एफिसी 5 - मध्य पुरविया थारूइजोतके धियापुता 1 तुसब परमेस्वरके दुलरुवा धियापुता भेलासे ओकरे देखासिखी करैबला हो। 2 जनङ खिरिस्ट अपनासबके परेम करल्कौ, तहिनङ तुहुसब एक-दोसरके परेम कर। उ अपनसबके खातिर परमेस्वरके अगा आपनेके गमगम करैबला भेटी आ बलिदानके रुपमे अरपन करल्कै। 3 खिरिस्टके पबितर जनसब भेलासे तोरासबके बिचमे बेबिचार, सब किसिमके असुध बात आ लोभ-लालचके नाम लैले नै सुहाबैछै। 4 निरलज, मुरुख आ खराब बचनसब तोरासबके मुहसे नै निक्ले, यि बात ठिक नै चियै। बरु अकर बदलामे त परमेस्वरके धन्यबाद दैबला काम हेबे। 5 तोरासबके यि बात जानैये परतौ, कि बेबिचार करैबला, अपबितर आ लोभ करैबला लोकके (जे मुरतिपुजा चियै) खिरिस्ट आ परमेस्वरके राजमे कोनो हक नै छै। 6 कोइ नै बेरथके बात कैरके तोरासबके धोखा दैले पाबे। कथिलेत बेरथके बातसबके कारन परमेस्वरके दन्ड थेथरमे परैछै। 7 तै खातिर एहेन लोकसबके सङगते नै कर। 8 पहिने तुसब अन्हारमे छेल्ही महज आब परभुके लोक भेलाके कारन इजोतमे चिही। तैखातिर तुसब इजोतके धियापुतासब जखा बेबहार कर। 9 कथिलेत इजोतके फल त सब किसिमके भलाइ, धारमिकता आ सत्यता चियै। 10 कोन-कोन बातसे परभु खुस हैछै, से सिखैले कोसिस कर। 11 अन्हारमे काम नै लागैबला कामसबमे सहभागी नै हो। बरु उ काम खराब छै कैहके देख्यादहै। 12 कथिलेत यि लोकसब घोसैरके करल कामसबके बारेमे कहैयोले सरमके बात चियै। 13 जब कोनो बात इजोतमे आबैछै, तब ओइसबके असली रुप परकट हैछै। 14 जे असली रुप परकट हैछै उ इजोत चियै। पबितर धरमसास्तरमे अनङ लिखलछै, “हे बिभोर निनमे परल लोकसब जाग आ आपन पापके कारनसे मरल नै रह, जिबित हो। तब खिरिस्टके इजोत तोरासबमे चमकतौ।” 15 अहै खातिर, केहेन चालचलन चले परतौ तैमे निकसे धियान दहै, मुरुख नै महज बुधिमान हो। 16 समयके पुरा सदुपयोग कर, कथिलेत अखुनके लोकसब बहुत खराब काम करैतरहैछै। 17 तै खातिर मुरुख लोक नै बन महज परभु तोहरसे कोन आसा करनेछौ से जान। 18 अङगुरके मधसे नै मात कथिलेत ओइसे जिबन नास हैछै, महज पबितर आत्मासे भरपुर रह। 19 एक-आपसमे भजन, गित आ पबितर आत्मासे देल गित गाब आ परभुके खातिर आपन हिरदयसे धुन निकाल। 20 अपनासबके परभु येसु खिरिस्टके नाममे परमेस्वर पिताके सब बातमे हरदम धन्यबाद दैतरह। घरबला-घरबालीके समबन्ध 21 तुसब खिरिस्टके आदर करलाके कारनसे एक-दोसरके अधिनमे रह। 22 हे घरबालीसब, जनङ परभुके अधिनमे रहैचिही तहिनङ तुसब आपन-आपन घरबलाके अधिनमे रह। 23 कथिलेत घरबला घरबालीके सिर चियै, जनङ खिरिस्ट मन्डलीके सिर चियै, जे मन्डली ओकर देह आ उ स्वयम मन्डलीके मुक्ती दैबला चियै। 24 जहिनङे मन्डली खिरिस्टके अधिनमे छै, तहिनङे घरबालीयोसब, सब बातमे आपन-आपन घरबलासबके अधिनमे रहे। 25 हे घरबलासब, आपन घरबालीसबके परेम कर, जनङ खिरिस्ट मन्डलीके परेम करल्कै आ आपन जिबन अरपन करल्कै। 26 खिरिस्ट मन्डलीके बचन रुपी पानीसे धोइबके सुध आ पबितर बनाइल्कै। 27 यि मन्डलीके पबितर, निरदोस, दाग नै लागल, नै घोकच्याल आ कोनो परकारके दोख नै लागल सुन्दर मन्डली बन्याके आपनसङे रहैले एहैन करल्कै। 28 तैहनङे घरोबलासब आपन-आपन घरबालीसबके आपने देह जखा परेम करे परैछै। आपन घरबालीके परेम करैबला आपनेके परेम करैछै। 29 कोइ नै आपन देहके घिरना करैछै, महज ओकर पालन-पोसन करैछै, जहिनङ खिरिस्ट आपन मन्डलीके लेल करल्कै। 30 कथिलेत अपनासब ओकर देहके अङसब चियै। 31 पबितर धरमसास्तरमे लिखल छै, “अहैलेल लोक आपन बाप-महताइर छोइरके आपन घरबालीसङे एक हैछै आ उ दुनु मिलके एके देह हैछै।” 32 यि बहौत बरका रहसके बात चियै। हम एह्या बात खिरिस्ट आ मन्डलीके समबन्धमे बोलैचियै। 33 चाहे जे हेबे, तुसब आपन-आपन घरबालीसबके आपने जखा परेम करे परतौ आ घरबालीयोसब आपन-आपन घरबलाके आदर करे परतौ। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.