गलाती 6 - मध्य पुरविया थारूसबके भलाइ कर 1 हे हमर पिरिय भाइ-भैयासब, यदि कोनो लोक पापके जालमे परलछै, से जाइनके तोरासबमे जे आत्मिकी चिही, तुसब ओकरा नम्र भ्याके सुधार। तेहन काममे आपनो होसियार रह, नै त तुहुसब परिक्छामे परबिही। 2 एक-दोसरके भार उठा। अहिनङ कैरके तुसब खिरिस्टके आग्या पुरा करबिही। 3 यदि कोनो मोलके नै भेल्हा लोक आपनके बरका ठानैछैत, उ आपनेके धोखा दैछै। 4 सबकोइ आपन-आपन कामके जाँच आपनेसे करे। तब आपन करल काम असल हेतै त, उ आपन करल काममे खुसी हैले सक्तै आ दोसरसङे तुलना करैले नै परतै। 5 कथिलेत सबकोइ आपन कामके बोझ आपने उठाबैले परतौ। 6 बचनके सिक्छा पाबैबला सबकोइ आपन सब असल चिजसब बचन सिखाइबलासङे बाँटचुट करे। 7 धोखामे नै पर, परमेस्वरके कोइ नै मजाक उराइले सक्तै, कथिलेत लोक जे रोपैछै, ओह्या काटतै। 8 जे आपन पाप स्वभाबके लेल रोपैछै, उ आपन पाप स्वभाबसे सर्बनासके कटनी करतै। महज जे आत्माके लेल रोपैछै, उ आत्मासे अनन्त जिबनके कटनी करतै। 9 भलाइ करैले नै थाक, कथिलेत अइमे लागल रहबिही त, ठिक समयमे तकर कटनी करबिही, 10 तैखातिर मौका भेटैत मातर सबकोइके भलाइ कैरते चल, खास कैरके खिरिस्टमे बिस्बास करल परिबारसबके। पावलके अन्तिम सलाह 11 देख, हम आपने हाथसे तोरासबके कतहेक बरका-बरका अक्छरसे यि लिखैचियौ। 12 बाहिरी रुपसे ठिक देखाइले चाहैबलासब तोरासबके खतना करैले कर-चाप लगाइतौ। यि बात उसब कुरूसमे देल खिरिस्टके बलिदानके कारन आबैबला सताबटसे बचैके लेल करैछै। 13 कथिलेत खतना करैबलासब आपने बेबस्था पालन नै करैछै। उसब तोरासबके खतना कराबैले चाहैछौ, जैसे तोरासबके देहमे यी बेबस्थाके पालन कराके घमन्ड करैले सके। 14 अपनासबके परभु येसु खिरिस्टके कुरूस बाहके औरो कोनो चिजमे घमन्ड करैबला बात हमरसे दुरे रहे। ओकर कुरूसके कारन हमर लेल सन्सारके लोभ लालचसब मरल छै आ सन्सारके लेल हम मरल चियै। 15 नै त खतनाके कोनो महत्व छै, नै त बेखतनाके, महज मुल बात यि चियै कि परमेस्वर अपनासबके नया लोक बनाइनेछै। 16 यि बात पालन करैबला सबकोइमे आ परमेस्वरके सब लोकमे सान्ती आ किरपा रहे। 17 आबसे हमरा कोइने दुख देबे, कथिलेत हम खिरिस्ट येसुके दास चियै से परमान देखाबैले आपन देहमे ओकर चोटके डामसब धारन करनेचियै। 18 हे हमर पिरिय भाइ-भैयासब, परभु येसु खिरिस्टके अनुगरह तोरासबसङे रहे। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.