हिबरु 9 - मध्य पुरविया थारूसन्सार आ स्वरगमे करैबला आराधना 1 पहिनेके करारमे परमेस्वरके आराधना करैले धारमिक नियमसब राखल छेलै। सन्सारमे लोकसबके बन्याल एकटा आराधना करैबला ठाम सेहो छेलै। 2 ओहै ठाममे एकटा पबितर पाल टाङल रहै आ पालके एकटा परदासे दुइ कोठलीमे बाटने छेलै। पहिन्का कोठलीके पबितर ठाम कहैछै, जैमे दिया राखैबला डैठ, टेबुल आ परमेस्वरमे चर्हाल रोटी राखल छेलै। 3 परदा पछारी दोसर कोठलीके महापबितर ठाम कहैछै, 4 ओते धुप बारैबला सोनाके बेदी आ सोनाके पतरसे सजल करारके सन्दुक छेलै। जै सन्दुकमे मन्न खाइबला चिज सोनाके भरियामे राखल छेलै। कोरही एल हारुनके लाठी आ परमेस्वरके लिखल दस आग्याके दुइटा पथलके सिलेटसब छेलै। 5 ओइ सन्दुकमे परमेस्वर ओते छै कैहके देखाबैके लेल ओइ सन्दुकके ढकनी उपर करुबसब छेलै। उ ढकनी उपर किरपा आसनमे करुबसब डेन पसारने छेलै। महज यि सबके बिसयमे अखुन बयान करैले नै सकैचियै। 6 यि सब बात मिलेलाके बाद पुजारीसब आपन बिधी आ करतब पालन करैत निरन्तर पहिन्का कोठलीके पबितर ठाममे परबेस करैछेलै। 7 महज दोसर कोठलीके महापबितर ठाममे परधान पुजारी मातरे बरिसके एकबेर जाइछेलै। उ लहु ल्याके मातरे जाइले पाबैछेलै। उ लहु आपन पापके लेल आ लोकसबके अन्जानमे करल पापके लेल उ चरहाइले जाइछेलै। 8 पबितर आत्मा अहैसे देखाबैछै कि, जहियातक पहिन्का कोठलीके पबितर ठाम रहतै, ताबे तक दोसर कोठली महापबितर ठाम जाइबला रस्ता नै खुल्तै। 9 यि त अखुनके समयमे अपनासबके देखैबला एकटा नमुना मातरे चियै। परमेस्वरके चरहाबैबला भेटी आ बलीसबसे आराधना करैबला लोकसबके हिरदय सुध करैले नै सक्तै। 10 यि सब खाइ-पियैबला आ अनेक धारमिक बिधीसे सुध हैबला नियम मातरे छेलै। परमेस्वरके लया बेबस्था नै आबैतलिक करैबला धारमिक बिधी मातरे चियै। खिरिस्टके लहुसे छुटकरा 11 महज खिरिस्ट अखुन अपनासबसङे भेल सब असल बातसबके परधान पुजारी भ्याके एलै। उ औरो असल आ सिध पालमे गेलै, जे लोकके हाथसे बनल नै छै अरथात सिरिस्टी करल अइ सन्सारके चिजो नै चियै। 12 खिरिस्ट सिधा महापबितर ठाममे सबदिनके लेल एकेबेर ढुकलै। उ छागर आ बछासबके चरहाल बलीके लहु ल्याके नै ढुकलै, महज आपने लहु ल्याके ढुकलै आ अपनासबके सबदिन रहैबला मुक्ती देल्कै। 13 छागर आ बछासबके लहु आ होममे चरहेला बाछीके छौर असुध लोकसबके उपर छिटलासे ओइसबके देह सुध हैछै त, 14 खिरिस्टके लहुसे औरो कतेक बेसीसे तोरासबके बिबेकके मरल कामसबसे सुध करतौ ताकि तुसब जिबित परमेस्वरके सेबा करैले सक। कथिलेत उ अनन्त आत्मासे आपनेके दाग नै लागल बलिके रुपमे परमेस्वरके अरपन करल्कै। 15 ओहै कारनसे परमेस्वरके परतिग्या करल सबदिन रहैबला अनन्त उतराधिकारी पाबे कैहके उ बोलेल्हासबके लेल खिरिस्ट लया करारके मिलाप कराबैबला चियै, कथिलेत पहिन्का करारके समयमे लोकसबके करल पापसे छुटकरा दैले उ मरलै। 16 जब कोइ इक्छा पतर छोइरके जाइछै त उ लोकके मिरतु भेल परमान पतर दैले परैछै। कथिलेत मिरतु भेलाकेबादे इक्छा पतरके काम लागैछै। 17 जाबेकत इक्छा पतर दैबला लोक जिबित रहैछै ताबेतक इक्छा पतर काम नै करैछै। इक्छा पतर दैबला लोक मरलाके बाद मातरे इक्छा पतर काम करैछै। 18 तैल्याके परमेस्वरके बान्हल पहिन्का करार पसुके लहु बह्याके मातरे पक्का करने छेलै। 19 जब मोसा बेबस्थामे लिखल सब आग्यासब लोकसबके सुनाके पुरा करल्कै तब उ बछा आ छागरसबके लहु पानीमे मिलाके लाल उन आ हिसपके झारसे चोपके बेबस्थाके किताबमे आ सब लोकसबके उपरमे छिटल्कै। 20 तब उ कहल्कै, “यि ओइ करारके लहु चियै जे परमेस्वर पालन करैके लेल तोरासबके आग्या देनेछौ।” 21 ओहिनङे मोसा पाल आ धारमिक बिधीमे चलाबैबला सब भरिया-बरतनसबमे लहु छिटल्कै। 22 बास्तममे बेबस्थाके कहल अनुसार बली चरह्याल लहुसे अक्सरहा सब चिजके सुध करैछै आ लहु बहाइने बिना पापके छमा नै हैछै। खिरिस्टके बलिदानसे पाप मेटाइछै 23 जे चिज स्वरगके चिजसबके परतिरुप मातरे छेलै यदि ओकरा सुध करैले एहैन किसिमके बिधीके आबस्यक छेलै त, स्वरगके चिजसबके सुध करैले ओहौसे असल बलिदानके आबस्यक छेलै। 24 खिरिस्ट त लोकसबके हाथसे बनल पबितर ठाममे नै ढुकलै, जे सत पबितर ठामके नमुना मातरे चियै, महज उ स्वरग भितर ढुकलै आ अखुन अपनासबके लेल परमेस्वरके अगा ठारभेल छै। 25 इजराएलीसबके परधान पुजारी त आपन नै महज पसुके बलीके लहु ल्याके साले पिछे महापबितर ठामभितर ढुकैछेलै, महज खिरिस्ट त बेर-बेर आपनेसे बलिदान हैले नै गेलै। 26 यदि एहैन हेतियै त सन्सारके सिरिस्टीके सुरुवातेसे ओकरा बारमबार दुख भोगैले परतियै। महज अइ जुगके अन्तमे उ सबदिनके लेल एकेबेर परगट भेलै आ पाप हटाबैले आपने बलिदान भेलै। 27 जहिनङ लोकसबके एकबेर मरनाइ निस्चित छै तहिनङ मरलाकेबाद ओकर नियाय निस्चित छै। 28 ओहिनङे बहुतो लोकके पाप छमाके लेल खिरिस्ट एकेबेर बली भेलै। उ दोसर बेर एतै त, ओइ बखत पाप छमाके लेल नै एतै, महज ओकरासबके मुक्तीके लेल एतै जेसब ओकर बाट ताकैत असियाल रहतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.