कलस्सी 1 - मध्य पुरविया थारू1 हम पावल, परमेस्वरके इक्छासे येसु खिरिस्टके परेरित आ अपनासबके भाइ तिमोथीके तरफसे, 2 कलस्से सहरमे रहैबला खिरिस्टमे भेल पबितर जनसब आ बिस्बासी भाइ-भैयासबके यि चिठी लिखैचियौ। अपनासबके परमेस्वर पिता तोरासबके अनुगरह आ सान्ती देबे। धन्यबादके परथना 3 हमसब तोरासबके खातिर परथना करैतखिना अपनासबके परभु येसु खिरिस्टके पिता परमेस्वरके हरदम धन्यबाद चरहाइचियै। 4 कथिलेत हमसब परभु येसु खिरिस्टमे तोरासबके बिस्बास आ ओकर सब पबितर लोकसबके करल तोहर परेमके बारेमे सुन्नेचियौ। 5 तोरासबके खातिर स्वरगमे सुरक्छित साथ राखल आसाके कारन एहेन बिस्बास आ परेम करैचिही। यि असाके बिसयमे तुसब पहिनेसे सतके बचन अरथात सुसमाचार सुन्नेचिही। 6 यि सुसमाचार तोरोसबके बिचमे एलछौ आ खिरिस्टके यि सुसमाचार सन्सारके बहुतो ठामसबमे लोकसब सुइनके बिस्बास कैररहलछै आ ओइसबके जिबन परिबरतन भ्यारहलछै। तुसब परमेस्वरके अनुगरहके बारेमे सत बात सुनल आ बुझल दिनसे सुसमाचार तोरोसबमे सेहो ओहिनङे काम कैर रहलछौ। 7 एह्या बात अपनासबके सङे-सङे सेबा करैबला इपाफरास तोरासबके सिखाइल्कौ। उ हमरासबके बदलामे तोरासबके बिचमे खिरिस्टके सेबा करैबला बिस्बासयोग्य भाइ चियै। 8 पबितर आत्मा तोरासबके देल परेमके बारेमे इपाफरास हमरासबके सुनाइने छै। 9 तैखातिर हमसब यि बात जहियासे सुन्नेचियै तहियेसे तोरासबके खातिर हरदम परथना करैत आइबरहलचियौ। पबितर आत्मासे मिलल पुरा आत्मिक ग्यान आ समझसे परमेस्वरके पुरा इक्छा जानैले सक कैहके हमरासबके परथना छै। 10 तब तुसब परभुके मनपरैबला जिबन बिताके ओकरा खुसी करैले सकबिही। सब असल काममे तुसब फल फराइत परमेस्वरके ग्यानमे बैढते जेब्ही। 11 परमेस्वरके महिमीत सक्ती तोरासबके बलगर बनाबे कैहके हमरासबके परथना छै, तब मातरे तुसब अस्थिर भ्याके सब चिज आनन्दसे सहन करैले सकबिही। 12 ओकरलेल परमेस्वर पिताके खुसीसे धन्यबाद दहै। परमेस्वरके इजोतके राजमे खिरिस्टके पबितर जनसबके पाबैबला बात तोरोसबके पाबैले सकैबला बनाइनेछौ। 13 वह्या अपनासबके अन्हारके सक्तीसे छुटकरा द्याके आपन दुलरुवा बेटाके राजमे आन्ने छै। 14 ओकरेमे अपनासबके छुटकारा आ पाप छमा छै। खिरिस्टके रुप आ काम 15 खिरिस्ट त नै देखैबला परमेस्वरके देखैबला रुप चियै। उ सारा सिरिस्टीके उपर अधिकार करैछै। 16 कथिलेत स्वरग आ पिरथिबीमे भेल सब चिज ओकरेसे सिरिस्टी भेलै। देखापरैबला आ नै देखापरैबला सब चिज, चाहे सिंहासन या सक्तीसब हेबे, सासकसब आ अधिकार चलाइबलासब, यि सब चिज खिरिस्टेसे आ खिरिस्टेके खातिर सिरिस्टी भेलै। 17 वह्या सब चिज सिरिस्टी हैसे पहिनेसे छेलै आ ओकरेमे सब चिज अरल छै। 18 मन्डली खिरिस्टके देह चियै आ उ ओकर सिर चियै। लया जिबन दैबला उहे चियै कथिलेत मरलसे जिबित हैबलामेसे उ सबसे जेठ चियै आ उहे सब बातमे अधिकार करैछै। 19 कथिलेत परमेस्वरके निरनयसे ओकर आपन सब स्वभाव खिरिस्टमे मिलल छै। 20 कुरूसमे बलिदान भेल खिरिस्टके लहुसे परमेस्वर स्वरग आ पिरथिबीमे भेल सब चिजके फेनसे आपनसङे मेलमिलाप आनल्कै। 21 एक समयमे तुसब परमेस्वरसे दुर छेल्ही। दुस्ट काम आ बिचार करलाके कारन तुसब परमेस्वरके दुस्मन छेल्ही। 22 महज आब खिरिस्टके देहके बलिदानसे परमेस्वर तोरासबके आपनसङे सुध, पबितर आ निरदोस कैरके मेलमिलापमे आन्नेछौ। 23 साँचोके तुसब आपन बिस्बासमे अस्थिर आ बलगर भ्याके सुनल सुसमाचारके आसासे पछा नै हट। एह्या सुसमाचार चियै, जे सन्सारके सब लोकसबके परचार करलगेलछै। हम पावल सेहो एह्या सुसमाचार सुनाइले परमेस्वरके सेबक भेलचियै। मन्डलीमे पावलके सेबा 24 अखुन हम तोरासबके खातिर दुखो भोइगके खुसी चियौ कथिलेत खिरिस्टके देह अरथात मन्डलीके खातिर बाकी रहल दुख-कस्टसब हम आपन देहमे भोइगके पुरा करैचियौ। 25 परमेस्वर हमरा तोरासबके भलाइके खातिर सेबक बनाइनेछै आ ओकर बचन पुरा-पुरी परचार करैके जिम्मा देनेछै। 26 यि बात जुगो-जुग आ पुस्तो-पुस्ताके लोकसब बुझैले नै सकल छेलै महज आब उ खिरिस्टके पबितर जनसबके परकट कैरदेनेछै। 27 यि महान रहसके बात गैर-यहुदीयो लोकसब बुझे कैहके परमेस्वरके योजना चियै। यि रहसके बात एह्या चियै, खिरिस्ट तोरासबमे बास करैछौ, जे गौरबके आसा चियौ। 28 तैखातिर हमसब ग्यानमे सबलोकके चेताबनी आ सिक्छा दैत खिरिस्टके बारेमे परचार करैचियौ ताकी सबलोकके खिरिस्टमे परिपक बन्याके परमेस्वरके अगा लाबैले सकी। 29 खिरिस्टके महान सक्तीमे भर पैरके यि काम हम एकदम मेहनतसे करैचियै। |
© 2024 (Active), Wycliffe Bible Translators, Inc. All rights reserved.
Wycliffe Bible Translators, Inc.