हिबरु 11 - मध्य पुरविया थारूबिस्बासके उदाहरन 1 बिस्बासके मतलब आसा करल बातमे निसचयता आ नै देखल बातमे पक्का भरोसा करनाइ चियै। 2 ओइसबके ओहिनङे बिस्बासके कारन पहिनेके लोकसबके परमेस्वर गरहन करल्कै। 3 हमसब बिस्बास दुवारा यि बात बुझैले सकैचियै कि, सन्सारके सब बात परमेस्वरके बचनसे सिरिस्टी करल्कै आ जे देखल बातछै से अनदेखल चिजसे बन्लै। 4 बिस्बाससे हाबिल आपन भैया कयिनसे औरो बेसी गरहन योग्य बली परमेस्वरके चरहेल्कै आ ओहैसे हाबिल धरमी ठहरलै। ओकर चरहाल बलीके परमेस्वर सुइकार करल्कै। हाबिल मैरके चैलगेलै तैयो ओकर बिस्बासके उदाहरनसे अखुनो अपनासब सिखैले सकैचियै। 5 बिस्बासके कारन हनोक नै मरलै, परमेस्वर ओकरा जिते अइ धरतीसे उठाके स्वरग ल्यागेलै आ कोइ नै ओकरा फेनसे देखल्कै, कथिलेकी परमेस्वर ओकरा ल्यागेलछेलै। हनोक स्वरगमे लजाइसे पहिने उ परमेस्वरके मनपरैबला जिबन बिताइने छेलै कैहके पबितर धरमसास्तरमे लिखलछै। 6 बिस्बास बिना परमेस्वरके खुसी करनाइ असम्भवछै, कथिलेकी जे परमेस्वरके नजदिक आबैछै, उ परमेस्वर छै आ ओकरा खोजैबलासबके इनाम देतै कैहके पक्का बिस्बास करेपरतै। 7 बिस्बास करलाके कारनसे नोआ परमेस्वरके चेतावनीके सुनल्कै। कहियो नै देखल महज पाछु आबैबला घटनाके बारेमे परमेस्वर ओकरा कहने छेलै। नोआ परमेस्वरके बात माइनके काठके एकटा बरका पानी जहाज बनेल्कै आ ओइमे ढुइकके आपन परिबारके बचेल्कै। आपन बिस्बास दुवारा नोआ सन्सार गलत छेलै कैहके देखेल्कै तब उ बिस्बास दुवारा अपना धरमी लोक ठहरलै। 8 बिस्बास दुवारा अबराहम परमेस्वरके कहल मानल्कै आ जो कैहके कहल ठामदिसन गेलै, जे ठाम परमेस्वर ओकरा देबौ कैहके परतिग्या करने छेलै। कते जेबै कैहके ओकरा थाहे नै छेलै तैयो उ आपन देस छोइरके गेलै। 9 अबराहमके बिस्बास भेलाके कारन परमेस्वरके परतिग्या करल, नै देखलहा देसमे उ गेलै आ परदेसी जखा पाल टाइङके बसोबास करल्कै। ओहिनङे परमेस्वर इसहाक आ ओकर बेटा याकुबके सेहो हकदारके परतिग्या करल्कै आ उहोसब ओहिनङे पाल टाइङके बसोबास करल्कै। 10 अबराहम सबदिन रहैबला जग भेल सहरके आस करैछेलै। ओइ सहरके योजना करैबला आ निरमान करैबला परमेस्वरे चियै। 11 बिस्बास भेलाके कारन सारा बुढ अबस्थामे देहभारी हैबला सक्ती पाबल्कै, कथिलेकी उ परतिग्या पुरा करैबलाके बिस्बासयोग्य ठानल्कै। 12 अहिनङ बुढ भ्याके मरैले लागल एकटा लोकसे अकासके तरा जतहेक आ गनैले नै सकैबला समुन्दरके कातमे रहल बालु सरह बहुत सन्तान भेलै। 13 उ सबलोक परमेस्वरके परतिग्या करल बात नै पाइबके बिस्बासेमे मरलै। उसब परमेस्वरके परतिग्या करल बात दुरेसे देखल्कै आ स्वागत करल्कै, तब उसब अइ पिरथिबीमे आपनेके परदेसी आ परबासी चियै कैहके ठानल्कै। 14 एहैन बात कहैबला लोकसब आपन लेल एकटा देस खोइजरहलछै कैहके परस्ट हैछै। 15 जै देससे उसब निकलल छेलै अदि उसब ओइ देसके नै बिसरने रहतियै त उसब फेनसे ओहै ठाममे जाइले सकतियै। 16 महज उसब त ओहौसे सुन्दर, अरथात एकटा स्वरगके देसके इक्छा करने छेलै। अहैलेल परमेस्वर “हम ओइसबके परमेस्वर हेबै” कहैले नै लजाइछै, कथिलेकी ओइसबके लेल एकटा सहर तयार करने छै। 17 परमेस्वर अबराहमके जाँच करैबेर बिस्बासके भरमे अबराहम आपन बेटा इसहाकके बली चरहाइके लेल तयार भेलै। अबराहम परतिग्या करल चिज त पाबने छेलै, तैयो उ आपन एकलौता बेटाके बली चरहाइके लेल तयार भेलै। 18 ओकर बेटाके बारेमे परमेस्वर अनङ कहने छेलै, “इसहाकेसे तोहर बंस खरा हेतौ।” 19 इसहाक मरबो करतै त परमेस्वर ओकरा जियाइले सक्तै कैहके अबराहम बिस्बास करल्कै आ साँचोके अबराहम इसहाकके मरलसे जिबित भेल जखा फेनसे पाबल्कै। 20 बिस्बासके भरमे इसहाक आपन बेटा याकुब आ एसावके ओइसबके भबिसके लेल आसिरबाद देल्कै। 21 बिस्बासेके कारनसे मरैके समयमे याकुब आपन लाठीके भरमे परमेस्वरके आराधना करल्कै आ योसेफके दुनु बेटाके आसिरबाद देल्कै। 22 बिस्बास भेलाके कारनसे योसेफ आपन मरैबला समयमे इजराएली लोकसबके मिसर देस छोरैके बारेमे कहने छेलै आ योसेफ ओकरासबके आपन हड्डी समेत कथी करैले परतै सेहो कहने छेलै। 23 मोसा जलमलै त ओकर माँ-बाबु ओकरा सुन्दर देखल्कै। बिस्बास दुवारा मोसाके माँ-बाबु ओकरा तिन महिना तक घोसाइरके राखल्कै आ रजाके हुकुमके डरो नै मानल्कै। 24 बिस्बासेके कारनसे मोसा जबान भेलाके बाद फारो रजाके बेटीके बेटा हैले असुइकार करल्कै। 25 उ पापके छनिक सुखबिलास भोगसे त बरु परमेस्वरके लोकसबसङे अतियाचार सहैले चुनल्कै। 26 मिसर देसके धन-सम्पतीसे त बरु खिरिस्टके लेल निन्दीत हैले उ मुल्यबान सम्पती ठानल्कै। कथिलेकी उ आपन नजर इनाम दिसन लगाइने छेलै। 27 रजाके करोधसे नै डगमगाके बिस्बासकेसाथ उ मिसरदेस छोरल्कै। कथिलेकी आँखसे देखैले नै सकैबला परमेस्वरके देखल जखा कैरके उ पछा दिसन नै घुमलै। 28 जेठका बेटासबके नास करैबला दुत इजराएलीसबके जेठका बेटासबके मारैले नै पाबे कैहके उ बिस्बास दुवारा निस्तार पाबैन मनाइल्कै आ केबारके चौकठमे बलिदानके लहु लगेल्कै। 29 बिस्बास भेलाके कारनसे इजराएली लोकसब सुख्खा जमिनमे चलल जखा लाल समुन्दरमे चैलके पार भेलै, महज मिसर देसके लोकसब पार हैले चाहल्कै त डुइबके मरलै। 30 बिस्बासके कारनसे इजराएली लोकसब सात दिनतक यरिहो सहरके देबालके चारुकात घुमलै त उ देबाल ढैहगेलै। 31 बेसिया राहाब बिस्बासेके भरमे परमेस्वरके बात नै मानैबलासबके सङे मरैले नै परलै कथिलेकी उ ओते सुराक लैले एल इजराएलीसबके स्वागत करने छेलै। 32 अइसे बेसी हम कथी कहु? गिदोन, बाराक, सिमसोन, यिप्ता, दाउद, सामुएल आ अगमबक्तासबके बारेमे बोलैले हमरा अखन समय नै छै। 33 उसब त बिस्बास दुवारा राजसबके जितल्कै, नियायके साथ राज करल्कै, परमेस्वरके परतिग्या करल चिजसब पाबल्कै आ सिंहसबके मुह बन्द कैरदेल्कै। 34 उसब धधकैत आइगके मुझा देल्कै, तलबारके धारसे बच्लै। उसब दुरबलतासे आब बलबन्त भेलै। लराइमे साहसके साथ लैरके सब बिदेसी सेनाके फौजके जितल्कै। 35 जनिसब आपन पिरिय मरलहा लोकसबके पुनरुथान दुवारा फेनसे जिबित पाबल्कै। कतहेक लोक त मिरतुके बाद औरो असल जिबनके आसमे छुटकरा पाबैसे त बरु मिरतु सहैले रोजल्कै। 36 कतहेकके गिल्ला सहैले परलै, कोरा खाइले परलै, झिझिरसे बन्हाके जहलमे परलै। 37 ओइसबके पथलसे मारल्कै। कतहेकके आरिसे चिरके दुइ फाक कैरदेल्कै। कतहेकके तलबारसे काटल्कै। कतहेक लोक गरिबी, अतियाचार आ दुरबेबहार सहैत भेरा आ बकरीसबके छाला लग्याके अने-ओने घुमैत रहलै। 38 ओइसबके लेल यि सन्सार योग्य नै छेलै। उसब उजार जगहमे, पहारसब, गुफासब आ ओडारमे रहैले परलै। 39 ओइसबके बिस्बासके कारनसे परमेस्वर ओइसबसङे खुसी भेलै, महज ओकर परतिग्या करल चिज कोइ नै पाबल्कै। 40 कथिलेत परमेस्वर अपनासबके लेल अहौसे उतम चिजके योजना करने छेलै। अपनासबसङे उसब सेहो सिद्व हेबे कैहके ओकर इक्छा छेलै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.