युहन्‍ना 16 - मध्‍य पुरविया थारू

¹ “तोरासबके बिस्‍बास नै घटे कैहके हम यि सब बात तोरासबके कहनेचियौ।

² उसब तोरासबके सभाघरसबसे निकाइल देतौ। तोरासबके उपर अहिनङो समय एतौ, जे तोरासबके जानोसे मारैबला ‘परमेस्‍वरके सेबा करैचियै’ कैहके सोच्‍तै।

³ उसब पिताके आ हमरा नै चिन्‍हैछै, तै कारन उसब एहेन काम करतौ।

⁴ महज यि सब बातसब हम तोरासबके कैह देनेचियौ, ‘जब उ समय एतौ, तोरासबके कथी कहने रहौ से बात थाह हेतौ। पैहने हम यि बात तोरासबके नै कहलियौ, कथिलेत हम तोरेसबसङे रहियौ।’

पबितर आत्‍माके काम

⁵ “आब हम हमरा पठाइबला लग जाइचियै, महज ‘अहाँ कते ज्‍यारहल चियै?’ कैहके तुसब कोइ नै हमरा पुछैचिही।

⁶ हमर एह्‍या बात बतेलाके कारनसे तोरासबके मन दुखसे भरल छौ।

⁷ महज साँचोके हम तोरेसबके कहैचियौ, हम अतेसे जेबौ तब मातरे तोरासबके असल हेतौ। कथिलेत यदी हम नै जेबौ त तोरासबके सल्‍लाह दैबला पबितर आत्‍मा तोरासबके लग नै एतौ। महज जब हम जेबौ, तब हम ओकरा तोरासबके लग पठाइबौ।

⁸ जब उ एतौ त सन्‍सारके लोकसबके पाप, धारमिकता आ परमेस्‍वरके नियाइके बिसयमे कैरते आइबरहल भुलसब देखाइतौ,

⁹ कथिलेत उसब हमरमे बिस्‍बास नै करैछै।

¹⁰ उ परमेस्‍वरके अगामे धारमिकताके बारेमे कथी असल चियै, ओह्‍या देखादेतौ कथिलेत हम पितालग जाइचियौ। आबसे फेनो तुसब हमरा नै देखबिही।

¹¹ उ तोरासबके परमेस्‍वरके नियाइ कथी चियौ से देखादेतौ। कथिलेत यि सन्‍सारके रजा पहिने दोसी ठहैर गेलछै।”

¹² “हमरा तोरासबके कहैबला बातसब त बहौत छै, महज अखुन तुसब नै सहे सकबिही।

¹³ महज सतके आत्‍मा जब एतौ तब उ तोरासबके सब बातसब बुझाइतौ। उ आपने दिसनसे बात नै करतौ महज उ जे सुन्‍तौ, ओह्‍या तोरासबके कहतौ तब पाछे हैबला बातसब सोहो कहतौ।

¹⁴ उ हमर महिमा करतौ, कथिलेत जे हमर चियै, से हमरसे ल्‍याके तोरासबके कैहदेतौ।

¹⁵ जे किछ पिताके चियै, से सब हमर चियै। अहै खातिर हम कहैचियौ, जे हमर चियै से हमरसे ल्‍याके सतके आत्‍मा तोरासबके कैहदेतौ।”

चेलासबके दुख आ सुख

¹⁶ “आब तुसब कन्‍हिक देरके बाद हमरा नै देखबिही, तब कन्‍हिके देरमे तुसब फेनो हमरा देखबिही।”

¹⁷ “‘कन्‍हिके देरके बाद तुसब हमरा नै देखबिही, तकरबाद फेनो कन्‍हिक देरमे हमरा देखबिही’ ‘कथिलेत हम पितालग ज्‍यारहल चियै’, यि बातके अरथ कथी चियै?” से कैहके ओकर चेलासब एक दोसरके पुछे लाग्‍लै।

¹⁸ उसब कहेलाग्‍लै, “ओकर ‘कन्‍हिके देर बाद’ कहनाइ के अरथ कथी चियै? हमसब नै बुझैचियै, उ कथी कहैछै।”

¹⁹ उसब ओकरा पुछेके इक्‍छा करैछै से बात जाइनके येसु ओइसबके पुछल्‍कै, “‘कन्‍हिक देरके बाद तुसब हमरा नै देखबिही, तब कन्‍हीक देरमे फेनो हमरा देखबिही’ से हमर कहल बातमे कि तुसब आपसमे पुछा-पुछी नै करैचिही?

²⁰ साँचोके हम तोरासबके कहैचियौ, तुसब कानबिही आ खिजबिही, महज सन्‍सार खुसी हेतौ। तुसब दुखमे परबिही, महज तोरासबके दुख, खुसी आ आनन्‍दमे बदैल जेतौ।

²¹ जब एकटा जनी बच्‍चाके जलम दैतखिना दरदसे छटपटाइत रहैछै, कथिलेत ओकर समय आइबगेल रहैछै महज बच्‍चाके जलम दैत मातर ओकरा ओइ दरदके याद नै आबैछै कथिलेत सन्‍सारमे एकटा बच्‍चाके जलम भेलै, तै बातमे उ खुसी हैछै।

²² अहिनङे अखुन तुसब सोक करबिही, महज हम फेनो तोरासबके भेटैले एबौ त तोरासबके हिरदय खुसीसे भरतौ। तब कोइ नै तोरासबके खुसी तोरासबसे छिन्‍तौ।

²³ ओइ दिन तुसब हमरा कुछो नै पुछबिही। हम साँचोके कहैचियौ, तुसब हमर नाममे पिता सङे जे माङबिही, से उ तोरासबके देतौ।

²⁴ अखुनोतक तुसब हमर नाममे कुछो नै माङनेचिही। माङ त तुसब पाबबिही आ तहैसे तोरासबके आनन्‍द पुरा हेतौ।

चेलासबके लेल सान्‍ती

²⁵ “यि बात हम तोरासबके खिसा-पिहानीसबमे कहनेचियौ। महज समय आइबरहल छौ, तैबखत हम तोरासबके सङे फेनो खिसा पिहानीमे नै बाज्‍बौ, बल्‍की पिताके बिसयमे साफ-साफ कैहदेबौ।

²⁶ तै बखत तुसब आपनेसे हमर नाममे माङबिही। हम तोरासबके खातिर पिता सङे माइङ देबौ कैहके नै कहे परतौ।

²⁷ पिता आपनेसे तोरासबके परेम करैछौ, कथिलेत त तुसब हमरा परेम करनेचिही आ हम परमेस्‍वर लगसे एलचियै से तुसब बिस्‍बास करनेचिही।

²⁸ हम पितालगसे सन्‍सारमे एलचियै, आब फेनो सन्‍सार छोइरके पितालग घुइमके ज्‍यारहल चियै।”

²⁹ तब चेलासब येसुके कहल्‍कै, “अखुन अहाँ खिसामे नै महज साफ-साफ बाजैचियै।

³⁰ आब हमसब जाइन गेलियै, कि अहाँ सब बात जानैचियै। आब अहाँसे ककरो नै कोनो सबाल करे परतै। अहै कारन हमसब अहाँमे बिस्‍बास करैचियै, कि अहाँ परमेस्‍वरसे पठ्‍याल चियै।”

³¹ येसु ओइसबके जबाब देल्‍कै, “कि आब त तुसब बिस्‍बास करैचिही?

³² देख! समय आइबरहल छै, हँ, लग चैलएलै, जब तुसब चारुदिसन छिरिया जेब्‍ही। तुसब भाइगके आपन-आपन घर जेब्‍ही महज हमरा असगरे छोइर देब्‍ही। तैयो हम असगरे नै चियै, कथिलेत हमरसङे पिता छै।

³³ “हम तोरासबके यि बात अहै खातिर कहनेचियौ, कि हमरमे रैहके तोरासबके सान्‍ती हेबे। सन्‍सारमे तोरासबके सङकट हेतौ, महज साहस कर, हम सन्‍सारके जितलेने चियै।”