एफिसी 3 - मध्य पुरविया थारूऔरो जातिके खातिर परमेस्वरके काम 1 तैखातिर हम पावल, तु गैर-यहुदीसबके खातिर खिरिस्ट येसुके सुसमाचार सुनाइबला काम करैबखत जहलमे परलचियै। 2 तोरासबके लेल हम परमेस्वरके अनुगरहके काम करैले जिम्मा पाबनेचियै से बात तुसब सुन्नेचिही। 3 परमेस्वर आपन भितरी योजना हमरा परकट करने छै। अकर बारेमे हम तोरासबके पैहनिए छोटकरीमे लिखने चियौ। 4 हमर लिखल बात परबिही त, हम खिरिस्टके रहसके बात कतहेक बुझने चियै से बात तोरासबके मालुम हेतौ। 5 पहिने यि रहसके बात औरो कोनो लोकके थाह नै देनेरहै, महज अखुन यि रहसके बात आपन पबितर परेरित आ अगमबक्तासबके परमेस्वर आपन पबितर आत्मासे परकट कैरदेनेछै। 6 उ रहसके बात एह्या चियै कि, गैर-यहुदीयोसब सुसमाचारसे परमेस्वरके आसिस पाबैले सक्तै। उसब एक देहके अङसब आ खिरिस्ट येसुमे परमेस्वरके करल परतिग्याके साझेदार भेल छै। 7 परमेस्वरके बरदानसे हम सुसमाचार परचार करैबला सेबक भेलियै, यि बरदान उ आपन सक्तीके काम अनुसार हमरा देल्कै। 8 खिरिस्टके पबितर जनसबमेसे हम सबसे तुच्छ चियै तैयो खिरिस्टके महान सम्पतीके सुसमाचार गैर-यहुदीसबके सुनाइबला बरदान परमेस्वर हमरा देल्कै। 9 सब चिजके सिरिस्टी करैबला परमेस्वरमे जुगो-जुगतक घोसाइरके राखल रहसके योजना कि चियै, से बात सबलोकके खुलस्त रुपमे बताइबला काम हमरा देने छै। 10 अहिनङके मन्डलीसे परमेस्वरके सब किसिमके ग्यान स्वरगके ठामसबके सासकसब आ अधिकारीसबके बिचमे परकट करे। 11 परमेस्वर यि बात आपन अनन्त योजनाके अनुसार अपनासबके परभु येसु खिरिस्टमे पुरा करल्कै। 12 येसु खिरिस्टमे बिस्बास करैके कारन हमसब साहस आ भरोसाके साथ परमेस्वरके अगा आबैले पाबैचियै। 13 अहै खातिर हम तोरासबके बिन्ती करैचियौ कि, हम तोरासबके खातिर जे कस्ट भोग्नेचियै उ देखके हार नै मान। यि त तोरासबके खातिर गौरबके बात चियौ। खिरिस्टके परेम 14 अहै खातिर हम परमेस्वर पिताके अगा ठेङहुनिया द्याके परथना करैचियौ। 15 ओकरेसे स्वरग आ पिरथिबीमे भेल सब परिबार जिबन पाबैछै। 16 ओकर महान सम्पैत आ आत्मासे तोरासबके सक्ती मिले। उ सक्ती तोरासबके आत्म बल बरहैत जाए कैहके हम परमेस्वरसङे परथना करैचियौ। 17 तुसब बिस्बास करलासे खिरिस्ट तोरासबके हिरदयमे बास करतौ आ ओकर परेममे तोरासबके जैर बरहैत आ बलगर हैत ज्या कैहके हम परथना करैचियौ। 18 तब तुहुसब खिरिस्टके पबितर लोकसबसङे खिरिस्टके परेमके लम्बा, चौरा, उच आ गैहर कतहेक छै, से बात बुझैले सकबिही। 19 ग्यान आ बुइधसे बुझैले नै सकैबला खिरिस्टके परेमके बुझैले सक आ तुसब परमेस्वरके सारा सक्तीसे भरपुर हैले सक कैहके हम परथना करैचियौ। 20 अपनासबके भितर काम करैबला सक्तीसे अपनासबके माङलहा आ सोचलहासे बेसी कैरके परमेस्वर दैले सक्तै। 21 मन्डलीमे आ येसु खिरिस्टमे पुस्तो-पुस्तातक सबदिन ओकरे महिमा हेबे। आमेन। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.