हिबरु 12 - मध्य पुरविया थारूबिस्बासके असल उदाहरन येसु 1 अहैलेल अतहेक बरका साक्छीके भिर अपनासबके चारुदिसन भेलाके कारनसे सब परकारके बाधा आ असान तरिकासे ओझराइबला पापसबके हटाके धिरजसाथ दौरैले परतै। 2 अपनासबके बिस्बास सुरु करैबला आ पुरा करैबला येसुके देख। जे पाछुसे पाबैबला आनन्दके लेल अपमानके कुछो नै सोइचके कुरूसमे दुख भोगल्कै आ अखैन उ परमेस्वरके सिंहासनके दहिनाकात बैठलछै। 3 पापी लोकसब ओकर बिरोधमे जे बातसब लाबल्कै ओइबातसबके केनङके सहल्कै से बिचार कर आ तुसब नै थाक आ निरास नै हो। 4 पापके बिरोधमे तोरासबके करल सङघर्ससे आपन परान दैबला अबस्थामे नै पुगल चिही। 5 कि परमेस्वर तोरासबके आपन बेटा जखा माइनके देल उपदेस बिसैरगेल चिही? उ कहल्कै, “हे हमर बेटा, परभुके अनुसासनके तुसब बेरथके नै समझ, उ तोरासबके गल्तीमे हप्काइछौ त निरास नै हो, 6 कथिलेकी जकरा परमेस्वर परेम करैछै, तकरा अनुसासनमे राखैछै, जकरा उ आपन बेटा जखा सुइकार करने छै, तकरासबके दन्डो दैछै।” 7 हरेक दुख बाबुसे करल अनुसासन समैझके तुसब सह। परमेस्वर तोरासबके आपन बेटा-बेटी समैझके बेबहार करैछौ। कथिलेकी एहेन कोन बेटा-बेटी छै जकरा बाबु दन्ड नै दैछै? 8 यदि परमेस्वर आपने बेटा-बेटीसब जखा तोरासबके अनुसासनमे नै राखनेछौ त साँचो बेटा-बेटी नै चिही, महज तुसब औरोके बेटा-बेटीसब चिही। 9 अकर अलाबा अपनासबके अनुसासनमे राखैबला सारिरीक बाबु छेलै। अपनासब ओकरा आदर करैछेलियै। अनन्त जिबन पाबैले औरो अपनासब आपन आत्मिकी बाबुके अधिनमे रहैले परतै। 10 अपनासबके सारिरीक बाबु त ओकरासबके असल लागल अनुसार अपनासबके सुधार करैके लेल कुछदिन सजाय दैछै, महज अपनासबके परमेस्वर पिता अपनासबके भलाइ हेबे आ अपनासब ओकरे जखा पबितर हैले सकै कैहके सुधार करैके लेल सजाय दैछै। 11 सब किसीमके अनुसासन सुरुमे सुखद नै हैछै महज पिरा दायक हैछै। अनङ तालिम पाबलहासब धारमिक जिबन जियैछै आ औरोसङे मेलमिलापमे रहैछै। 12 अहैलेल थाकल हाथसब उठा आ दुरबल ठेहुनाके बौकार बना। 13 तुसब आपन चलैबला बाट सोझ बना ताकी तोहर टाङ नै लरबराबे बरु बौकार भ्याजाए। परमेस्वरके इन्कार करैबलाके चेताबनी 14 जम्मे लोकसबसङे मिलके सान्तीमे रह आ पबितर जिबन जियैके कोसिस कर, कथिलेत पबितर नै भ्याके कोइयो नै परमेस्वरके देखैले सक्तै। 15 होसियार रह कि कोइ नै परमेस्वरके अनुगरह पाबैसे छुटे, ताकी अबिस्बासके तित जैर बैढके तोरासबके बिचमे फुट नै आने। एहैन लोक बहुतो लोकसबके असुध नै बनाबे। 16 कोइ नै फेन ककरोसे अनैतिक सरिरके यौन समबन्ध नै राख या एसावके जखा अधरमी नै हो, जे एक छाक खानाके लेल उ आपन पाबलहा जेठौस हक बेचदेल्कै। 17 तोरासबके थाहेछौ कि, पाछुसे उ आपन बाबुसे आसिरबाद लैले चाहल्कै महज लेबे नै सक्लै। कथिलेकी पस्चाताप करैके मौका नै पाबल्कै तैयो उ लोर बहाके आसिरबाद लैले चाहल्कै। 18 तोरासबके हाथसे छुबैले नै सकैबला सिनै पहारमे नै एलचिही, आइगके धिधरा, करिया मेघ, खुटखुट अन्हार, हबा-बिहाइरके लगो नै एलचिही। 19 तुरहीके बरका आबाज आ एकटा बारका सोर छेलै, जे आबाजके सुनैबलासब, “आब अकरसे बेसी आबाज सुनैले नै परे” कैहके बिन्ती करल्कै। 20 कथिलेत “यदि कोनो जानबर ओइ पहारके छुतै त, ओकरा पथलसे मारे परतै।” कहैबला आग्या उसब सहैले नै सकल्कै। 21 उ दिरिस्य एहैन भयानक छेलै कि, मोसा आपनेसे “हम डरसे थर-थर कापैछी” कहने छेलै। 22 महज तुसब त सियोन पहार अरथात जिबित परमेस्वरके सहर स्वरगिय यरुसलेममे एलचिही। जते अनगिन्ती स्वरगदुतसब आनन्द मनाबैछै। 23 तुसब त परमेस्वरके पहिन्का जलमल अरथात ओकर सन्तानसबके सभामे एलचिही, जकर नाम स्वरगमे लिखलछै। उसब धरमीसबके आत्मा चियै, जे सिध करलगेलछै। तुसब सबके नियाय करैबला परमेस्वरकते एलचिही। 24 तुसब त परमेस्वर आ लोकसबके बिचमे लबका करार बान्हैबला मध्यस्तकरता येसुलग एलचिही। तुसब हाबिलके लहुसे बेसी असल बातके परतिग्या करैबला येसुके लहुमे एल चिही। 25 होसियार रह, तोरासबसङे बोलैबलाके इन्कार नै कर। यदि अइ पिरथिबीके लोकसे देल चेताबनीके इन्कार करैबला भागैले नै सक्तै त स्वरगसे चेताबनी दैबलाके इन्कार करबिही त कनङके बाचैले सकबिही? 26 ओइ समयमे सिनै पहारमे परमेस्वर बोलै बखत पिरथिबी हिलल छेलै। महज आब त उ अनङ कैहके परतिग्या करने छै, “हम पिरथिबीके मातरे नै, स्वरगोके फेर एकबेर हिलाइबै।” 27 “औरो एकबेर” कहल बात यि देखाबैछै कि हिलाबैले सकैबला अरथात सिरिस्टी करल चिजसब हटाइतै, महज हिलाबैले नै सकैबला चिजसब अस्थिर रहतै। 28 अहै खातिर हिलाबैले नै सकैबला राज पाबलाके कारन अपनासब परमेस्वरके धन्यबाद दहै। ओकरा मनपरैबला किसीमके भक्ती आ आदरकेसाथ ओकर आराधना करु। 29 कथिलेकी अपनासबके परमेस्वर त भसम करैबला आइग चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.