याकुब 2 - मध्य पुरविया थारूपक्छपातके बिरोधमे चेताबनी 1 हे हमर भाइ-भैयासब, तुसब महिमासे भरल आपन परभु येसु खिरिस्टके बिस्बास करैबला लोक भेलाके कारन तुसब ककरो पक्छपात नै कर। 2 तोरौरके सम्मेलनमे असल-असल बस्तर आ सोनाके औंठी लगाइबला धनिक लोक एतौ आ दोसर फाटल-चिटल कुरता, धोती पिन्हने लेरहल-घोरहल लोक सोहो एतौ त, 3 तै बखत तोरौरके असल-असल पिन्हैबला धनिक लोकके आदर करैत बिसेस धियान दैत कहबिही, “आबु, आबु, स्वागत अइछ, अहाँ अत निक ठाममे बैठु” महज ओतै गरिबके “ओतै ठार भेलरह या अतै भुइयाँमे हमर टाङलग बैठ” कैहके कहबिही त, 4 कि तोरौरके आपने बिचमे भेदभाव नै करलिही आ गलत बिचार करल दोख नै लाग्तौ? 5 हे हमर पिरिय भाइ-भैयासब, सुन। कि परमेस्वर सन्सारके गरिबसबके बिस्बासमे धनिक बनाके ओइ राजके हकदार हैकेलेल नै चुन्ने छै? ओह्या राज ओकरा परेम करैबलासबके उ दैले परतिग्या करनेचियै नै? 6 महज तुसब त गरिबसबके अपमान करनेचिही। कि धनिक लोकसब तोरासबके अत्याचार नै करैछौ? कि उसब तोरासबके अदालतके अगा घिस्याइत नै लजाइछौ से? 7 येसुके बदनाम करैबला ओह्यासब चियै नै? तुसब त ओकर लोकसब चिही आ ओकर उच नामसे परिचीत चिही। 8 यदि तुसब “आपन परोसियासबके आपने जखा परेम कर” कैहके पबितर धरमसास्तरमे लिखल परमेस्वरके राजकिय नियमके पालन करैचिही त तोरौरके असले करैचिही। 9 महज बाहरी रुप देखके लोकसबसङे बेबहार करबिही त तोरौरके पाप करैचिही आ परमेस्वरके पबितर बेबस्था तोरासबके दोसी ठहराइतौ। 10 यदि कोइ बेबस्थाके एकोटा बातके अपहेलना करतै त ओकरा पुरे बेबस्थाके अपहेलनाके दोख लाग्तै। 11 कथिलेत “बेबिचार नै कर” आ “हतिया नै कर” सेहो कहनेछै। तै दुवारे बेबिचार नै करबिही महज लोकके हतिया करबिही त बेबस्थाके भङ करैके दोख लाग्तौ। 12 अहैलेल तोरौरके बोली आ बेबहार स्वतन्तरताके बेबस्था बमौजी नियाय पाबैबलासब जखा हेबे। 13 कथिलेकी जे लोक किरपा नै करैछै ओकर नियाय किरपे बिनाके हैछै। किरपा नियायके उपर बिजय हैछै। बिस्बास आ काम 14 हे हमर भाइ-भैयासब, यदी कोनो लोक “हम परमेस्वरमे बिस्बास करैचियै” त कहतै, महज ओकर इक्छा बमौजी नै चल्तै त कोन फाइदा? कि एहेन लोकके परमेस्वर बचाइतै त? 15 यदि कोनो भाइ या बहिनके पिन्हैले आबसेक बस्तर आ खाइले दिन-दिनके भोजन नै छै। 16 तकरा तोरासबमेसे कोइ “सान्तीसे जो, गरमाके रह आ भैर पेट खो” कहबिही महज ओकर सरिरके लेल आबसेक भेल चिज किछो नै देब्ही त कथी फैदा भेलै? 17 बिस्बासो ओहिनङ हैछै। काम नै करैबला बिस्बास त मरल बिस्बास चियै। 18 महज कोइ हमरा पुछतै, “कि तु परमेस्वरमे बिस्बास करैचिही?” हम त कहबै, “हम ओकर आग्या अनुसार काम करैचियै। ओकर आग्यापालन बिना करल आपन बिस्बास देखा त? हम त कामसे आपन बिस्बास देखाइबै।” 19 परमेस्वर एकेटा छै कैहके तु बिस्बास करैचिही। बहौत निक! महज एहेन बिस्बास त भुतोसब करैछै आ डरसे थरथर कापैछै। 20 हे मुरुख, काम बिनाके बिस्बास बेरथ हैछै से बात तोरासबके थाह नै छौ? 21 अपनासबके पुरखा अबराहमके बारेमे बिचार कर। कि उ आपन बेटा इसहाकके बेदीमे बली दैबला काम कैरके परमेस्वरके अगा धरमी नै ठहरल से? 22 बिस्बास आ काम सङ-सङे रहैछै से बात नै देखलिही? ओकर आग्या पालनसे ओकर बिस्बास परमानित भेलै। 23 अबराहम परमेस्वरमे बिस्बास करल्कै आ परमेस्वर ओकरा धरमी ठहरेल्कै कैहके पबितर धरमसास्तरमे लिखल बात ओकर करल कामसे पक्का साबित करैछै। ओहैसे उ परमेस्वरके सङी कहलगेलै। 24 बिस्बास मातरे कैरके नै हैछै, महज बिस्बास अनुसार काम करैबलासबके परमेस्वर धरमी ठहराइछै से बात देखलिही। 25 राहाब बेस्याके बारेमे बिचार कर। सुराकी करैले गेल इजराएलीसबके घोसारल्कै आ दोसर कातके रस्तासे भागैके लेल ओइसबके उ मदत करल्कै। एहैन ओकर करल कामसे परमेस्वर ओकरा धरमी ठहराइल्कै। 26 जनङ परान बिनाके देह मरल रहैछै, तैहनङे कामबिनाके बिस्बास मरल रहैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.