हिबरु 10 - मध्य पुरविया थारूखिरिस्टके एकेबेरके बलिदान सबदिनके लेल 1 मोसाके बेबस्था आबैबला उतम बातसबके खास रुप नै चियै, महज उ त छाह मातरे चियै। ओहैसे साले-साल चरहाइबला एके किसिमके बलीसे परमेस्वरके लग आबैबला लोकसबके सिध करैले नै सक्तै। 2 यदि पसुके बलीसे पुरा सुध करैले सकतियै त बेर-बेर बली चरहाइले नै परतियै। कथिलेकी ओइसे बली चरहाइबलासब सुध हेतियै त सबदिनके लेल एके बेरमे सुध हेतियै आ ओकरासबके बिबेकमे पाप नै रहतियै। 3 महज उ बलीसब लोकसबके साले-साल आपन पापके सम्झना मातरे कराबैछै। 4 कथिलेत बछा आ छागरसबके लहुसे पाप मेटाइले नै सक्तै। 5 अहैकारनसे सन्सारमे आबैतखिना खिरिस्ट परमेस्वरके अनङ कहल्कै, “अहाँ भेटी आ बलीसब नै चाहलियै, महज अहाँ हमर खातिर एकटा देह तैयार कैरदेने चियै। 6 होमबली आ पाप छमाके बलीसबमे अहाँ खुसी नै चियै। 7 तब हम कहलियै, ‘हे परमेस्वर, पबितर धरमरसास्तरमे हमर बारेमे लिखल बचन जखा अहाँके इक्छा पुरा करैके लेल हम एलचियै।’” 8 पहिने उ कहल्कै, “अहाँ बली आ भेटीसब नै चाहैचियै, होमबली आ पापबलीसब अहाँ नै चाहैचियै। यी सबसे अहाँ खुसी नै भेलियै।” यि त बेबस्था अनुसार चरहाबैछेलै। 9 तकरबाद उ कहल्कै, “अहाँके इक्छा पुरा करैके लेल हम एलचियै।” ओहैसे खिरिस्ट पहिनेके बली खारेज करतै आ अकर बदलामे दोसरो बलीके अस्थापित करतै। 10 कथिलेकी येसु खिरिस्ट परमेस्वरके इक्छा पुरा करल्कै। ओहैसे सबदिनके लेल एके चोटी आपन देहके बलिदान द्याके उ अपनासबके सब पापसबसे पबितर करल्कै। 11 हरेक पुजारी दिन-दिने ठार भ्याके बली चरहाइबला काम करैछै आ बेर-बेर एके किसिमके बली चरहाबैछै, जे बलीसे कहियो पाप मिटाइले नै सक्तै। 12 महज खिरिस्ट सबदिनके लेल पुगैबला पापके लेल एकेटा बली स्वयम आपनेके चरहाइल्कै आ परमेस्वरके दहिनाकात बैठलछै। 13 परमेस्वर ओकर सतरुसबके ओकर टाङ तर नै करैतलिक उ असियाल रहतै। 14 कथिलेत एकेटा बलिदानसे पापसे पबितर करल लोकसबके उ सबदिनके लेल सिध करने छै। 15 अकर बारेमे पबितर आत्मा सेहो अपनासबके अनङ साक्छी देनेछै। पहिने उ कहैछै, 16 “परमपरभु कहैछै, आबैबला दिनमे ओइसबसङे लबका करार बान्हबै। ओइसबके हिरदयमे हम आपन बेबस्था राइखदेबै आ ओइसबके मनमे उ बात लिखदेबै।” 17 तब उ अनङ कहैछै, “हम ओइसबके पाप आ अधरमके कामसब फेनसे याद नै करबै।” 18 सब पाप छमा भेलाके कारन आब फेनसे पाप छमाके लेल बली चरहाइले नै परतै। उत्साह आ चेताबनी 19 अहैलेल पिरिय भाइ-भैयासब, येसुके लहुके कारन अपनासब महापबितर ठाममे साहसके साथ ढुकैले सक्बै। 20 उ आपन परदारुपी देहके चिरके अपनासबके लेल एकटा लया जिबन दैबला रस्ता खोलदेनेछै। 21 उ परमेस्वरके घरमे अधिकार पाबल अपनासबके परधान पुजारी चियै। 22 उ आपन लहुके छिटकासे अपनासबके हिरदयके सुध करने छै आ सुध पानीसे अपनासबके देहके धुवाइनेछै। ओहैसे अपनासब साँचो हिरदय आ पक्का भरोसाके साथ परमेस्वरके लग चल। 23 अपनासबके करल आसामे अस्थिर भ्याके कैसके पकैरके राख, कथिलेकी जे परतिग्या करने छै, उ बिस्बास योग्यछै। 24 अपनासब एक-दोसरके परेम आ असल कामके लेल कनङके उत्साह दैले सक्बै ओइ बातमे धियान दैले परतौ। 25 कतहेक लोकके सङगतीमे जाइके बानी नै रहैछै, महज अपनासब एकसाथ भेला हैले नै छोर। महज तुसब परभु आबैबला दिन नजदिक आइबरहल देखलाके कारनसे एक-दोसरके औरो हौसला दहै। 26 यदि सतके ग्यान पाबियोके हमसब जाइन बुइझके पाप कैरते रहबै त, अपनासबके करल पापके लेल आब कोनो बलिदान बाकी नै छै। 27 महज पाप करैबलासब डराइते परमेस्वरके इन्साफके असियाल रहतै आ परमेस्वर आपन बिरोधीसबके जरैत आइगमे नास करतै। 28 मोसाके देल बेबस्थाके जे कोइ पालन नै करतै, तकरा एकोरती दया नै कैरके दुइ या तिन गोराके साक्छीसबके द्याल दोसी परमानके आधारमे मिरतुदन्ड दैछेलै। 29 तुसब आपने बिचार कर, परमेस्वरके बेटाके अनादर करैबला, आपनेके पबितर बनाइबला करारके लहुके अपबितर करैबला आ अनुगरह दैबला पबितर आत्माके अपमान करैबला लोक औरो बरका सजाय पाबतै। 30 कथिलेत एहैन कहैबलाके हमसब चिन्हैचियै, “बदला लैबला काम हमर चियै, बदला हम लेबै।” उ फेन कहैछै, “परमपरभु आपन लोकसबके नियाय करतै।” 31 जिबित परमेस्वरके हाथमे परनाइ एकदमे डरलागैबला बात चियै। 32 बितलहा दिनसबके याद कर, ओइ बखत परमेस्वरके ग्यान पाइबके तुसब बहुत दुख कस्ट भोगलिही, तैयो तुसब हार नै मानलिही। 33 कतहेक बेर तोरेसबके लोकके अगा बेजत आ अतियाचारके तमासामे परलिही त कहियो ओहिनङे अबस्थामे परलसबके मदत करलिही। 34 तुसब जहलमे परलहा लोकसबके दया देखाइलिही, आपन सम्पती लुटलगेलै तैयो खुसिसाथ सहन करलिही, कथिलेकी तुसब जानैछेल्ही, कि औरो उतम आ सबदिन रहैबला सम्पती आपनेसङे छै। 35 अहैलेल तुसब आपन यि भरोसा नै तियाग। तोरासबके अकर बरका इनाम मिल्तौ। 36 परमेस्वरके इक्छा पुरा करनाइ आ ओकर परतिग्या करल बात पाबैके लेल तोरासबके अस्थिर रहैये परतौ 37 पबितर धरमसास्तरमे एहेन लिखलछै, “आब आबैबला जल्दीए एतै आ उ देर नै करतै। 38 हमर धरमी लोकसब बिस्बाससे जिबित रहतै महज ओइसबमेसे कोनो लोक पछा हटतै त, हम ओकरसे खुसी नै हेबै।” 39 महज हमसब पछा हटैबला आ नास हैबला लोक नै चियै, हमसब त बिस्बास कैरके मुक्ती पाबैबला लोकसब चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.