हिबरु 3 - मध्य पुरविया थारूमोसासे येसु महान 1 ओहैसे परमेस्वरके बोलाबट पाबलहा पबितर जनसब, तुसब आपन धियान येसुमे लगा, जकरा अपनासब परेरित आ परधान पुजारी कैहके सुइकार करैचियै। 2 मोसा परमेस्वरके लोकसबके सेबा करैले बिस्बासयोग्य भेल जखा येसु सेहो परमेस्वरके देल काममे बिस्बासयोग्य भेलै। 3 जनङकी घरसे बेसी घर बनाबैबलाके बेसी आदर हैछै, तहिनङ मोसासे बेसी येसु आदरके योग्यछै। 4 कथिलेत सब घर कोनो न कोनो लोकसे बनल रहैछै, महज सब चिज बनाबैबला त परमेस्वरे चियै। 5 मोसा त परमेस्वरके अरह्याल बमोजिम ओकर घरमे बिस्बासयोग्य नोकर भ्याके सेबा करल्कै। ओकर करल सेबासे भबिस्यमे परकट हैबला सत बातके गबाही देल्कै। 6 महज खिरिस्ट त घरके अधिकार पाबल बिस्बासयोग्य बेटा भ्याके सेबा करल्कै। यदि हमसब आपन आसामे अन्तिमतक भरोसा आ गर्भ कैरते रहबै त अपनोसब परमेस्वरके घरके सदस हेबै। अबिस्बासके बिरोधमे चेताबनी 7 तहैलेल पबितर आत्मा कहैछै, “यदी आइके तुसब परमेस्वरके आबाज सुनबिही त, 8 उजार जगहमे तोरासबके पुरखा परमेस्वरके बिरोध कैरके जाँचल जखा, तुसब आपन मन कठोर नै बना। 9 ओते तोरासबके पुरखासब चालिस बरिसतक हमर करल काम देखल्कै, तैयो उसब हमर बिरोध करल्कै आ हमरा जाँचल्कै। 10 ओहै कारन हम उ पुस्तासे खिस्याके कहलियै, ‘ओइसबके हिरदय सबदिन हमरसे भटकैत रहैछै, उसब हमर कहल बात नै टेरैछै।’ 11 ओहैसे हम रिसेसे एहेन किरिया खेलियै, ‘हमर बिसराम दैबला ठाममे उसब कहियो नै ढुकैले पाबतै।’” 12 हे पिरिय भाइ-भैयासब, होसियार रह। तोरासबमेसे ककरोमे भेल दुस्ट आ अबिस्बासी हिरदय तोरासबके जिबित परमेस्वरसे दुर नै लजाबे। 13 जबतक “आजुके दिन” कहैबला समयछै, तबतक एक दोसरके उत्साह दहै। ओहेन करबिही त, तुसब पापमे नै परबिही आ तोरासबके हिरदय परमेस्वरके इन्कार नै करतौ। 14 यदि अपनासब खिरिस्टमे करल सुरुके भरोसाके अन्ततक जोगाके राखबै त, अपनोसब खिरिस्टसङे साझा हकदार हेबै। 15 पबितर धरमसास्तरमे एहैन कहलगेलछै, “आजु तुसब ओकर अबाज सुनबिही त, तोरासबके पुरखासब परमेस्वरके बिरोध कैरके कठोर बनल जखा तुसब कठोर नै बन।” 16 परमेस्वरके आबाज सुनियोके ओकरा बिरोध करैबला के छेलै? कि मोसा जकरा अगुवाइ कैरके मिसरदेससे निकाइलके लाबने छेलै, से वह्यासब नै चियै? 17 परमेस्वर चालिस बरिसतक ककरसे करोध करल्कै? कि उ पाप करैबला लोकसब नै चियै, जे उजार जगहमे मरलै? 18 “हमर बिसराम दैबला ठाममे उसब कहियो नै जाइले पाबतै”, कैहके परमेस्वर ककर बारेमे किरिया खेल्कै? कि उ वह्या अटेरीसबके बारेमे नै चियै? 19 हमसब यि देखैचियै कि बिस्बास नै करलाके कारन उसब बिसरामके ठाउमे पुगैले नै सक्लै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.