हिबरु 2 - मध्य पुरविया थारूमुक्तीके बारेमे चेताबनी 1 अहैलेल हमसब परमेस्वरके बारेमे जे सत बात सुनने चियै तहैमे औरो बेसीसे धियान दैलेपरतै, तब मातरे अपनासब सतके रस्तासे नै भटकबै। 2 कथिलेकी स्वरगदुतसबसे घोसना करल सन्देस सत छेलै आ जे कोइ ओइके पालन नै करल्कै या नै टेरल्कै, सेसब दन्ड पाबल्कै। 3 आब हमसब एहैन महान मुक्तीके वास्ता नै करबै त, अपनासब कनङके दन्डसे बाच्बै? यि मुक्तीके बारेमे सबसे पहिने परभु येसु आपनेसे परचार करल्कै आ ओकर बचन सुनैबलासब अपनासबके लेल पक्का परमानित कैरदेल्कै। 4 परमेस्वर बहुतरा चेन्हासब देखाके बहुत किसिमके आस्चरजके कामसब आ सक्तीसाली कामसब करैत उ आपन इक्छा बमोजिम पबितर आत्माके दान-बरदानसब द्याके यि बातके गबाही देल्कै। खिरिस्ट मुक्तीदाता 5 हमसब चरचा कैररहल आबैबला सन्सारके परमेस्वर स्वरगदुतसबके अधिनमे नै राखनेछै। 6 पबितर धरमसास्तरके कोनो एक ठाममे एहैन कहलगेलछै, “लोक के चियै, अहाँ ओकर वास्ता राखैचियै? या लोकके बेटा के चियै, अहाँ ओकर वास्ता करैचियै? 7 अहाँ ओकरा कुछ समयके लेल स्वरगदुतसबसे कनहिकरा छोट बनेलियै। अहाँ ओकरा महिमा आ आदरके मुकुट लग्यादेनेचियै। 8 अहाँ सब चिज ओकरे अधिनमे राइखदेनेचियै।” परमेस्वर “सब चिज ओकरे अधिनमे लाइबदेल्कै” अकर अरथ यि चियै कि लोकके अधिनसे कोनो चिज बाहर नै छै। महज अखुनके समयमे हमसब यि बात लोकके अधिनमे भेल नै देखैचियै। 9 महज हमसब येसुके देखैचियै कि परमेस्वरके अनुगरहके कारनसे उ सबके लेल मरैले सके कैहके एकछनके लेल स्वरगदुतसे ओकरा छोट करल्कै। उ अपनासबके लेल मिरतुके दुख भोगल्कै, ओहैसे परमेस्वर ओकरा महिमा आ आदरके मुकुट पिन्हाइल्कै। 10 परमेस्वर आपने महिमाके लेल सब चिज सिरिस्टी करल्कै। उ आपन बहुतो धियापुतासबके महिमामे लाबैके इक्छा करैके कारन उ ओइसबके मुक्ती दैबला खिरिस्टके कस्ट दुवारा सिध बनाबैके ओकर लेल उचित छेलै। 11 लोकसबके पबितर बनाबैबला येसु आ पबितर बन्यालगेल सब एकेटा परिबारके चियै। ओहैलेल उ ओइसबके, “आपन भाइ-भैया आ दिदी-बहिनसब” कहैले नै लजाइछै। 12 उ कहैछै, “हम आपन भाइ-भैया आ दिदी-बहिनसबके अहाँके नाउके घोसना करबै, हम सभाके बिचमे अहाँके परसन्सा करबै।” 13 उ फेनसे कहल्कै, “हम परमेस्वरमे भरोसा राखबै।” आ उ फेनसे कहल्कै, “देख, हम परमेस्वर देल यि बेटा-बेटीसबसङे चियै।” 14 कथिलेत उ बेटा-बेटीसब लहु आ मासुके देह भेलासे येसु सेहो ओकरेसब जखा भ्याके एलै। उ आपनेसे मिरतु भोइगके मिरतुके सक्ती भेल सैतानके नास करल्कै। 15 तब मिरतुके डरसे जिबनभैर बन्धनमे परलहासबके उ छुटकरा देल्कै। 16 साँचोके, येसु स्वरगदुतसबके लेल नै, महज अबराहमके सन्तानसबके सहायता करैके लेल एलछै। 17 ओहैसे सब बातमे उ आपन भाइ-भैयासब जखा बनैले आबस्यक छेलै। ताकि उ परमेस्वरके सेबामे दयालु आ बिस्बासयोग्य परधान पुजारी बन्लै आ लोकसबके पाप छमा दैकेलेल उ आपने बली भेलै। 18 उ आपने दुख भोगल्कै आ परिक्छामे परलै, तैल्याके परिक्छामे परैबलासबके उ सहायता करैले सकैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.