गलाती 3 - मध्य पुरविया थारूबेबस्था आ बिस्बास 1 हे मुरुख गलातीके बिस्बासी लोकसब, तोरासबके के मोहनी लग्याके मोइह लेल्कौ? तोरेसबके आँखेके अगा येसु खिरिस्ट कुरूसमे टाङलगेल बात अस्पस्ट रुपसे कैहदेनेछेलौ। 2 हम तोरासबसे एकटा बात पुछैले चाहैचियौ, तुसब कनङके पबितर आत्मा पाबलिही? कि तुसब मोसाके बेबस्था पालन कैरके पबितर आत्मा पाबनेचिही? नै, महज तुसब सुसमाचार सुइनके बिस्बास करलासे पबितर आत्मा पाबनेचिही। 3 कि तुसब अतहेक मुरुख भेलचिही, कि तुसब खिरिस्टिय जिबन पबितर आत्मासे सुरु कैरके आपने सक्तिसे पुरा करैले चाहैचिही? 4 कि तुसब अतहेक दुख बेरथमे काटलिही त? हम आस करैचियौ, कि तुसब बेरथमे दुख नै काटलिही। 5 परमेस्वर तोरासबके पबितर आत्मा देल्कौ आ तोरासबके बिचमे अजगुतके कामसब करल्कौ। कि तुसब बेबस्था पालन कैरके भेलौ? ओनङ त नै महज सुसमाचार सुइनके बिस्बास करलासे भेलौ। 6 अबराहमके देख, “उ परमेस्वरमे बिस्बास करल्कै तब परमेस्वर ओकरा धरमी ठहराइल्कै।” 7 तै खातिर तुसब यि जान कि, जे परमेस्वरमे बिस्बास करैछै, ओह्यासब अबराहमके धियापुतासब चियै। 8 परमेस्वर अबराहमके कहल्कै, “तोरेसे पिरथिबीके सब जातिके लोकसब आसिस पाबतै।” अनङ परमेस्वर गैर-यहुदीसबके बिस्बाससे धरमी ठहराइतै कैहके पबितर धरमसास्तर पहिनेसे असल समाचार सुनाइने छेलै। 9 तैखातिर अबराहम जखा बिस्बास करैबला लोकसब ओकरेसङे आसिस पाबैछै। 10 बेबस्था पालन कैरके धरमी हैले चाहैबलासब सरापके अधिनमे रहैछै कथिलेत पबितर धरमसास्तर कहैछै, “बेबस्थाके किताबमे लिखल सब बात नै मानैबला लोकसब सरापित हैछै।” 11 आब बेबस्था पालन कैरके कोइ नै परमेस्वरके अगा धरमी ठहरतै कथिलेत पबितर धरमसास्तरमे लिखल छै, “बिस्बाससे परमेस्वरके अगा धरमी ठहरैबला लोक अनन्त जिबन पाबतै।” 12 परमेस्वरमे बिस्बास करनाइ आ बेबस्था पालन करनाइ फरक बात चियै। महज पबितर धरमसास्तरमे लिखल छै, “जे बेबस्थामे लिखल बात पालन करैछै, उ तहैसे असल जिबन जियैछै।” 13 खिरिस्ट अपनासबके खातिर सरापित भ्याके अपनासबके बेबस्थाके सरापसे मोल तिरके छुटकरा देल्कै, कथिलेत पबितर धरमसास्तरमे एहेन लिखल छै, “काठमे लटक्याल लोक सरापित हैछै।” 14 अहैसे अबराहमके देल आसिस खिरिस्ट येसुसे औरो जातीके लोकसबके मिलैछै आ परमेस्वरके परतिग्या करल पबितर आत्मा अपनासब बिस्बाससे पाबैले सकैचियै। बेबस्था आ परमेस्वरके परतिग्या 15 हे हमर पिरिय भाइ-भैयासब, आब हम तोरासबके दिनदिनके जिबनसे एकटा उदाहरन द्यारहलचियौ। लोकसबके बिचमे कोनो करार एकबेर पक्का भेलाकेबाद कोइने एकरा रद कैरसकैछै आ नै त अइमे किछो थप-घट कैरसकैछै। 16 परमेस्वर, अबराहम आ ओकर सन्तानसे करल परतिग्या अहिनङे छेलै। पबितर धरमसास्तरमे द्याल उ परतिग्या “बहुतो सन्तानसबके” लेल नै, महज “एक गोरेके” लेल मातरे छेलै आ उ दोसर कोइने चियै, उ त केबल खिरिस्ट चियै। 17 हमर कहैके मतलब यि चियै कि, परमेस्वर आपनेसे परतिग्या करल बातमे मोहर लग्यादेने छै। महज चार सय तिस बरिसके बाद एल बेबस्था परमेस्वरके लग्याल मोहर मेट्याके ओकर परतिग्या रद नै कैरसकैछै। 18 कथिलेत हक बेबस्था पालन कैरके पाबतै त परतिग्याके कोनो मतलब नै रहलै। महज परमेस्वर अबराहमके परतिग्यासे हक देल्कै। 19 तब बेबस्था कथिले देल्कै? पाप चिन्हाबैके लेल देल्कै आ परतिग्या करल अबराहमके सन्तान नै आबैतक ओकर आवसेक परलै। परमेस्वर कुछ स्वरगदुतसबसे बेबस्था मोसाके देल्कै, उ परमेस्वर आ लोकके बिचमे मिलाप कराइबला छेलै। 20 मिलाप हैकेलेल दुनु पक्छ चाही महज परमेस्वर एक पक्छ मातरे छै। बेबस्थाके काम 21 तब कि बेबस्था परमेस्वरके परतिग्याके बिरोधमे छै त? कदापी नै। यदि बेबस्था पालन कैरके लोकसब अनन्त जिबन पाबैले सक्तियै त, बेबस्थे लोकसबके परमेस्वरके अगा धरमी ठहराइतियै। 22 महज येसु खिरिस्टमे बिस्बास करैबलासबके परमेस्वरके परतिग्याके आसिस पाबैले सके कैहके सबके पापके अधिनमे राखल छै कैहके धरमसास्तर कहैछै। 23 खिरिस्टमे बिस्बास करैबला बाट परकट नै हैसे पहिने हमसब बेबस्थाके अधिनमे छेलियै आ हमसब कैदी जखा भेलछेलियै। 24 तैल्याके बिस्बाससे हमसब धरमी ठहरैले सकि कैहके खिरिस्ट आबैसे पहिने बेबस्था अपनासबके खिरिस्टतक पुगाइबला गारजन भेलै। 25 महज आब खिरिस्टमे बिस्बास करैबला समय चैलएलाके कारन हमरासबके बेबस्थाके अधिनमे रहैले नै परतै। 26 कथिलेत बिस्बाससे येसु खिरिस्टमे तुसब परमेस्वरके सन्तान भेलचिही। 27 तोरासबमेसे जतहेक गोरे खिरिस्टमे बप्तिस्मा लेनेचिही, तु सबकोइ खिरिस्टके धारन करनेचिही। 28 आबसे नै त यहुदी, नै त गैर-यहुदी, नै दास, नै स्वतन्तर, नै पुरुख, नै जनी छै, कथिलेत तुसब खिरिस्ट येसुमे सबकोइ एक चियै। 29 यदि तुसब खिरिस्टके चिही त अबराहमोके सन्तान चिही आ परमेस्वरके परतिग्या बमोजिम हकबला सेहो चिही। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.