युहन्ना 1 - मध्य पुरविया थारूबचन लोक भ्याके एलै 1 सिरिस्टी हैसे पहिने बचन रहै। बचन परमेस्वरसङे रहै आ बचने परमेस्वर रहै। 2 उ सुरुवेसे परमेस्वरसङे छेलै। 3 सबचिज परमेस्वर ओकरेसे सिरिस्टी करल्कै। सिरिस्टी भ्याल चिजसबमेसे एकोटा चिज ओकरबिना नै बन्लै। 4 बचन सिरिस्टी भेल सब चिजके जिबन दैबला छेलै। यि जिबन दैबला लोकसबके लेल इजोत छेलै। 5 उ इजोत अन्हारमे चम्कैछै आ अन्हार कहियो नै इजोतके मुझाइले सकल छै। 6 परमेस्वरसे पठ्याल एकटा युहन्ना नामके लोक छेलै। 7 ओकरेसे सबकोइ इजोतमे बिस्बास करे कैहके इजोतके गबाही दैले उ साक्छी भ्याके एलै। 8 युहन्ना आपने इजोत नै छेलै, महज इजोतके बारेमे गबाही दैले एलछेलै। 9 साँचोके इजोत उ चियै जे सन्सारके सबकोइके इजोत दैछै उ इजोत आइबरहल छेलै। 10 उ सन्सारमे छेलै, सन्सार ओकरेसे बन्लै, तैयो सन्सार ओकरा नै चिन्हल्कै। 11 उ आपने लोकसबलग एलै, महज ओकर आपने लोकसब ओकरा सुइकार नै करल्कै। 12 जेसब ओकरा सुइकार करल्कै आ ओकरमे बिस्बास करल्कै, तैसबके उ परमेस्वरके धियापुता हैके हक देल्कै। 13 उसब नै त लहुसे, नै त सारिरीक इक्छासे, नै लोकके कोनो इक्छासे महज उसब परमेस्वरसे आत्मिक रुपमे जल्मैछै। 14 तब बचन लोक बैनके अपनासबके बिचमे बास करल्कै आ अपनासब ओकर महिमा देखलियै, जे महिमा परमेस्वरसे आबैबला एक मातरे बेटामे छेलै। उ आपनौरके पुरा रुपसे अनुगरह करैछै आ सत बात मातरे बोलैछै। 15 युहन्ना ओकरे बारेमे गबाही दैत जोरसे कहल्कै, “हमरसे पछा आबैबला हमरसे बहौत महान छै, कथिलेत उ हम जलमैसे पैहनैयेसे छेलै। यि ओह्या लोक चियै, जकर बारेमे सब बात हम कहने छेलियौ।” 16 ओकरे अनुगरहसे उटुङ-टुटुङ भैरके आसिस उपर आसिस मिलरहल छै। 17 कथिलेत बेबस्था मोसासे एलै, महज अनुगरह आ सत्यता येसु खिरिस्टसे एलै। 18 परमेस्वरके कोइ नै कहियो देखनेछै। महज पिताके लगमे रहैबला ओकर एकलौता बेटा ओकरा हमरासबलग परगट करने छै। बप्तिस्मा दैबला युहन्ना ( मती ३:१-१२ , मरकुस १:१-१८ , लुका ३:१-१८ ) 19 जखन यहुदी अगुवासब यरुसलेमसे पुजारी आ लेबीके युहन्ना लग “तु के चिही?” कैहके पुछैले पठेल्कै। 20 युहन्ना नै अकमक्याके सिधा जबाफदैत कहल्कै, “हम मुक्ती दैबला खिरिस्ट नै चियौ।” 21 तब उसब ओकरा पुछल्कै, “कि तु एलिया चिही त?” युहन्ना जबाब देल्कै, “नै।” “तब कि तु अगमबक्ता चिही त?” उ जबाफ देल्कै, “नै।” 22 तब उसब फेनो ओकरा कहल्कै, “कह त, तोहे के चिही? हमरासबके पठाइबलाके जबाब दैलेपरतै। तु आपन बारेमे कथी कहैचिही त?” 23 युहन्ना कहल्कै, “यसैया अगमबक्ता कहने रहै, ‘परभुके आबैबला रस्ता दुरुस कर’ कैहके हम उजार जगहमे जोरसे कहैबलाके एकटा अबाज चियै।” 24 यि पुछे आबैबला लोकसबके फरिसीसब पठाइनेरहै। 25 तब उसब युहन्नाके पुछल्कै, “यदी तु खिरिस्टो नै चिही, एलियो नै चिही आ कोनो अगमबक्तो नै चिही त, कथिले बप्तिस्मा दैचिही?” 26 युहन्ना जबाब देल्कै, “हम त पानीसे मातरे बप्तिस्मा दैचियै। महज तोरासबके बिचमे एक गोरा ठार छौ, तकरा तुसब नै चिन्हैचिही। 27 हमरसे पछा आबैबला ओह्या चियौ। जकर हम जुताके फितो तक खोलैके जोकर नै चियै।” 28 यि सब बात यरदन लदीके ओहै कात बेथानिया कहैबला ठाममे भेलै, जते युहन्ना बप्तिस्मा दैतरहै। परमेस्वरके थुमा येसु 29 तकर बिहानके युहन्ना येसुके आपन दिसन आबैत देखके कहल्कै, “देख, यि सन्सारके पाप उठाके लजाइबला परमेस्वरके थुमा चियै। 30 ओकरे बारेमे हम कहने छेलियौ, ‘हमरसे पछा एक गोरा आबैछौ, उ हमरसे महान छै कथिलेत उ हम जलमैसे पैहनैयेसे छेलै।’ 31 उ के चियै से हम्हु नै चिन्हैछेलियै, महज ओकरा इजराएलीसबके बिचमे परगट हेबे कैहके हम पानीके बप्तिस्मा दैत एलियै।” 32 युहन्ना अहिनङ कहैत गबाही देल्कै, “हम परमेस्वरके आत्माके पौरकीके रुपमे स्वरगसे उतैरके ओकर उपर बैठल देखलियै। 33 साँचोके उ के चियै से हम नै चिन्है छेलियै, महज जे हमरा पानीसे बप्तिस्मा दैले पठाइल्कै ओह्या हमरा कहल्कै, जकर उपरमे पबितर आत्मा उतैरके बैठल देखबिही ओह्या पबितर आत्मासे बप्तिस्मा दैबलाहेतौ। 34 हम यि सब देख्ने चियै आ गबाही दैचियै कि, ओह्या परमेस्वरके बेटा चियै।” येसुके पहिन्का चेलासब 35 फेनो दोसर दिन युहन्ना आपन चेलासबमेसे दुइगोरा सङे ओहै ठाममे ठारभेल छेलै। 36 येसुके लगे बाटे जाइत देखके उ कहल्कै, “देख, एह्या चियौ परमेस्वरके थुमा।” 37 यि बात सुइनके दुइ गोरा चेलासब येसुके पछा लाग्लै। 38 येसु पछामाथे घुइमके ताकल्कै त ओइसबके आपन पछा लागल देखके पुछल्कै, “तुसब कथी ताकैचिही?” उसब जबाब देल्कै, “रब्बी, (जकर अरथ गुरु जी चियै) अहाँ कते रहैचियै?” 39 तब येसु जबाब देल्कै, “आइबके देख!” उसब ओकरसङे ज्याके ओकर रहैबला ठाम देखल्कै आ ओइ दिन ओकरेसङे रहलै। कथिलेकी तै बखत बेरियाके चार बजे लागल छेलै। 40 युहन्नाके बात सुइनके येसुके पछुवाइबला दुइगोरामेसे एक गोरा सिमोन पतरुसके भाइ अन्दरियास रहै। 41 अन्दिरियास सबसे पहिने आपन भैया सिमोन पतरुसके भेटके कहल्कै, “हमसब मसिहके भेटलियै।” (हिबरु भसामे खिरिस्टके मसिह कहैछै।) 42 अन्दिरियास सिमोनके येसु लग ल्यागेलै। येसु सिमोनके देखके कहल्कै, “तु युहन्नाके बेटा सिमोन चिही। देख तु केफास कहाइबिही।” (केफास गिरिक भसामे पतरुस कहैछै।) येसु फिलिप आ नथानेलके बोलाइल्कै 43 तकर बिहानके येसु गालिल इलाका जाइले निरनय कैरके निकललै। तहै बखत ओकरा फिलिपसङे भेट भेलै आ उ ओकरा कहल्कै, “हमर पछा लाग।” 44 अन्दरियास आ पतरुसे जखा फिलिपो बेथसेदा सहरमे रहैबला रहै। 45 तकरबाद फिलिप नथानेलके भेटके कहल्कै, “हमरासबके उ भेटलै जकर बारे धरमसास्तरमे मोसाके बेबस्था आ अगमबक्तासब सेहो लिखने छेलै। उ योसेफके बेटा नासरतके येसु चियै।” 46 यि सुइनके नथानेल कहल्कै, “कि नासरतसे कोनो निक बात आइब सकैछै?” तब फिलिप ओकरा कहल्कै, “आइबके देखले।” 47 नथानेलेके आपन दिसन आबैत देखके येसु कहल्कै, “देख, उ पक्के इजराएली चियै, ओकरमे कोनो छलकपट नै छै।” 48 तब नथानेल पुछल्कै, “अहाँ हमरा कनङके चिन्हलियै?” येसु जबाब देल्कै, “फिलिप तोरा बोलाइसे पैहनैये हम तोरा अन्जिरके गाछतरमे रहैत खिना देखने छेलियौ।” 49 नथानेल जबाब देल्कै, “गुरु जी, अहाँ परमेस्वरके बेटा चियै! अहाँ त इजराएलके रजा चियै।” 50 येसु ओकरा जबाब देल्कै, “हम तोरा अन्जिरके गाछ तरमे देखलियौ कहलियौ त तु बिस्बास करलिही? तु त अहौसे बरका-बरका कामसब देखबिही।” 51 येसु फेनो कहल्कै, “साँचोके हम तोरासबके कहैचियौ, तुसब स्वरग उघरैत आ परमेस्वरके स्वरगदुतसबके मानब-बेटाके उपरमे चरहैत आ उतरैत देखबिही।” |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.