हिबरु 1 - मध्य पुरविया थारू1 पहिन्का जुगमे परमेस्वर अपनासबके पिता पुरखासङे अगमबक्तासब दुवारा बहुत बेर आ बहुत किसीमसे बोलल छेलै। 2 महज यि अन्तके दिनसबमे उ आपन बेटा दुवारा अपनासबसङे बोलैछै। उ आपन बेटाके सब चिजके उतराधिकार हैकेलेल नियुक्त करल्कै आ ओकरे दुवारा सब चिजके सिरिस्टी करल्कै। 3 परमेस्वरके महिमाके इजोत ओकरेमे चम्कैछै आ वह्या परमेस्वरके साँचो रुप चियै। ओकरे सक्तीसाली बचनसे अकास आ पिरथिबीमे भेल सब चिजके अराइनेछै। उ लोकसबके पाप सुध करलाके बाद स्वरगमे रहैबला महिमीत परमेस्वरके दहिनाकात बैठलछै। खिरिस्ट स्वरगदुतसबसे महान 4 परमेस्वरके बेटा स्वरगदुतसबसे महान छै, कथिलेकी परमेस्वर आपन बेटाके स्वरगदुतसबसे बेसी आदरके नाम देल्कै। 5 परमेस्वर आपन बेटाके कहल्कै, “तु हमर दुलरुवा बेटा चिही, आइ हम तोहर बाबु भेल चियौ।” यि बात कोनो स्वरगदुतके परमेस्वर कहियो नै कहल्कै। उ आपन बेटाके बारेमे अनङ कहल्कै, “हम ओकर बाबु हेबै आ उ हमर बेटा हेतै।” यि बात कोनो स्वरगदुतसबके कहियो नै कहल्कै। 6 परमेस्वर आपन पहिन्का जलमल बेटाके सन्सारमे पठाबै बखत उ फेनसे अनङ कहल्कै, “परमेस्वरके सब स्वरगदुतसब ओकरे पुजे।” 7 परमेस्वर आपन सेबक स्वरगदुतसबके बारेमे अनङ कहल्कै, “परमेस्वर आपन स्वरगदुतसबके हबा-बिहाइर जखा आ आपन सेबकसबके आइगके धिधरा जखा बनाइतै।” 8 महज उ आपन बेटाके बारेमे अनङ कहैछै, “हे परमेस्वर, अहाँके राज जुगो-जुगके लेल रहतै आ अहाँ आपन राज नियायके साथ चलाइबै। 9 जे असल छै तकरा अहाँ परेम करैचियै आ जे खराब छै तकरा घिरना करैचियै। अहैलेल परमेस्वर, अहाँके परमेस्वर अहाँके सङीसबसे बेसी सरेस्ठ अहाँके ठहराइनेछै आ तेलसे अभिसेक कैरके आनन्द देनेछै।” 10 परमेस्वर फेनसे कहल्कै, “हे परभु, सुरुमे अहाँ पिरथिबीके जग बैठेलियै, अकास आ ओइमे भेल सब चिज अहैके हाथसे बनेलियै। 11 अहाँके बन्याल उ सब चिज पछा नास भ्याके चैलजेतै महज अहाँ त सबदिन रहबे करबै। उ सब चिज बस्तर जखा पुरान भ्याजेतै। 12 अहाँ ओइसबके बस्तर जखा चपोतके राखबै, उ फेर बस्तरे जखा फेरलजेतै। महज अहाँ सबदिन एकसमान रहबै आ अहाँके जिबनके अन्त कहियो नै हेतै।” 13 महज परमेस्वर यि बात कोनो स्वरगदुतके कहियो अनङ नै कहल्कै, “तु हमर दहिनाकात बैठ जाबे तलिक तोहर सतरुसबके तोहर टाङके निचा नै करबौ।” 14 स्वरगदुतसब त परमेस्वरके सेबा करैबला आत्मासब चियै। परमेस्वर ओकरासबके मुक्ती पाबैबला लोकसबके सहायता करैके लेल पठाइनेछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.