कलस्सी 2 - मध्य पुरविया थारू1 हम तोरासबके लेल, लाउडिकियामे रहल मन्डलीके लेल आ हमर मुहो नै देखने बिस्बासीसबके लेल मैर-मैरके काम करनेचियै से बात तुसब जान कैहके हमर इक्छाछै। 2 हम अनङ करनेचियै ताकी ओइसबके हिरदयमे साहस मिले आ परेममे सङे जुरल रहे। अनङ हेतै त उसब आत्मिक रुपसे एकदमसे धनिक भ्याके परमेस्वरके रहसके ग्यान जे येसु खिरिस्ट चियै ओकरा पुरा रुपसे बुझैले सक्तै। 3 ओकरेमे परमेस्वरके सब ग्यान आ बुइधके सारा सम्पतीके भन्डारछै। 4 अहै खातिर तोरासबके कहैचियौ बिस्बास लागैबला जखा झुठ बातसे कोइ नै धोखा देबे। 5 कथिलेत हम देहमे तोरासबसे दुर चियौ तैयो आत्मामे त तोरेसबसङे चियौ। खिरिस्टमे तोरासबके बिस्बास एकदम अस्थिर भेल देखके हम बहुत खुसी भेलचियौ। खिरिस्टमे जिबन छै 6 जहिनङ खिरिस्ट येसुके तुसब परभु कैहके सुइकार करलिही तहिनङ तुसब ओकरमे रैहके जिबन बिता। 7 तुसब आपन बिस्बासके जैर ओकरमे गैहरतक गारने रह आ ओकरसङे आपन समबन्ध बलगर बनाइत जो। तोरासबके भेटल सिक्छा अनुसार बिस्बासमे अस्थिर भ्याके ओकरा धन्यबाद दैतरह। 8 होसियार रह, कोइ नै तोरासबके दरसन सास्तर या लोकसबके छल कपटसे बातमे फसाबे। एहेन बातसब खिरिस्टसे नै महज लोकसबके परम्परा आ सन्सारके सिक्छासे एलछै। 9 कथिलेत परमेस्वरके सारा परिपुर्नता खिरिस्टके देहमे बास करैछै। 10 खिरिस्टमे तोरासबके जिबन पुरा भेलछौ। वह्या सब सासन आ अधिकारके सिर चियै। 11 तुसब खिरिस्टमे होनाइ साँचोके खतना पाबनाइ चियौ। लोकके हाथसे लगाइबला खतना नै महज खिरिस्टसे खतना भेलचिही। यि खतना तोरासबके पाप स्वभाबके सक्तीसे छुटकरा पाबैके लेल चियै। 12 कथिलेत बप्तिस्मा लैतखिना तुसब खिरिस्टसङे गारल गेल्ही आ मरलसे खिरिस्टके जियाइबला परमेस्वरके सक्तीमे बिस्बास करलाके कारनसे खिरिस्टसङे जिबित भेलचिही। 13 तुसब पाप करलाके कारन आ बेबस्था अनुसार खतना नै करैबला गैर-यहुदी लोक भेलासे एक समय तुसब आत्मिक रुपमे मरल छेल्ही। महज आब त परमेस्वर तोरासबके खिरिस्टसङे जियाइनेछौ आ अपनासबके सब पाप छमा कैरदेनेछौ। 14 उ अपनासबके बिरोधमे लिखल सब तमसुक आ दाबीसब सङे रद कैरदेल्कै आ कुरूसमे किला ठोइकके नास कैरदेल्कै। 15 उ आत्मिक दुस्ट सक्तिसबके आ अधिकार सबके नस्ट करल्कै आ खिरिस्टके कुरूस दुवारा ओकरासबके हरेल्कै। उ ओइसबके खुलम खुल्ला तमासा बन्यादेल्कै। 16 अहै खातिर खान-पिन या पाबैनके दिन या अमसियाके दिन कि पबितर बिसराम दिन मानैके बिसयमे कोइ दोस लगाइछौ त, ओहेन बातसबमे धियाने नै लगा। 17 यि सब पछा आबैबला बातसबके छाह मातरे छेलै महज बास्तबिक बात त खिरिस्टे चियै। 18 हमरासबके दरसन मिललछै कैहके झुठ नमरता देखाबैत, स्वरगदुतके पुजा करैबला आ आपनेके महान समझैबलासब छै। उसब एहेन छल-कपटमे फैसके तुसब पाबैबला इनाम नै गुमा। एहेन लोकसब बिना कारन देहके स्वभाबके ग्यानमे घमन्ड कैरके फुलल रहैछै। 19 अहिनङ यिसब त आपन सिर, जे खिरिस्ट चियै, ओकरसङे कोनो समबन्ध नै राखैछै। खिरिस्ट देहके सिर चियै जे पुरे देहके हटाकटा बनाबैछै, एहैन कैरके देह, गिरह-गिरह आ नसा-नसासब जुटैत परमेस्वरेके योजना अनुसार बरहैत-बरहैत जाइछै। 20 तुसब खिरिस्टसङे मैरके यि सन्सारके आधारभुत सिदान्तसबसे छुटकारा पाबनेचिही त, कथिले तुसब यि सन्सारके नियमसब पालन करैचिही? 21 आब तुसब “यि चलाइले नै मिल्तौ, यि छुबैले नै मिल्तौ, चिखैले नै मिलतौ” कहैबला सन्सारके नियमसब नै मानैले परतौ। 22 यि नियमसब पालन करैत नास भ्याके चैलजाइछै। यि त लोकसबके बन्याल नियम आ सिक्छासब मातरे चियै। 23 धरम-करम करैबला, देखाबटी नम्र रहैबला आ बाबाजी जखा जियैबला, यि सब बुधिमान जखा देखापरैछै, महज यि आपन देहके अधलाह इक्छाके बसमे राखैले कोनो कामके नै हैछै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.