एफिसी 6 - मध्य पुरविया थारूधियापुतासब आ बाप-महताइरसबके बारेमे अरती 1 हे धियापुतासब, तुसब परभुमे एक भेलाके कारन आपन बाप-महताइरके कहल बात मान, कथिलेत यि बात उचित चियै। 2 पबितर धरमसास्तरमे लिखल छै, “आपन बाप-महताइरके आदर कर।” यि परतिग्या सहितके पहिन्का आग्या चियै। 3 अनङ करबिही त, “तोरासबके भलाइ हेतौ आ पिरथिबीमे बहौत दिन तलिक जियल रहबिही।” 4 हौ बाबुसब, आपन धियापुतासबके तामस नै चरहाब महज ओइसबके परभुके अनुसासन आ सिक्छामे अगा बरहाब। नोकरसब आ मालिकसबके अरती 5 हे नोकर-चाकरसब, जनङ खिरिस्टके सेबा करैचिही तैहनङे इमान्दारी साथ तुसब यि सन्सारके मालिकसबके आदर कर आ डर राइखके ओकरासबके कहलहा बात मान। 6 तोरासबके काम खाली मालिकके खुस करैके उदेससे देखाबैके लेल नै कर, महज खिरिस्टके नोकर-चाकरसब जखा पुरे हिरदयसे परमेस्वरके इक्छा पुरा कर। 7 लोकसबके लेल नै महज परभुके सेबा करल जखा हिरदयसे सेबा कर। 8 यि बात तोरासबके थाहे छौ, चाहे दास हेबे आ चाहे स्वतन्तर हेबे, असल काम करैबला सबके परभु इनाम दैछै। 9 हौ मालिकसब, तैहनङे कैरके अहुसब आपन नोकर-चाकरसबके असल बेबहार करु आ ओइसबके नै धम्काब कथिलेत अहाँसबके आ उसब दुनुके एकेटा मालिक स्वरगमे छै से बात नै बिसर। उ ककरो पक्छ ल्याके नियाय नै करैछै। परमेस्वरके हाथ-हथियारसब 10 अन्तमे, तुसब परभुमे आ ओकर बरका सक्तीसे बलगर हो। 11 सैतानके सब योजनासबके बिरोध करैले परमेस्वरके देल सब हाथ-हथियार उठा। 12 कथिलेत अपनासबके लराइ देह आ लहुके बिरोधमे नै महज सासकसबके बिरोध, सक्तिसबके बिरोध, अखुन्का अन्हार जुगके सन्सारिक सासकसब आ स्वरगके ठामसबमे भेल दुस्ट आत्माके सेनासबके बिरोधमे चियै। 13 अहै खातिर आब परमेस्वरके सब हाथ-हथियारसब धारन कर। तब तोरौरके खराब दिनमे सैतानके सक्तिसबके रोकैले सकबिही आ अन्त तलिक लराइ कैरके ठारभेल रहेसकबिही। 14 अहै कारन आब तैयार भ्याके ठारभेल रह। सतके डरकसना डारहमे बाइन्हके राख, छाति बचाइबला धारमिकताके कबज लगा। 15 सान्ती दैबला सुसमाचारके जुता लग्याके तैयार भेल रह। 16 आपन रक्छा करैबला बिस्बासके ढाल हरदम हाथमे लेने रह। तकरबाद दुस्ट सैतानके अग्निबानसब बुताइले सकबिही। 17 सिर रक्छा करैबला मुक्तीके टोपी लगा आ पबितर आत्माके तलबार ले, जे परमेस्वरके बचन चियै। 18 तुसब पबितर आत्माके सक्तीमे हर बखत परमेस्वरसे परथना कर। होसियार आ लगनसिल भ्याके हरदम खिरिस्टके पबितर जनसबके खातिर परथना करैतरह। 19 हमरो खातिर परथना कर। जखुन हम बाजैके लेल आपन मुह खोल्बै तखुन परमेस्वर हमरा बचन देबे आ हम निडर भ्याके सुसमाचारके रहस दोसरके बुझ्हाबे सकी। 20 अहै सुसमाचारके खातिर हम परेरित बन्याल गेलचियै। हम जहलमे कैद चियै तैयो हमरा जनङ बाजे परतै, तैहनङे साहस कैरके बाजैत रहे सकी कैहके हमर खातिर परथना कर। अन्तिम गोरलगी 21 हमर पिरिय भाइ आ परभुके बिस्बास योग्य सेबक तुखिकस हमर सब हालखबर तोरासबके सुनाइतौ। 22 हमरासबके हालखबर केहन छै, उ सुइनके तोरासबके हिम्मत बरहे कैहके हम ओकरा तोरासबलग पठाइनेचियौ। 23 सब बिस्बासी भाइ-भैयारीसबके परमेस्वर पिता आ अपनासबके परभु येसु खिरिस्ट सान्ती, परेम आ बिस्बास देबे। 24 परभु येसु खिरिस्टके परेम करैबला सङे परमेस्वरके अनुगरह सबदिन रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.