याकुब 5 - मध्य पुरविया थारूधनिकसबके चेताबनी 1 हे धनिक लोकसब, हमर बात सुन! तुसब बिलाप कैर-कैरके कान, कथिलेत तोरासबके जिबनमे बहौत बिपत आबैबला छौ। 2 तोरासबके धन-सम्पैतमे घुन लाइग गेलछौ। बस्तरके दिबार खाइने छौ। 3 सोना-चानीमे बिज लाइग गेल्छौ। एह्या बिज तोरासबके बिरोधमे गबाही देतौ आ आइगके जखा तोरासबके देहके जराइतौ। यि जुगके अन्तके दिनमे तुसब धन-सम्पैतके ढेरी लगाइनेचिही। 4 देख! जे जन-बनिहार तोरासबके खेतमे बालि-नाली समेटदेल्कौ तकरा तुसब बैन नै दैके कारनसे उसब कानैखिजैछै। तैसबके पुकार सरबसक्तिमान परमपरभु परमेस्वरके कान तलिक पुइग गेलछौ। 5 तुसब पिरथिबीमे बहौत भोग-बिलासके जिन्गी बिताइने चिही आ भोग हैबला दिनके खातिर आपन देह पाइलके राखनेचिही। 6 तोरासबके बिरोधो नै करैबला निरदोससबके तुसब दोख लग्याके मारलिही। धिरज आ परथना 7 अहै खातिर हे भाइ-भैयासब, परभु नै आबैतलिक धिरज धैरके रह। देख, खेति-किसानी करैबला अगिल्का आ पछिल्का बरखा नै है तलिक धिरज धैरके कनङ जमिनसे बहुमुल्य उबजनीके लेल असियाल रहैछै। 8 तहिनङे तुहुसब धिरज राख, हिम्मत नै हार। कथिलेकी परभुके आबैबला दिन लगचिया गेलछै। 9 हौ भाइ-भैयासब, एक-दोसरके बिरोधमे नै गनगनाइत रह, नै त तुसब दोसी ठहरबे। देख, नियाय करैबला देहरीएमे आइबगेलछौ। 10 हे भाइ-भैयासब, दुख कस्टमे धिरज कैरके सहैबला आ परभुके नाउमे बचन बोलैबला अगमबक्तासबके याद कर। 11 धिरज करैबला लोक आसिस पाबैछै से बात हमसब जानैचियै। अय्युब धिरज राखल्कै आ परभु ओकरा दया आ किरपा देखाइल्कै से बात ओकर जिबनमे अस्पस्ट देखापरैछै। 12 हे हमर भाइ-भैयासब, सबसे बरका बात त यि छै जे स्वरगमे या पिरथिबीमे भेल या औरो कोनो चिजके नाउमे किरिया नै खो। बरु तुसब दोसी नै ठहरैके लेल “हँ” त “हँ” आ “नै” त “नै” कह। 13 यदि तोरासबमेसे कोइ समस्यामे छै त, उ परथना करे। कोइ खुसी छै त, उ परसन्साके गित गाबे। 14 कोइ बिमार छै त, उ मन्डलीके अगुवासबके बोलाबे तब उसब परभुके नाउमे तेलसे अभिसेक कैरके ओकर खातिर परथना करतै। 15 बिस्बास साथ करल परथनासे बिमारी निक हेतै तब परभु ओकरा निक कैरदेतै। उ लोक पाप करने रहतै तैयो छमा पाबतै। 16 ओहैसे यदि निक हैले चाहैचियै त आपन करल पाप एक-दोसरके अगा सुइकार कर आ एक-दोसरके खातिर परथना कर। धरमी लोकके करल परथनासे परमेस्वर सक्तिसाली आ परभावकारी तबरसे काम करैछै। 17 एलियो आपने सबके जखा लोक रहै। उ पानी नै परे कैहके भक्तिसाथ परथना करल्कै त, साढे तिन बरिस तलिक पानी नै परलै। 18 उ फेनसे पानी परे कैहके परथना करल्कै, तब अकाससे पानी परलै आ जमिन उबजनी देल्कै। 19 हे हमर भाइ-भैयासब, कोइ सतके बाटसे भटैकके जेतै आ कोइ ओकरा घुम्याके आन्तै त, 20 उ लोक जाने कि, एक गोरा पापीके ओकर गलत बाटसे घुमाके लाबैछै त, ओकरा मिरतुके मुहसे बचाइतै आ बहौत पाप छमा पाबैके लेल सहायता करतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.