कलस्सी 4 - मध्य पुरविया थारू1 हे मालिकसब, तोरोसबके स्वरगमे एक गोरे मालिक छौ से बात जाइनके आपन दास सबसङे पक्छपात नै कैरके असल बेबहार कर। परथनामे लागल रह 2 तुसब सचेत भ्याके धन्यबादी हिरदयके साथ परथनामे लागल रह। 3 खिरिस्टके रहसके बात लोकसबके परचार करैले परमेस्वर केबार उघाइरदेबे कैहके हमरासबके लेल सेहो परथना कर। अहै रहसके परचार करैके कारनसे हम जहलमे परल चियै। 4 हमरा जनङके बुझाबैले परतै तहिनङे बोलैले सकी कैहके परथना कैरदहै। 5 येसु खिरिस्टके बिस्बास नै करैबलासबसङे बेबहार करैतखिना बुइध पुगाके कर आ तोरासबके भेटल सब मौकाके पुरा रुपसे परयोग कर। 6 जनङ नोन तरकारिके सबदगर बनाइछै तैहनङ तोरासबके बोलिबचन हरदम अनुगरहसे भरल आ सुनैले असल लागैबला हेबे। तुसब असलसे जबाफ कनङके देबे परतै से जाने परतौ। अन्तिम गोरलगी 7 हमर पिरिय भाइ तुखिकस हमर सब खबर तोरासबके सुनाइतौ। ओहो आपनेसबसङे सेबा करैबला परभुके बिस्बासी सेबक चियै। 8 हम ओकरा अइ उदेससे तोरासबके लग पठाइने चियौ कि तोरासबके हमरासबके बारेमे थाह हेबे आ उ तोरासबके साहस देबे। 9 ओकरसङे ओनेसिमस सेहो आइबरहलछौ जे तोरेसबमेसे एकटा बिस्बासी आ पिरिय चियौ। उ दुनुगोरा अतेका सब हालखबर तोरासबके सुनाइतौ। 10 हमरे सङे जहलमे रहलहा अरिस्तारखस तोरासबके गोरलगी पठाइनेछौ। बरनाबासके नातामे परैबला मरकुस सेहो गोरलगी पठाइनेछौ। ओकर बारेमे पहिने हम तोरासबके कैहदेनेचियौ, उ एतौ त असलसे स्वागत करिहे। 11 युस्तस कहाइबला येसु सेहो तोरासबके गोरलगी पठाइनेछौ। परमेस्वरके राज बरहाइले हमरसङे काम करैबला यहुदीमे एह्या तिन गोरा मातर चियै। बास्तममे यि सब हमरा बहौत साहस देनेछै। 12 तोरासबके एकटा भाइ, खिरिस्ट येसुके दास इपाफरास सेहो गोरलगी पठाइनेछौ। उ तोरासबके खातिर हरदम जोरतोरसे परथनामे सम्झैत रहैछौ ताकी तुसब बलगर हो आ परमेस्वरके सब इक्छा पुरा रुपसे मानैले सक। 13 उ तोरासबके खातिर, लाउडिकिया आ हिरापोलिसके लोकसबके खातिर बहौत मेहनत करनेछौ। हम यि बातके गबाही चियौ। 14 अपनासबके पिरिय बैध लुका आ डेमास सेहो तोरासबके गोरलगी पठाइनेछौ। 15 लाउडिकिया सहरमे भेल बिस्बासी भाइसबके, नुम्फासके आ ओकर घरमे जमा हैबला मन्डलीके हमर गोरलगी सुन्यादहै। 16 तुसब यि चिठी पैरहलेलाके बाद लाउडिकियामे भेल मन्डलियोके परहैले दहै। तैहनङे कैरके लाउडिकियाके चिठी सेहो तुसब परिहे। 17 “परभुके जिमा देल काम पुरा कर” कैहके अरखिपसके कैहदहै। 18 हम पावल, यि गोरलगी आपने हाथसे लिखैचियौ। हम जहलमे परलचियौ से बात नै बिसर। परमेस्वरके अनुगरह तोरासबसङे रहे। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.