हिबरु 4 - मध्य पुरविया थारूबास्तबिक बिसराम 1 अपनासबके बिसराम देबौ कैहके परमेस्वरके करल परतिग्या अखुनो छै। ओहैसे होसियार रह आ उ बिसरामके ठाममे ढुकैले तोरासबमेसे कोइ नै छुटे। 2 कथिलेत अपनोसबके सेहो ओइसबके जखा सुसमाचार परचार करलगेलछै, महज उसब ओइ सुसमाचारमे बिस्बास नै करलाके कारन ओकरासबके कुछो फाइदा नै करल्कै। 3 आब अपनासब बिस्बास करलाके कारन उ बिसराम करैबला ठाममे ढुकैले पाब्बै, जनङकी परमेस्वर कहनेछै, “अहैलेल हम पितसे किरिया खाके कहलियै, ‘हमर बिसराम दैबला ठाममे उसब कहियो नै ढुकैले पाबतै।’” यि बात बिस्बास नै करलहा लोकसबके कहने रहै। परमेस्वर सन्सारके सिरिस्टी करलहा समयमे आपन सबकाम पुरा करल्कै तैयो उ अनङ कहल्कै। 4 पबितर धरमसास्तरके कोनो ठाममे सिरिस्टीके सातम दिनके बारेमे अनङ कहलगेलछै, “परमेस्वर सब कामसे सातम दिनमे बिसराम लेल्कै।” 5 फेनसे परमेस्वर अकर बारेमे अनङ कहल्कै, “हमर बिसराम दैबला ठाममे उसब कहियो नै ढुकैले पाबतै।” 6 पहिने सुसमाचार सुनैबलासब बिसराम करैबला ठाममे ढुकैले नै पाबल्कै, कथिलेकी उसब परमेस्वरके कहल बात नै मानल्कै, महज अखुनियो औरो कतहेक लोक बिसराम दैबला ठाममे ढुकैले बाकी छै। 7 अहैलेल परमेस्वर ओकर बिसराम दैबला ठाममे जाइके लेल तोकल बिसेस दिनके “आइ” कहल्कै। उ पहिने बोलल बात बहुत सयमके बाद रजा दाउदके बोलैले लगाइल्कै, “यदि तुसब आइ परमेस्वरके अबाज सुनबिही त, तुसब आपन हिरदय कठोर नै बना।” 8 यहोसु इजराएलीसबके परमेस्वरके परतिग्या करल बिसराम दैबला ठाउमे पहिने पुगाइने रहतियै त, परमेस्वर पाछुसे बिसेस दिनके बात करबे नै करतियै। 9 परमेस्वर सातम दिनमे बिसराम करल जखा, परमेस्वरके लोकसबके लेल बिसराम दिन बाकिछै। 10 जहिनङ परमेस्वर आपन काम पुरा कैरके बिसराम लेल्कै तहिनङ बिसराम पाबैबला ठाममे ढुकैबलासब सेहो आपन-आपन कामसे बिसराम पाबतै। 11 ओहैसे अपनासब ओइ बिसराम पाबैबला ठाममे ढुकैके खातिर कोसिस कर। यदि अपनोसब इजराएली लोकसब जखा अटेरी हेबै त अपनोसब नास हेबै। 12 कथिलेकी परमेस्वरके बचन त जिबित आ काम करैबला चियै आ कोनोभी दुइ दिसन धार भेल तलबारसे बेसी चोख रहैछै। जनङ परान आ आत्माके भितर पुइगके अकर जोरनी आ हड्डी भितरके गुदीसबके भाग-भाग करैतक वार-पार करैछै, तहिनङ परमेस्वरके बचन लोकसबके हिरदयके बिचार आ चाहनाके एक-एक कैरके जाँच करैछै। 13 परमेस्वरके नजरसे सिरिस्टीके कोनो चिज नै छुपलछै। ओकर नजरके सामने सब बात खुल्ला आ परस्टछै। ओकरे अपनासबके करल कामके लेखा दैलेपरतै। येसु महान परधान पुजारी 14 स्वरगमे गेल परमेस्वरके बेटा येसु अपनासबके महान परधान पुजारी भेलाके कारन अपनासब ओकरमे करल बिस्बासमे असथिर भ्याके रह। 15 कथिलेत अपनासबके परधान पुजारी अपनासबके दुरबलतामे साथ नै दैबला पुजारी नै चियै। उ अपनेसब जखा सब बातमे परिक्छामे परलै महज तैयो पाप नै करल्कै। 16 अहैलेल अपनासब परमेस्वरके अनुगरहके सिंहासनके अगा निडर भ्याके चल आ खाचो परलहा समयमे सहायता पाबैके लेल किरपा आ अनुगरह पाबैले सकी। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.