गलाती 4 - मध्य पुरविया थारू1 हमर कहैके मतलब यि चियै कि, हकबला जाबेतक छोट रहैछै, उ सब चिजके मालिक रहतै तैयो उ दास जखा हैछै। 2 उ आपन बाबुके निरधारित समयतक उ एकटा गारजन आ रेखदेख करैबलाके अधिनमे रहैछै। 3 खिरिस्ट आबैसे पहिने हमसब सेहो ओहिनङे छेलियै आ अइ सन्सारके रितिरिबाजके अधिनमे छेलियै। 4 महज परमेस्वरके देल समय पुरा भेलाके बाद आपन बेटाके पठाइल्कै। उ जनिके कोखसे जलमलै आ बेबस्थाके अधिनमे जलमल छेलै। 5 बेबस्थाके अधिनमे रहैबलासबके दाम तिरके छुटकरा दैले उ पठ्याल गेलै ताकि हमसब बेटाके पुरा हक पाबैले सकी। 6 तुसब परमेस्वरके बेटा-बेटी भेलासे उ आपन बेटाके आत्मा अपनासबके हिरदयमे राइखदेनेछै, जैसे “हे अब्बा, पिता!” कैहके पुकारैचिही। 7 तैखातिर आबसे तुसब नोकर नै, महज परमेस्वरके बेटा चिही आ बेटा चिही त हकबला सेहो चिही। गलातीसबके लेल पावलके वास्ता 8 तुसब परमेस्वरके चिन्हैसे पहिने बहुतो देबी-देउतासबके पुजा करैछेल्ही, जे परमेस्वर नै चियै। तुसब ओकर दास छेल्ही। 9 महज आब त तुसब परमेस्वरके चिन्हनेचिही या परमेस्वर तोरासबके चिन्हने छौ। महज तुसब कनङ फेर अइ सन्सारके कमजोर रितिरिबाज दिसन लागैचिही आ कथिले ओइसबके दास बनैले चाहैचिही? 10 तोरासबके बिसेस दिन, महिना, रितु आ बरिसके पबितर चलन मानैले लागल चिही। 11 हमरा डर भ्यारहल छै, कि हम तोरासबके खातिर बेरथेमे दुख करलियै? 12 भाइ-भैयासब, हम बिन्ती करैचियौ, एह्या बातसबके बारेमे जहिना हम चियै तहिनङे तुसब बन कथिलेत त जहिनङे तुसब पहिने बेबस्थाके अधिनसे स्वतन्तर भेल छेल्ही तहिना हम्हु स्वतन्तर भेलचियै। तुसब हमरा कोनो खराबी नै करनेचिही। 13 तोरासबके थाहे छौ, कि हम बिमार भेलाके कारन पहिन्का बेर तोरासबके सुसमाचार सुनाइले मौका पाबलियै। 14 ओइ बखत हम बिमार छेलियौ त तोरासबके दिकत भेलछेलौ, तैयो तुसब हमरा छि-छि आ दुर-दुर नै करलिही। महज उन्टे तुसब त परमेस्वरके एकटा दुत आ खिरिस्टे जखा हमरा स्वागत करलिही। 15 ओइ बखत तुसब कतहेक खुसी छेल्ही, यदि मिलतियौ त ओइ बखत तुसब आपन आँखो निकाइलके हमरा देबे परतियौ त दैले तैयार हेत्ही। हम अकर गबाही चियौ। महज अखुन कथी भेलौ? 16 कि अखुन हम सत बात बोइलके तोरासबके दुस्मन भेलियौ त? 17 झुठा बिस्बासीसब त तोरासबके उपर बहुत मतलब देखाइछौ, महज असल सोइचके त नै। उसब त हमरसे दुर कैरके आपने दिसन तानैले चाहैछौ। 18 यदि कोइ तोरासबके लेल निक काम करैले चासो देखाइछौ त असल बात चियै। चाहे हम तोरासबसङे रही या नै रही तैयो हरदम असल बातमे जोसगर हो। 19 हमर धियापुतासब, तोरासबमे जाबे तलिक खिरिस्टके स्वभाब नै बन्तौ ताबे तलिक हम फेनो जलमासोचके पिरा जखा दुख सहैत रहबौ। 20 अखुन हम तोरासबसङे रहतियौ त नमरतासाथ बात करैले सकतियौ। महज अतेक दुर से हम कथी करबौ? हम दोधारमे परल चियौ। हागार आ सारा 21 बेबस्थाके अधिनमे रहैले चाहैबलासब हमरा यि कह, बेबस्था कि कहैछै तोरासबके थाह नै छौ? 22 पबितर धरमसास्तरमे एहेन लिखल छै, अबराहमके दुइटा बेटा छेलै, एकटा नोकरनीसे आ दोसर आपने घरबालीसे। 23 नोकरनीसे जलमल बेटा लोकके इक्छा अनुसार जलमल छेलै महज आपन घरबालीसे जलमल बेटा परमेस्वरके परतिग्या करल बेटा छेलै। 24 अइसे हमसब यि बुझैले सकैचियै कि, उ दुइटा जनी परमेस्वरके दुइ करारके उदाहरन चियै। हागार सिनै पहारके पुरन्का करार जखा चियै। ओते परमेस्वर लोकसबके बेबस्था देने छेलै आ ओकरसे जलमल बेटा-बेटीसब दाससब चियै। 25 हागार जे अरब देसके सिनै पहारके बुझल जाइछै तकर तुलना अखुन्का यरुसलेमसे करल जाइछै, कथिलेत उ आ ओकर सब बेटा-बेटीसब बेबस्थाके अधिनमे छै। 26 महज स्वरगके यरुसलेम सारा स्वतन्तर छै आ अपनासब स्वतन्तर यरुसलेम माँ के बेटा-बेटीसब चियै। 27 पबितर धरमसास्तरमे एहेन लिखल छै, “हे बेटा-बेटी नै जलमाइबाली बाइझ खुसी मना, बचा जलमैत खिनाके दुख नै भोगलहासब, मन खोइलके गित गाब, कथिलेत घरबला हैबलासे नै हैबलाके बहौत धियापुता हेतौ।” 28 भाइ-भैयासब, अपनासब इसहाक जखा परमेस्वरके परतिग्या करल अबराहमके सन्तान चियै। 29 लोकके इक्छा अनुसार जलमल्हा बेटा इसमाएल परमेस्वरके आत्मा अनुसार जलमल बेटा इसहाकके सताबै छेलै तहिनङे बेबस्था पालन करैबलासब अखुन्तो खिरिस्टके पछा लागैबलासबके सताबैछै। 30 महज पबितर धरमसास्तर कथि कहैछै? “नोकरनी आ ओकर बेटाके घरसे निकाइल दहै कथिलेत नोकरनीके बेटा स्वतन्तर जनिसे जलमल बेटासे कोनो हक नै पाबतै।” 31 अहै खातिर हे भाइ-भैयासब, अपनासब नोकरनीके सन्तान नै महज स्वतन्तर जनिके सन्तान चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.