हिबरु 8 - मध्य पुरविया थारूलया करारके परधान पुजारी 1 हमसब यि बात कहैले चाहैचियै कि, अपनासबके एहेन परधान पुजारी छै, जे स्वरगके महान परमेस्वरके सिंहासनके दहिनाकात बिराजमान छै। 2 उ महापबितर ठाममे परधान पुजारी भ्याके सेबाके काम करैछै। उ साँचो महापबितर ठाम त लोकसब नै बनाइनेछै, महज परभु आपनेसे बनाइनेछै। 3 हरेक परधान पुजारीसब परमेस्वरके भेटी आ बलिदान चरहाबैके लेल नियुक्त भेल रहैछै। अहैलेल अपनासबके परधान पुजारीसङे कुछ न कुछ चिज चरहाइले परतै। 4 यदि उ अइ पिरथिबीमे रहतियै त पुजारी नै हेतियै, कथिलेकी बेबस्था अनुसार भेटी चरहाइबला पुजारीसब त पहिनेसे छेलै। 5 ओइसबके करैबला काम त स्वरगमे भेल बातके नकल आ छाह मातरे चियै। कथिलेत मोसा पबितर पाल बनाइ बखत परमेस्वरसे एहेन आग्या पाबने छेलै, “देख, पहारमे तोरा देख्याल नमुना बमोजिम तु सबचिज बनाइहे।” 6 महज येसुके भेटल सेबाके काम औरो पुजारीसबके कामसे एकदमे सेरेस्ठछै। ओहिनङे परमेस्वर आ ओकर लोकसबके बिचमे येसुके बान्हल लबका करार पुरन्का करारसे सेरेस्ठछै, कथिलेत यि करारके जग उतम परतिग्यासबमे आधारितछै। 7 यदि उ पहिन्का करारमे खोट नै रहतियै त दोसर करारके आबसेक्ते नै परतियै। 8 महज परमेस्वर आपन लोकसबमे दोस भेटाइल्कै तब कहल्कै, “परमपरभु कहैछै, ‘उ दिन आइबरहलछै, जब इजराएल आ यहुदाके घरानासङे हम एकटा लबका करार बान्हबै। 9 यि करार ओइसबके पिता पुरखा जरे बान्हल करार जखा नै हेतै, जब हम ओइसबके हाथ पकैरके मिसर देससे निकाइलके आनलियै।’ परमपरभु कहल्कै, ‘उसब हमरसे बान्हल करारके भङ करल्कै, अहैकारनसे हम ओइसबके वास्ता नै करलियै।’ 10 परमपरभु कहैछै, ‘आबैबला दिनमे हम इजराएलके लोकसबसङे यि करार बान्हबै। तोरासबके मनमे हम आपन बेबस्था राइखदेबौ, तोरासबके हिरदयमे उ लिखदेबौ। हम तोरासबके परमेस्वर हेबौ आ उसब हमर लोक हेतै।’ 11 ओइ बखत कोइ नै ‘परमेस्वरके चिन्ह’ कैहके आपन परोसियाके या आपन भाइ-भैयाके सिखाइले परतै, कथिलेत छोटसे लेके बरका सबलोक हमरा चिन्हतै। 12 हम ओकरासबके करल सब अपराध छमा कैरदेबै आ ओइसबके पाप फेनसे हम कहियो नै याद करबै।” 13 परमेस्वर यि करारके “लया करार” कहल्कै, ओहैसे ओकर पहिनेके बान्हल करारके पुरना करार ठहरेल्कै। उ करार पुरान हैतजेतै आ जल्दिए नास हैतजेतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.