याकुब 3 - मध्य पुरविया थारूआपन मुहके सैतके राख 1 हे हमर भाइ-भैयासब, तोरासबमेसे बहौत गोरा मन्डलीमे बचन सिखाइबला हैले नै खोज, कथिलेकी सिक्छा दैबलाके नियाय दोसर लोकसे बेसी कठोरसे हेतै से तुसब जानैचिही। 2 बास्तममे अपनासब भुलचुकमे बहौतरा गल्ती करैचियै। बोलि-बचनमे कहियो गल्ती नै बाजैबला लोक सिध लोक चियै। उ लोक आपन पुरा सरिरमे लगाम लगाइले सक्तै। 3 अपनासब घोराके आपन बसमे राखैले मुहमे लगाम लग्यादैचियै तब जने लजाइले चाहैचियै तने लजाइले सकैचियै। 4 तैहनङ कैरके बरका पानी जहादो तेज बहैबला हबासे चलैछै। तैयो जहाज चलाइबला ओकरा छोट पतबारसे जने भरा मन हैछै तने भरा घुम्याके लजाइले सकैछै। 5 तहिनङे मुह देहके एकटा छोट अङ चियै, महज बरका-बरका बातमे घमन्ड करैछै। छोटसे छोट आइगके लुतीसे बरकासे बरका जङगलमे आइग लगादैछै। 6 मुह आइगे जखा चियै। यि देहके अङसबमे सबसे दुस्ट चियै। यि पुरे जिबनमे कलंक लगाइछै। यि नरकके आइग पजाइरके पुरे जिनगिमे आइग लग्यादैछै। 7 सब परकारके जानबर, चिरै-चुरगुन, जमिनमे ससरैबला आ समुन्दरके सब जिबसबके लोक आपन बसमे कैरसकैछै आ बसमे करने छै। 8 महज मुहके कोइ नै बसमे करे सक्ने छै। मुह एहेन अधलाह चिज चियै जे कखनो बसमे नै रहैछै आ परान लैबला बिखे-बिखसे अकरमे भरल रहैछै। 9 अपनासब अहै मुहसे परभु आ पिताके धन्यबाद दैचियै आ एह्या मुहसे परमेस्वरके स्वरुपमे रचलगेल लोकके सरापो दैचिही। 10 एकेटा मुहसे आसिरबाद आ सराप दुनु निक्लैछै। हे हमर भाइ-भैयासब अनङ त नै हैकेचाही! 11 कि एकेटा भभरीसे तित आ मिठ पानी निक्लैछै? 12 हे हमर भाइ-भैयासब, अन्जिरके गाछमे जैतुन या अङगुरके लतिमे अन्जिर फरैछै? तहिनङ नोनगर पानीके भभरीसे मिठ पानी नै बहैछै। स्वरगसे आबैबला बुइध 13 तोरासबमेसे बुधिमान आ बुझहैबला लोक के छै? उ आपन असल चालचलनसे बुइधके नमरतासे निक काम कैरके देखाबे। 14 महज यदि तोरासबके मनमे जरनी आ स्वारथ छौ त आपन बुइधमे घमन्ड नै कर आ सतके झुठ नै बना। 15 एहेन बुइध स्वरगसे नै आबैछै, महज यि त सन्सारसे, लोकके आपन चाहनासे आ सैतानसे आबैछै। 16 जते डाह आ स्वारथ छै, ओते गन्जागोल आ सब परकारके दुस्ट कामसब हैछै। 17 महज स्वरगसे आबैबला बुइध त सबसे पहिने असल हैछै, तकरबाद उ सान्ती दैबला, नम्र, बिचारसिल आ दयासे भरल रहैछै आ असल कामसे परकट हैछै। अइमे पक्छपात करैबला बात आ छलकपट करैबला बात नै रहैछै। 18 सान्ती चाहैबला लोक एक-दोसरमे मेलमिलापमे रहैछै, परिनाम स्वरुप उसब धारमिक जिबन जियैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.