एफिसी 1 - मध्य पुरविया थारू1 हम पावल, परमेस्वरके इक्छासे येसु खिरिस्टके परेरित, एफिसस सहरमे रहैबला आ येसु खिरिस्टमे बिस्बास करैबला पबितर लोकसबके यि चिठी लिखैचियौ। 2 अपनासबके परमेस्वर पिता आ परभु येसु खिरिस्टसे तोरासबके अनुगरह आ सान्ती मिले। आत्मिक आसिस 3 अपनासबके परभु येसु खिरिस्टके पिता परमेस्वरके धन्यबाद हेबे। उ अपनासबके खिरिस्टमे स्वरगिय ठामसबमे सब आत्मिक आसिस देने छै। 4 उ सन्सार सिरिस्टी करैसे पैहनिए खिरिस्टमे अपनासबके आपन अगा पबितर आ निरदोस करैले छान्ने छेलै। 5 उ आपन उदेस्य अनुसार अपनासबके परेम कैरके येसु खिरिस्टमे आपन सन्तान हैले पहिनेसे छान्ने छेलै। 6 अपनासब परमेस्वरके ओकर महिमामय अनुगरहके लेल धन्याबाद चरहा जे मङनिएमे आपन पिरिय बेटामे देनेछै। 7 ओकर महान अनुगरह अनुसार खिरिस्ट आपन लहु बहेलासे अपनासब उधार आ पाप छमा पाबनेचियै। 8 एह्या अनुगरह उ अपनासबके उपर परसस्त कैरके देनेछै। 9 ओकरे सब ग्यान आ बुइधमे परमेस्वर खिरिस्टमे पुरा करबै कैहके सोचलहा गुप्त योजनो अपनासबके देखाइल्कै। 10 समयमे पुरा भेलाके बाद स्वरग आ पिरथिबीमे सिरिस्टी भेल्हा सब चिज खिरिस्टके अधिनमे आबे। 11 कथिलेत सब बात परमेस्वरके योजना आ इक्छा अनुसार भेलछै। परमेस्वर अपनासबके आपन खुसिसे खिरिस्टमे छानल्कै। यि बात उ पहिनेसे करल योजना अनुसार भेल छेलै। 12 ताकी हम यहुदीसब खिरिस्टमे पहिनेसे भरोसा करलियै, परमेस्वर आपन परसन्साके खातिर छानल्कै। 13 तहिनङे तु गैर-यहुदीसब मुक्ती दैबला सतके बचन अरथात सुसमाचार सुइनके खिरिस्टमे बिस्बास करलिही। आपन परतिग्या करलहा पबितर आत्माके छाप तोरासबके लग्यादेनेछौ। 14 महिमामय परमेस्वरके परतिग्या करल पुरा मुक्ती नै पाबैतक पबितर आत्मा बैना जखा चियै। आब अपनासब ओकरा परसन्सा करु। धन्यबाद आ परथना 15 अहैकारनसे परभु येसुमे करल बिस्बास आ खिरिस्टके पबितर जनसबमे तोरासबके परेम सुइनके, 16 हम परमेस्वरके हरदम धन्यबाद चरहाइचियै। हमर परथनामे तोरासबके सम्झैत रहैचियौ। 17 हम अपनासबके परभु येसु खिरिस्टके महिमाके पिता, परमेस्वरके यि परथना करैचियै कि उ तोरासबके बुइध आ परकासके आत्मा देबे ताकी तुसब ओकरा असलसे चिन्हैले सके। 18 हम एहो परथना करैचियौ कि, तोरासबके हिरदयके आँख खुले आ कोन आसाके लेल उ तोरासबके बोलेल्कौ आ पबितर जनसबमे ओकर महिमीत उतराधिकारके सम्पैत कि चियै, से तुसब जानैले सक। 19 खिरिस्टमे बिस्बास करैबलासबके खातिर काम करैबला ओकर महान सक्ती अनुमाने करैले नै सकबिही। यि बात तोरासबके थाह हेबे कैहके हम परथना करैचियौ। 20 एह्या सक्तीसे परमेस्वर येसुके मरलसे जियाइल्कै आ स्वरगमे आपन देहना कात ओकरा बैठाइल्कै। 21 खिरिस्ट सारा सासन, अधिकार, सक्ती आ परभुत्वमे राज करतै। उ अइ युगमे मातरे नै महज आबैयोबला युगमे सब अधिकारसे उपर छै। 22 परमेस्वर सब बात खिरिस्टके अधिनमे राइखदेनेछै आ मन्डलीके लेल सब बातके सिर बनाइनेछै। 23 मन्डली खिरिस्टके देह चियै, एह्या देह सब बातसे भरल ओकर पुरा रुप चियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.