गलाती 5 - मध्य पुरविया थारूखिरिस्टमे स्वतन्तरता 1 खिरिस्ट अपनासबके स्वतन्तर करने छै। तहैलेल बौकार भ्याके खरा हो आ फेनसे बेबस्थाके दास हैले नै परे। 2 सुन, हम पावल आपनेसे तोरासबके कहैचियौ, तुसब खतना कैरके बेबस्था पालन करैचिही त तोरासबके लेल खिरिस्ट कोनो मोलके नै हेतौ। 3 खतना हैले परतौ कहैबलासबके हम फेनसे कहैचियौ, बेबस्थामे भेल सब आग्यासब पालन करैये परतौ से कैहके कर लाग्तौ। 4 बेबस्था पालन कैरके परमेस्वरके नजरमे धरमी ठहरैले चाहैबला खिरिस्टसे अलग भेलचिही आ ओकर अनुगरहसे दुर भेलचिही। 5 महज हमसब खिरिस्टमे बिस्बास करलासे पबितर आत्मा अपनासबके परमेस्वरके अगा धरमी ठहरैबला आसाके बाट ताकैले लगाइतौ। 6 खिरिस्ट येसुमे नै त खतनाके नै त बेखतना कोनो मोल छै। महज एकेटा बातके मोल छै, उ यि चियै, अपनासब बिस्बासके कारन एक-दोसरके परेम करैचियै। 7 ओनङ त तुसब सतके बाटमे असलेसे दौरैछेल्ही। के तोरासबके सतके पालन करैले बाधा देल्कौ? 8 यि कामसब त साँचोके तोरासबके बोलाइबला परमेस्वर नै करनेछौ। 9 याद राख, रोटी फुलाबैबला कन्हिके खमिरसे सानल पुरे आँटाके खमिरा बन्याल जखा एकटा झुठसे बहुतो लोकसबके बिगारैछै। 10 तुसब हमर कहल बातसबसे दोसर दिसन मन नै लागबिही कैहके हमरा परभुमे पुरा भरोसाछै। जेसब तोरासबके बहक्याके गलत रस्तामे ल्याजेतौ ओइसबके परमेस्वर सजाय देतै। 11 भाइ-भैयासब, यदि हम अखुन्तो खतना करैये परतौ कैहके परचार करैचियौ त कथिले हमरमे सताबट एलै? यि बात सँच रहतियै त कुरूसके बलिदानके परचारसे ककरो चित नै दुखतियै। 12 तोरासबके अलमलमे राखैबलासब त खतना मातरे कथिले, बरु पुरे अङ काटलासे निक हेतियै। 13 भाइ-भैयासब, तुसब स्वतन्तर हैले बोल्याल गेलचिही। यि स्वतन्तरताके आपन पाप स्वभाबके इक्छा पुरा करैले परयोग नै कर। बरु परेमसे एक दोसरके भलाइ कर। 14 कथिलेत सब बेबस्थाके निचोर एकेटा आग्यामे पुरा हैछै, “आपन परोसियासबके आपने जखा परेम कर।” 15 तुसब एक-दोसरके आपन बोलिसे जङली जानबर जखा दात काटैचिही आ नोच-नाच करैचिही त होस कर, नै त एक-दोसरके नास करबिही। पबितर आत्मा आ लोकके स्वभाव 16 अहैले हम कहैचियौ, पबितर आत्माके अगुवाइसे चल आ लोक आपन पापी स्वभाबके ललसा पुरा नै कर। 17 कथिलेत पापी स्वभाबके ललसा पबितर आत्माके आ पबितर आत्माके ललसा पापी स्वभाबके बिरोध करैछै। यि दुनु एक दोसरके दुस्मन चियै आ तोरासबके करैले चाहल बात कहियो पुरा हैले नै देतौ। 18 महज तुसब पबितर आत्माके अगुवाइसे चलैचिही त, तुसब बेबस्थाके अधिनमे नै चिही। 19 पाप स्वभाबके कामसब एह्या चियै- बेबिचार करनाइ, अनैतिक काम, निरलज, 20 मुरतिपुजा, जादु-टोना, दुस्मनी, झै-झगरा, रिस, आरिस, आपने भलाइ नै सोच, मनमोटाब, गुटबन्दी, 21 डाह, पियकरपन, मोजमजा करनाइ आ अहिनङे काम करैबलासब परमेस्वरके राजके हकदार हैले नै सक्तै कैहके हम तोरासबके चेताबनी दैचियौ आ पहिने सेहो देने छेलियौ। 22 महज पबितर आत्माके फलसब- परेम, आनन्द, सान्ती, धिरज, दया, भलाइ, बिस्वस्तता, 23 नमरता, आपनेके अधिनमे राखनाइ चियै। तकर बिरोधमे कोनो बेबस्था नै छै। 24 महज उसब, जे खिरिस्ट येसुके चियै, उसब आपन पाप स्वभाबके इक्छा आ ललसा कुरूसमे काटी ठोइकके मारनेछै। 25 यदि पबितर आत्मा अपनासबके लया जिबन देनेछै त, ओकर अगुवाइ अनुसार चलैले परतै। 26 हमसबके एक-दोसरसङे घमन्ड, रिस आ डाह नै करैके चाही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.