 10 तब येसु जबाब देल्कै, “तु त इजराएलके गुरु चिही, तैयो यि बात नै बुझैचिही? 11 साँचोके हम तोरा कहैचियौ, जे बात हमसब जानैचियै, ओह्या बात हमसब कहैचियै आ जे बात देखने चियै ओहैके गबाही दैचियै, महज तैयो तुसब हमरासबके गबाहीके सुइकार नै करैचिही। 12 हम अहै सन्सारके बात कहैचियौ त तुसब बिस्बासे नै करैचिही, यदी हम स्वरगके बात कहबौ त तुसब औरो कनङके बिस्बास करे सकबिही? 13 स्वरगसे उतैरके एल हम मानबके बेटा बाहेक कोइ नै स्वरगमे चरहल छै। 14 उजार जगहमे जहिनङ मोसा पितैरके साँपके उठेल्कै तहिनङे मानब-बेटा उठाल जेतै। 15 अहिनङ जेसब ओकरमे बिस्बास करतै, से सब अनन्त जिबन पाबतै।” 16 कथिलेकी परमेस्वर सन्सारके लोकसबके एहेन परेम करल्कै कि उ आपन एकलौता बेटाके देल्कै। ओकर उपर बिस्बास करैबला नास नै हेतै, महज उ अनन्त जिबन पाबतै। 17 परमेस्वर त आपन बेटाके सन्सारके दोसी ठहराबैके लेल नै महज ओकरसे सन्सारके लोकसब बचे कैहके पठेल्कै। 18 ओकर उपर बिस्बास करैबला कोइने दोसी ठहरतै, महज ओकर उपर बिस्बास नै करैबलासब पहिने दोसी ठहैरगेलछै। कथिलेत उसब परमेस्वरके एकलौता बेटाके बिस्बास नै करने छै। 19 इजोत सन्सारमे एलछै आ लोकसब इजोतके बदला अन्हारके परेम करल्कै। कथिलेत ओइसबके काम दुस्ट छेलै। अहै कारन उसब दोसी ठहरतै। 20 दुस्ट काम करैबलासब इजोतके घिरना करैछै आ ओइसबके करल दुस्ट कामसब देखलेतै कैहके इजोतमे नै आबैछै। 21 महज सत काम करैबला लोकसब इजोतमे आबैछै आ अहिनङे ओकर करल कामसब परमेस्वरके इक्छा अनुसार चियै से निकसे देखैछै। बप्तिस्मा दैबला युहन्नाके गबाही 22 तकरबाद येसु आ ओकर चेलासब यहुदीया परदेसके गाम दिसन गेलै आ उसब कुछदिन तक ओतै रैहके लोकसबके बप्तिस्मा देल्कै। 23 युहन्ना सेहो सालीमके कात एनोनमे बप्तिस्मा दैत रहै कथिलेकी ओते बहौत पानी छेलै। लोकसब ओते आबैछेलै आ बप्तिस्मा लैछेलै। 24 (तै बखत तक युहन्ना जहलमे नै परल रहै।) 25 ओहै बखत युहन्नाके चेलासब एकटा यहुदी सङे सुध हैके बारेमे बताबती करे लाग्लै। 26 उसब युहन्ना लग आइबके कहल्कै, “गुरु जी, यरदन लदीके ओइपार जे अहाँसङे रहै, जकर बारेमे अहाँ गबाही देने रहियै, से बप्तिस्मा द्यारहलछै आ सब गोरा ओकरे लग जाइछै।” 27 युहन्ना जबाफ देल्कै, “जाबेतक परमेस्वरसे नै देतै ताबे तक लोकके कुछो नै मिल्तै। 28 ‘हम मुक्ती दैबला खिरिस्ट नै चियै, महज हम ओकरसे पैहने पठाल लोक चियै’ जे हम कहलियौ से बातके तुसब आपनेसे सुन्ने चिही। 29 जकरसङे कनिया छै वह्या बर चियै। बरसङे ठार हैबला बरेके अबाज सुइनके बहौत खुसी हैछै। अहैलेल हमर यि खुसी आब पुरा भेलछै। 30 उ बढते जाइत रहे, महज हम घटते जाइत रही।” स्वरगसे एल्हा बेटा 31 जे उपरसे एलछै उ सबसे महान छै। सन्सारमे जलमल लोक सन्सारके हैछै आ सन्सारेके बात करैछै। महज जे स्वरगसे आबैछै उ सबसे महान छै। 32 उ जे बात देखनेछै आ सुन्नेछै, उ तहै बातके गबाही दैछै, महज ओकर गबाही कोइ नै सुइकार करैछै। 33 महज जे ओकर गबाही सुइकार करने छै, उ लोक परमेस्वर सत छै कैहके गबाही दैछै। 34 परमेस्वरसे पठाएल लोक परमेस्वरेके बात बाजैछै कथिलेत परमेस्वर ओकरा आपन आत्मा भरपुर कैरके दैछै। 35 परमेस्वर आपन बेटाके परेम करैछै आ सब चिज ओकरे हाथमे राइखदेनेछै। 36 जे कोइ परमेस्वरके बेटामे बिस्बास करैछै, ओकरसङे अनन्त जिबन छै। जे कोइ परमेस्वरके बेटाके नै मानैछै, से कोइ अनन्त जिबन नै पाबतै महज ओकर उपर परमेस्वरके करोध परतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.