हिबरु 6 - मध्य पुरविया थारू1 ओहैसे खिरिस्टके बारेमे सुरुमे सिख्याल सिक्छासब छोइरके अपनासब परिपक सिक्छा दिसन बरहु। अपनासब मिरतुमे लजाइबला कामसबसे पस्चाताप आ परमेस्वरमे बिस्बास करैबला बात फेनसे नै कर। 2 बहुत किसिमके बप्तिस्माके बारेमे सिक्छा, हाथ राखैबला काम, मरलसे जियैबला बात आ कहियो खतम नै हैबला दन्डके बारेमे तोरासबके सिखाइते नै रहेपरतौ। 3 यदि परमेस्वर अनुमती देतै त, यि सुरुके बातसबसे अपनासब अगा दिसन बरहैले सक्बै। 4 कथिलेत उसब, जे एकबेर परमेस्वरके इजोत पाबनेछै, स्वरगके बरदानके सबाद पाबनेछै आ पबितर आत्मामे सहभागी भेलछै, 5 परमेस्वरके उतम बचनके आ आबैबला जुगके लेल हैबला सक्तीसाली कामसब देखल 6 लोक भ्याके परमेस्वरके छोइरके जाइबलासबके पस्चाताप करैले लग्याके परमेस्वर दिसन घुमाइले नै सक्तै, कथिलेकी एहैन लोक परमेस्वरके बेटाके फेनसे कुरूसमे टाङतै आ सबके अगा खुलम-खुल्ला ओकरा अपमान करतै। 7 कुछ लोकसब पानी पैरके भिजल जमिन जखा हैछै आ खन-जोत करैबला किसानके लेल असल अन दैछै। ओइ जमिनके परमेस्वर आसिस दैछै। 8 महज औरो लोक काट आ कुस उबजाबैबला जमिन जखा हैछै। उ जमिन बेकार हैछै। एहैन जमिनमे त परमेस्वरके सराप परे सकैछै आ अन्तमे आइगसे नास हेतै। 9 हे हमर पिरिय सङीसब, हमसब तोरासबके बारेमे अनङ बोललियै तैयो तोरासबसे असल बातके आसा करनेचियौ। तुसब मुक्ती पाबलहा लोकसबके करल कामसब जखा तुहुसब असल काम करैचिही। 10 तुसब परमेस्वरके लोकसबके सेबा कैरते परमेस्वर परती आपन परेम देखाइनेचिही आ अखुनो अहिनङ सेबा करैत आइबरहलचिही। परमेस्वर अनियाय नै करैछै। तोरासबके करल यि सेबा आ परेमके उ कहियो नै बिसरतै। 11 यह्या हमरासबके इक्छाछै कि तोरासबके यि जोस आखिरतक हेबे आ तोरासबके आसा पुरा हेबे। 12 तुसब कोढिया नै बन, महज एहैन लोक जखा बन, जे बिस्बास आ धिरजसे परतिग्या करल चिज पाबैछै। परमेस्वरके परतिग्याके निस्चयता 13 परमेस्वर अबराहमसङे परतिग्या करैबेर आपनसे बरका कोनो नै भेलाके कारन उ आपने नाउमे एहैन कैहके किरिया खेल्कै। 14 उ कहल्कै, “हम तोरा साँचेके आसिस देबौ आ तोहर सन्तान परसस्त कैरके बरहादेबौ।” 15 तब अबराहम धिरज कैरके असियेलै आ परमेस्वरके परतिग्या करल आसिस पाबल्कै। 16 लोकसब किरिया खाइबखत आपन कहल बात पक्का हेबे कैहके आपनसे बरका लोकके नाउमे किरिया खाइछै आ उसब किरिया खाके बाद-बिबाद मिलाबैछै। 17 परमेस्वरके परतिग्या पाबैबला लोकसबके उ आपन करल परतिग्या पक्का छै आ कहियो नै बदलतै कैहके देखाबैके लेल उ किरिया खेल्कै। 18 परमेस्वरके करल परतिग्या आ खेल किरिया यि दुनुबात कहियो नै बदल्तै, कथिलेकी परमेस्वर झुठ नै बोलैछै। अहैलेल ओकरमे सरन लैबलासब अपनासबके अगा राखल आसा पाबैले बरका हौसला पाबनेचियै। 19 जनङ एकटा लङगर जहाजके अस्थिर राखैछै तहिनङ यि आसा अपनासबके सुरक्छीत आ अस्थिर राखैछै। उ आसा येसु चियै। उहे अपनासबके स्वरगिय मन्दिरके परदा भितर महापबितर ठाममे गेलै। 20 अपनासबसे लेल येसु त पहिने ओइ ठाममे गेल छै। मल्कीसेदेक पुजारी जखा उ सबदिनके लेल अपनासबके खातिर परधान पुजारी भेलछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.