याकुब 1 - मध्य पुरविया थारू1 हम याकुब, परमेस्वर आ परभु येसु खिरिस्टके सेवक यि चिठी चारुदिसन तितर-बितर भेल्हा यहुदी खिरिस्टीयनसबके लिखैचियौ। तोरासबके हमर गोरलगीछौ। आपत-बिपत 2 हे हमर भाइ-भैयासब, तोरौरके जब कोनो किसिमके आपत-बिपत एतौ तखुन तुसब खौब आनन्दके बात समझ। 3 कथिलेकी तुसब जानैचिही, तोरासबके बिस्बासके जाँचसे धिरज उतपन कराइतौ। 4 धिरजके पुरा रुपसे काम करैले दहै आ कोनो बातमे नै चुइकके आत्मिकी रुपमे परिपक आ सिध हैकेलेल सब किसिमके जाँचसब सहैत अस्थिर रहैके सिख। 5 महज तोरौरके बिचमे ककरो-ककरो बुइधके कमी छौ त उ परमेस्वरसे माङे आ परमेस्वर तोरासबके उदार चितसे परसस्त कैरके देतौ। 6 महज माङैत खिना सङका नै कैरके बिस्बासके साथ माङे। सङका करैबला लोक समुन्दरके हिलकोर जखाछै जे हबासे उठैछै आ खसैछै। 7 ओहेन लोक त परभुसे कोनो चिज मिल्तै कैहके नै सोच्तै तैयो हेतै। 8 ओहेन लोक घुचपिचिया हैछै आ ओइसबके चालचलन अस्थिर नै रहैछै। गरिब आ धनिक 9 हे तु गरिब भाइ-भैयासब गर्भ कर, कथिलेकी परमेस्वर तोरासबके उठाइनेछौ। 10 तैहनङ कैरके धनिक भाइसब नम्र अबस्थामेभी गर्भ कर, कथिलेत धनिक लोक फुल जखा मुरझा जाइछै। 11 जब टहटह रौद लागैछै तब फुलाके गाछ मुरझा जाइछै। एहैन लोभ लागैबला फुल त झैरजाइछै आ ओकर सोभा हर्याजाइछै। ओहिनङ कैरके कामकाजमे दौर धुप कैरते कैरते धनिक लोकसबके जिबन बित जाइछै। 12 उ लोक धैनके चियै, जे आपत-बिपतमे अस्थिर रहैछै, कथिलेकी जाँचके सामना करलाके बाद उ जिबनके मुकुट पाबतै, जे परमेस्वरके परेम करैबलासबके परमेस्वर दैले परतिग्या करने छै। 13 परिक्छाके बखत कोनो लोक नै कहे जे यि परिक्छा परमेस्वरसे एलछै, कथिलेत कोइ नै परमेस्वरके खराब काम करैके लेल उक्साइले सकैछै आ परमेस्वर सेहो ककरो खराब काम करैके लेल नै उस्काइतै। 14 सबलोक आपन खराब इक्छाके कारनसे परिक्छामे परैछै। 15 अहै कारन आपन खराब इक्छासे पाप जलमाइछै। ओह्या पाप बैढके मिरतुके कारन बनैछै। 16 हे हमर पिरिय भाइ-भैयासब, तोरौरके आपनेसे धोखा नै खो। 17 सब असल आ सब सिध दान स्वरगसे आबैछै। यि बरदान इजोतके पितासे आबैछै। उ छाह जखा कहियो नै बदलैछै। 18 उ आपन इक्छा अनुसार सत बचनसे अपनासबके लबका जलम देल्कै, ताकी हमसब ओकर सिरिस्टीके एकटा पहिल्का फल जखा भ्यासकी। सुन आ कर 19 हे हमर पिरिय भाइ-भैयासब, यि बात तोरौरके जान। सुनैमे जल्दी, बाजैमे अस्थिर, तामसमे कम हैलेपरतै। 20 कथिलेत लोकके तामससे परमेस्वरके धारमिकता नै आनैछै। 21 अहै खातिर सब एहेन अधलाह आचरन आ नै निक बानी बेबहारसे अलग हो। नम्र भ्याके तोरौरके हिरदयमे राखल परमेस्वरके बचनके आपन बना कथिलेत ओहैसे तोरौरके उदार कैरसकैछौ। 22 तोरौरके बचन पालन करैबला बन, सुनैबला मातरे भ्याके आपनके धोखा नै दहै। 23 जे बचन सुनैछै महज पालन नै करैछै, उ आपन मुह ऐनामे देखैबला लोक जखा हैछै। 24 उ ऐनामे जाबे तलिक ताकैतरहैछै ताबे तलिक आपन मुह देखैछै, ताकैले छोइर दैछै त हम केहेन छेलियै सोहो तुरन्त बिसैर जाइछै। 25 महज जे लोकसबके छुटकरा दैबला सिध बेबस्था निहाइरके ध्यान लगाबैछै आ ओइमे लागल रहैछै, उ सुइनके नै बिसरैछै महज पालन करैछै, उ आपनेसे करल काममे आसिस पाबतै। 26 कोइ आपनके धरमी सम्झैछै, महज आपन जिहके लगाम नै लगाइछै त उ आपनेके धोखा दैछै आ ओकर धरम-करम बेरथ हैछै। 27 परमेस्वर पिताके मनपरैबला साँचोके धरम-करम एह्या चियै दुखमे परल बिधुवा आ टुगर-टापरसबके देखभाल करनाइ आ सन्सारके अधलाह बातसे अलग रहनाइ चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.