एफिसी 2 - मध्य पुरविया थारूपुरन्का आ लबका जिबन 1 तुसब बिस्बास करैसे पहिने अटेरीपन आ पापके कारन आत्मिक रुपमे मरल छेल्ही। 2 ओइ बखत तुसब सन्सारके पापी लोकसब जखा चलैछेल्ही आ अकासके सक्तीके मालिक, सैतानके मानैछेल्ही। जे परमेस्वरके नै मानैबला लोकसबके अखुन आपन बसमे राखनेछै। 3 अपनोसब एक समयमे ओहैसब जखा आपन देहके आ मनके इक्छा पुरा करैमे लागल छेलियै आ औरो लोकसब जखा अपनोसब परमेस्वरके दन्ड पाबैबला छेलियै। 4 महज परमेस्वर जे किरपामे धनिक छै, उ अपनासबके बहौत परेम करल्कै आ महान दया देखाइल्कै। 5 अपनासब अटेर कैरके आत्मिक तबरसे मरल छेलियै तैयो परमेस्वर खिरिस्टसङे अपनासबके जिबित करल्कौ। तुसब परमेस्वरेके अनुगरहसे बच्याल गेलचिही। 6 परमेस्वर अपनासबके येसु खिरिस्टसङे जिबित कराइल्कौ आ ओकरेसङे स्वरगिय ठामसबमे राज करैले देल्कौ। 7 यि काम परमेस्वर अपनासबके येसु खिरिस्टमे करल असिम अनुगरह कतेक महान छै कैहके आबैबला सब दिनमे देखाइके लेल करल्कै। 8 कथिलेकी परमेस्वरके अनुगरहसे तुसब बिस्बाससे बच्याल गेलचिही। तुसब आपनेसे कोसिस कैरके नै, यि त परमेस्वरके देल बरदान चियौ। 9 यि तोरासबके कामसे नै भेलछौ, नै त लोक घमन्ड करतियै। 10 कथिलेत हमसब असल कामसबके लेल खिरिस्ट येसुमे सिरिस्टी भ्याल ओकर हाथके सिप चियै। ओह्या अनुसार अपनासब चल कैहके उ पहिनेसे तयार करने रहै। खिरिस्टमे सब एक 11 एक समय तुसब केहेन छेल्ही, से याद कर। तुसब गैर-यहुदी परिबारमे जलमल छेल्ही आ देहमे खतना भेल यहुदीसब तोरासबके खतना नै करल गैर-यहुदी लोक कहैछेलौ। 12 ओइ बखत तुसब खिरिस्टके नै चिन्हैबला लोक छेल्ही। तुसब परमेस्वरके छानल इजराएलीसबसङे समबन्ध नै भेल्हा बिदेसी छेल्ही। परमेस्वर आपन लोक इजराएलीसङे करल परतिग्यासबसे जोरल करारमे तोरासबके कोनो जगह नै छेलौ, तब सन्सारमे तुसब बिना आस आ बिना परमेस्वरके छेल्ही। 13 महज तुसब, जे ओइ बखत परमेस्वरसे दुर छेल्ही, आब खिरिस्ट कुरूसमे बह्याल लहुसे नजदिक भेलचिही। 14 खिरिस्टे अपनासबके सान्ती चियै कथिलेत उ यहुदी आ गैर-यहुदी बिचके दुसमनीके दबाल तोइरके एक बनाइल्कै। 15 उ यहुदी आ गैर-यहुदीसबके सान्ती दैले आ ओकरमे लबका जाती बनाइले कुरूसमे मैरके बेबस्था आ नियमके रध करल्कै, 16 आ दुइ जाती बिचके दुस्मनी नास करैले आ एक जाती बनाइले परमेस्वरसङे मेल कराइले उ कुरूसमे बलिदान भेलै। 17 उ आइबके परमेस्वरसे लग भेल यहुदी आ दुर रहल गैर-यहुदी दुनुके बिचमे मेलमिलाप कराइले सुसमाचार सुनाइल्कै। 18 खिरिस्टके कारनसे अपनासब एके पबितर आत्मा पाइबके पिता परमेस्वरके सामने जाइले सकैबला भेलचिही। 19 अहै खातिर तु गैर-यहुदीसब आब बिदेसी आ अनचिन्हार नै चिही, महज परमेस्वरके जनसङे तुसब एके समुहके नागरिक आ परमेस्वरके परिबारके सदससब भेलचिही। 20 परेरित आ अगमबक्तासबके खुनल जगमे बनल घर तुसब चिही। यि जगके मुल खम्हा येसु खिरिस्ट आपने चियै। 21 ओह्या पुरे घरके थाइम्हके राखनेछै आ उ यि घरके परभुमे एकटा पबितर मन्दिर बनाबितेछै। 22 तु गैर-यहुदीसब सेहो ओकरमे औरो जनसबसङे उ घर बनैचिही, जते परमेस्वरके आत्मा बास करैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.