हिबरु 5 - मध्य पुरविया थारू1 सब परधान पुजारी परमेस्वरके अगा लोकेसबके परतिनिधी करैके लेल लोकेसबमेसे चुनल जाइछै। उ लोकसबके तरफसे परमेस्वर लग पापके बलिदान आ भेटी चरहाइले नियुक्त हैछै। 2 उ अनजान आ खराब बाटमे लागल लोकसबके नम्र भ्याके सम्झाइले सक्तै, कथिलेकी उ आपने दुरबलतासे घेराल रहैछै। 3 अहैले लोकसबके पापके लेल मातरे नै महज आपने पापके लेल सेहो बलिदान चरहाइले ओकरा कर लागैछै। 4 कोइ नै आपनेसे परधान पुजारी भ्याके आदर पाबैले सक्तै, महज परधान पुजारी हारुने जखा परमेस्वरके बोल्याल लोकसब मातरे पाबैले सक्तै। 5 खिरिस्ट सेहो परधान पुजारी हैबला आदर आपने नै लेल्कै, महज ओकरा यि कहैबला आदर देल्कै, “तु हमर पिरिय बेटा चिही आ आइ हम तोहर बाबु भेल चियौ।” 6 दोसर ठाममे उ अनङ कहल्कै, “तु मल्कीसेदेक पुजारी जखा, सबदिनके लेल पुजारी चिही।” 7 येसु अइ सन्सारमे रहैतकाल मिरतुसे बचाबेबला परमेस्वरसङे जोरसे कानैत बिन्ती आ परथना करल्कै। ओकर नमरता आ भक्तीके कारन ओकर परथना परमेस्वर सुनल्कै। 8 उ परमेस्वरके बेटा हैतोपरभी आपन भोगल दुखसे उ परमेस्वरके आग्यापालन करैले सिखल्कै। 9 अनङकैरके परमेस्वर ओकरा सिध बनेलाके बाद ओकर आग्यापालन करैबला सबके लेल उ अनन्ततक रहैबला मुक्तीके मुल बन्लै। 10 परमेस्वर ओकरा मल्कीसेदेक जखा परधान पुजारीके पदमे नियुक्त करल्कै। बिस्बासके तियागैबलाके चेताबनी 11 अकर बारेमे तोरासबके कहैबला बहुतो बातसबछै, महज बुझैबला सक्ती मन्द भेल छौ, ओहैसे बुझाइले एकदम कठिनछै। 12 तोरासबके बिस्बास करला अतहेक दिन भेलछौ कि तुसब सिक्छक भ्याजेबाके चाही, महज अखुनो तोरासबके कोइ कोइ परमेस्वरके बचनके छोट छोट बात सिखाबे परलछै। तोरासबके ठोस भोजन नै, बल्की बच्चा जखा दुधके आबसेक्ताछौ। 13 माँके दुध मातरे पियैबला बच्चे रहैछै आ उ परमेस्वरके बचनमे परिपक नै रहैछै ओहैसे असल आ खराब छुटयाबैले नै जान्ने रहैछै। 14 ठोस भोजन खाइबला परिपक्क लोक रहैछै। उसब दिमागके निरन्तर अभ्यास दुवारा असल आ खराब छुटियाबे सकैबला भेल रहैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.