याकुब 4 - मध्य पुरविया थारूसन्सारसे दोस्ती 1 तोरासबके बिचमे लराइ आ झगरासब कोन बातसे आनैछौ? कि यि सब तोहर देहके भोगबिलासके अभिलासासे नै आबैछौ, जे तोरासबके भितरमे सङघर्स करैत रहैछौ? 2 तुसब इक्छा त करैचिही, महज नै पाबैचिही। तुसब हतिया आ लालच करैचिही महज पाबे नै सकैचिही। तुसब लराइ आ झगरा करैचिही, महज तोरासबसङे नै रहैछौ, कथिलेकी तुसब परमेस्वरसे नै माङैचिही। 3 तुसब माङैचिही महज नै पाबैचिही, कथिलेकी आपन अभिलासा पुरा करैके लेल बेठिक हिसाबसे माङैचिही। 4 हे बेबिचारी लोकसब! परमेस्वरके छोइरके यि सन्सारके खराब चालचलनमे चलैबला लोकसब परमेस्वरके दुस्मन हैछै से बात तोरौरके थाह नै छौ? अहैलेल यदि कोनो लोक यि सन्सारके खराब चालचलनमे चल्तै, उ परमेस्वरके दुस्मन चियै। 5 कि तुसब यि सम्झैचिही कि, पबितर धरमसास्तर बेरथमे एहेन कहैछै, “परमेस्वर अपनासबमे राइखदेने छै तै आत्माके लेल उ एकदमसे डाह करैछै?” 6 बास्तममे परमेस्वर औरो बेसि अनुगरह करैछै। जनङकी पबितर धरमसास्तरमे लिखल छै, “परमेस्वर घमन्डी लोकसबके बिरोध करैछै, महज नम्रसबमे अनुगरह करैछै।” 7 तै खातिर परमेस्वरके अधिनमे रह। सैतानके बिरोध कर आ उ तोरासबके लगसे भाइगजेतौ। 8 तुसब परमेस्वरके लगमे या तब परमेस्वरो तोरासबके लगमे एतौ। हे पापीसब, तोरौरके हाथ सुध कर, हे दोमनके लोकसब, आपन हिरदय सुध कर। 9 तुसब सोक मना, कान आ बिलाप कर। आपन हसीके सोकमे आ आपन खुसीके उदासिमे बदैलले। 10 परभुके अगा नम्र बन, तब उ तोरासबके उपर उठाइतौ। भाइके निन्दा करैके बिरोधमे चेताबनी 11 हे भाइ-भैयासब, तुसब एक-दोसरके बिरोधमे खराब बात नै बोल। जे आपन भाइके बिरोधमे खराब बात बोल्तै या आपन भाइके दोख लगाइतै, उ बेबस्थाके बिरोधमे बोल्तै आ बेबस्थाके दोस लगाइतै। यदि तु बेबस्थाके दोसी ठहराइचिही त, तु बेबस्थामे लिखल अनुसार नै चलैचिही, महज तु आपनेके बेबस्थासे बेसी अधिकार भेल नियायधिस सम्झैचिही। 12 बेबस्था दैबला आ नियाय करैबला त एके छै, जे बचाइछै आ नासो करे सकैछै। महज आपन परोसियाके दोख लगाइबला तु के चिही? घमन्डके बिरोधमे चेताबनी 13 तुसब “आइ कि बिहान अपनासब कोनो सहर ज्याब, ओते एक बरिस रैहके बेपार करब आ धन कमाएब” कैहके घमन्ड करैबलासब एते सुन। 14 बिहानके कथी हेतै, तुसब किछो नै जानैचिही। तोहर जिन्गी कथी चियौ? तोरासबके जिन्गी त कुछ समय देखा परैबला आ बिल्या जाइबला बाँफ जखा त चियौ। 15 तोरौरके त अनङ कहैके चाही, “यदि परमेस्वरके इक्छा हेतै त हमसब जिबित रहब आ एहेन-ओहेन करब।” 16 महज तुसब त घमन्डी भ्याके आपन बन्याल योजनामे खुब धाख लगाइचिही। एहेन घमन्ड करनाइ निक बात नै चियै। 17 कोइ असल करे परैछै कैहके बुझने रहैछै महज बुझियोके नै करैछै त, उ पाप करैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.