गलाती 2 - मध्य पुरविया थारूपावल आ औरो परेरितसब 1 चौद बरिसके बाद हम बरनाबाससङे तितसके ल्याके फेनो यरुसलेम गेलियै। 2 हमरा ओते जाइले परतै कैहके परमेस्वरके देख्याल अनुसार हम ओते गेलियै। हम ओते रहैबखत मन्डलीके मुल अगुवा मानलसबके एकान्तमे भेटघाट करलियै आ जे सुसमाचार हम गैर-यहुदीसबके सुनाइने छेलियै से बात सहि छै कैहके ओकरासबके परस्ट बत्यादेलियै। नै त हमर करल आ कैररहल काम बेरथ हेतै। 3 तै बखत हमरसाथमे रहल तितस, जे गैर-यहुदी भेलोपर, खतना करैये परतै कैहके कोइने कर लगाइल्कै। 4 खतनाके यि बात उठलै कथिलेत कतहेक झुठा बिस्बासीसब बहाना कैरके अपनासबके बिस्बासीसबके जेरमे एलै। उसब खिरिस्ट येसुमे भेल अपनासबके स्वतन्तरताके चेवा करैले आ हमरासबके बेबस्थाके दास बनाइले चाहैछेलै। 5 महज तोरासबमे भेल सुसमाचारके सत्यता सबदिन सुरक्छित रहे कैहके ओकरासबके अगा हमसब एकोरति नै झुकलियै। 6 उसब मन्डलीके मुख अगुवासब मानल गेलोपरभी हमर समादमे कोनो सल्लाह नै देल्कै। (उसब जतहेक बरका हेबे हमरा ओइसे कोनो फरक नै परतै, कथिलेत परमेस्वर ककरो मुह देखके नियाय नै करैछै)। 7 महज उसब देखल्कै कि, जनङ परमेस्वर हमरा गैर-यहुदीसबके बिचमे सुसमाचार सुनाइके लेल जिम्मा देनेछेलै, ठिक ओहिनङे यहुदीसबके बिचमे सुसमाचार सुनाइके लेल पतरुसके जिम्मा देने रहै। 8 जनङ परमेस्वर पतरुसके यहुदीसबके बिचमे परचार करैले परेरित बनाइल्कै, तहिनङे हमरा गैर-यहुदीसबके बिचमे परचार करैले परेरित बनाइल्कै। 9 याकुब, पतरुस आ युहन्ना, जेसब मन्डलीके खम्हासब मानल छेलै, उसब हमरा परमेस्वरके देल अनुगरहके पहिचान करल्कै। उसब बरनाबास आ हमरा संगतीके लेल देहना हाथ बनाइल्कै। बरनाबास आ हम गैर-यहुदीसबके बिचमे आ उसब यहुदीसबके बिचमे काम करैले सहमत भेलियै। 10 उसब गरिबसबके याद कर कैहके मातरे हमरासबके समझाइल्कै आ हम ओहिनङे करैले चाहैछेलियै। पावल एन्टिओखियामे पतरुसके बिरोध करल्कै 11 महज पतरुस एन्टिओखिया सहरमे एलाकेबाद हम ओकरा खुलमखुला बिरोध करलियै। कथिलेत उ दोसी छेलै। 12 जब पतरुस पहिने गैर-यहुदी बिस्बासीसबसङे बैठके खाइछेलै, जेसबके खतना नै भेल छेलै। महज पछा जब याकुबके पठेल्हा लोकसब एलै तब उ ओइसबसङे खाइले छोइरदेल्कै। कथिलेत खतनाबला लोकसबसे उ डर्याल छेलै। 13 औरो यहुदीसब पतरुसे जखा कपटी बेबहार देखाइल्कै। ओकरासबके बेबहार देखके बरनाबासो बहैक गेलै। 14 जब उसबके सुसमाचारके सत्यता अनुसार चलैत नै देखलियै तब हम सबके अगा पतरुसके कहलियै, “तुसब यहुदियो भ्याके गैर-यहुदीसब जखा जिबनबेतित करैचिही त, कथिले गैर-यहुदीसबके यहुदी बेबस्था पालन करैले कर लगाबैचिही?” 15 हमसब जलमेसे यहुदीसब चियै आ हमसब “पापी” मानल गैर-यहुदी जखा नै चियै। 16 तैयो लोक बेबस्था पालन कैरके धरमी नै ठहरैछै महज खिरिस्ट येसुमे भेल बिस्बास दुवारा धरमी ठहरैछै कहैबला बात जाइनके हमसब आपनेसे सेहो बेबस्थाके काम दुवारा नै बरु खिरिस्टके बिस्बास दुवारा धरमी ठहरलचियै कैहके येसु खिरिस्टमे बिस्बास करलियै कथिलेकी बेबस्थाके काम दुवारा कोइयो नै धरमी ठहरल जेतै। 17 यदि खिरिस्टमे धरमी ठहरैले कोसिस करैतखिना हमसब दोसी भेटाइबै त, कि खिरिस्ट पापके बढावा दैछै त? कदापी नै। 18 यदि हम पहिनेसे इन्कार करल बेबस्था फेनसे पालन करबै त, हम आपने आपके पापी साबित करैचियै। 19 कथिलेत हम त बेबस्थाके पालन करैले खोजलियै त ओह्या बेबस्था हमरा दोस लगेल्कै। तब परमेस्वरके लेल जिये सकी कैहके बेबस्थाके पालन कैरके मुक्ती पाबैके लेल कोसिस करैले छोइरदेलियै। 20 हमर पहिन्का स्वभाब खिरिस्टेसङे कुरूसमे मरल छै। आबसे हम नै महज खिरिस्ट हमरमे जियैछै। जे जिबन अखन हम सरिरमे जियैचियै से परमेस्वरके बेटामे बिस्बास कैरके जियैचियै कथिलेत उ हमरा परेम करल्कै आ हमर खातिर उ बलिदान भेलै। 21 हम परमेस्वरके अनुगरहके बेरथके नै ठानैचियै। यदि बेबस्था पालन कैरके हमसब परमेस्वरके अगा धरमी ठहरैचियै त, खिरिस्टके मरनाइ बेरथ हेतै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.