हिबरु 7 - मध्य पुरविया थारूपुजारी मल्कीसेदेक 1 मल्कीसेदेक सालोम सहरके रजा आ महान परमेस्वरके पुजारी छेलै। जखैन अबराहम रजासबके लराइमे जितके घुइमके आबैत रहै तखैन मल्कीसेदेक ओकरा भेटके आसिरबाद देल्कै। 2 अबराहम रजासबसे जितके आनल सब धनसम्पतीके दसान्स मल्कीसेदेकके देल्कै। मल्कीसेदेक नाउके अरथ, “धारमिक हिसाबसे सासन करैबला रजा” चियै। सालोमके रजा भेलासे ओकर नामके अरथ “सान्तीसे सासन करैबला रजा” चियै। 3 मल्कीसेदेकके बाबु-माँ आ ओकर बंसके बारेमे कुछो थाह नै छै। ओकर जलम आ मरनके बारेमे सेहो कुछो थाह नै छै। परमेस्वरके बेटा जखा उ सबदिनके लेल पुजारी चियै। 4 उ कतहेक महान लोक छेलै कैहके तुसब आपनेसे बुझैले सकबिही। अपनासबके पुरखा अबराहम सेहो लराइमे जितके आनल चिजसबके दसान्स ओकरा देल्कै। 5 पुजारी पदमे नियुक्त भेल लेबीके सन्तानसब आपने इजराएली भाइ-भैयासबसे सेहो दसान्स उठाबैछै। अरथात बेबस्थाके नियम अनुसार ओकरासबके कमाइसे दसान्स उठाबैके अधिकार लेबीके सन्तानके देनेछै। उसब अबराहमके बंससे एलछै। 6 महज पुजारी मल्कीसेदेक त लेबी बंससे नै छेलै, तैयो उ अबराहमसे दसान्स पाबल्कै। उ परमेस्वरके परतिग्या पाबैबला अबराहमके आसिरबाद देल्कै। 7 छोट लोक बरका लोकसे आसिरबाद पाबैछै से बात सबकोइ जानैछै। 8 दसान्स उठाबैबला लेबीके सन्तानसब त मैरके जाइछै। महज पबितर धरमसास्तरमे कहल अनुसार दसान्स पाबैबला मल्कीसेदेक त सबदिन जिबित रहतै। 9 कोइ-कोइ अहिनङो कहैछै, दसान्स पाबैबला लेबी सेहो अबराहमके हाथबाटे दसान्स देल्कै। 10 कथिलेकी मल्कीसेदेक अबराहमके भेट करैबखत लेबीके जलम नै भेलरहै, महज अनङ बुझैचियै त उ अबराहमके देहमे छेलै, कथिलेत पाछु उ अबराहमके कुलसे जलम लेल्कै। येसु मल्कीसेदेक जखा 11 मोसाके बेबस्था अनुसार लेबीके कुलके लोक पुजारी हैके अधिकार पाबने छेलै, महज ओइसबके कामसे सब लोकसबके सिध करैले नै सक्लै। ओहैसे लेबी कुलके हारुनके सन्तानसे पुजारी नै भ्याके मल्कीसेदेक जखा दोसर पुजारीके खाचो नै परतियै। 12 कथिलेत पुजारी पद फेरैबखत बेबस्था सेहो फेरैएपरैछै। 13 यि बातसब अपनासबके परभुके बारेमे कहलगेलछै, उ त लेबी कुलके नै भ्याके दोसर कुलके चियै। ओकर कुलमे कोनो लोक पुजारी भ्याके कहियो सेबा नै करने छेलै। 14 यि बात परस्टे छै कि, अपनासबके परभु त यहुदाके कुलसे जलम लेनेछै। यहुदाके कुलसे पुजारी हैबला बातके बारेमे मोसा किछो नै कहनेछै। 15 मल्कीसेदेक जखा दोसर पुजारी आइबगेलाके कारन आब लेबी कुलके पुजारी पद आ बेबस्था फेरलछै कैहके औरो परस्टे हैछै। 16 येसु लोकसबके देल आग्या आ नियमके आधारमे पुजारी नै भेलछै, महज कहियो नास नै हैबला जिबनके सक्तीके आधारमे पुजारी भेलछै। 17 कथिलेत पबितर धरमसास्तरमे एहेन लिखलछै, “मल्कीसेदेक जखा अहाँ सबदिनके लेल पुजारी चियै।” 18 मोसाके बेबस्था कमजोर आ बेकामके भेलाके कारन खारेज भेलछै। 19 कथिलेत उ बेबस्था त कोनो लोकके सिध बनाइले नै सकल्कै महज आब त ओहौसे असल दोसर आसा अपनासबके देलगेलछै, जे अपनासबके परमेस्वरके औरो लगमे पुगाइछै। 20 परमेस्वर औरो पुजारीसबके नियुक्त करैतखिना किरिया नै खेल्कै महज येसुके पुजारी नियुक्त करैतखिना किरिया खेल्कै। 21 ओकर कहल बात पबितर धरमसास्तरमे अनङ लिखल छै, “‘तु सबदिनके लेल पुजारी चिही।’ कैहके परमपरभु किरिया खेनेछै आ उ आपन मन नै बदलतै।” 22 यह्या किरियासे येसुके उतम करारके जमानत बनाइछै। 23 ओइसबमे फरक यि छेलै कि लेबी कुलके पुजारीसबके संख्या बहुत छेलै आ मैरके जाइके कारन आपन सेबाके काम सबदिन करैले नै सकल्कै। 24 महज येसु सबदिनके लेल जिबित भेलासे, उ सबदिनके लेल पुजारी रहतै। 25 अहैलेल येसुमे बिस्बास कैरके परमेस्वरके लग आबैबलासबके उ सबदिन उधार करैले सकैछै, कथिलेत ओइसबके लेल परमेस्वरसङे परथना करैले सबदिन जिबितछै। 26 अपनासबके लेल अहिनङे परधान पुजारीके आबसेक्ता छै। जे पबितर, निरदोस, सुधछै। परमेस्वर ओकरा पापी लोकसबसे छुटियाके सबसे उपर स्वरगमे राखल्कै। 27 औरो परधान पुजारीसबके करल जखा उ पहिने आपन लेल तब औरोके पापके लेल दिन-दिने बली चरहाइते नै रहेपरतै, कथिलेकी उ एके बेरमे सबदिनके लेल आपने आपके बलीके रुपमे अरपन करल्कै। 28 बेबस्था कमजोर लोकसबके परधान पुजारी नियुक्त करैछै, महज बेबस्थासे पछा एल परतिग्यासे परमेस्वर आपने बेटाके सबदिनके लेल सिध परधान पुजारी नियुक्त करल्कै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.